開頭以為個公主係幽靈應該好勁啦，就算唔識魔法都有特異功能果隻，
不過原來係普通人一個，頂盡係身手比較好D炸。
套野又係俊男配美女路線，好似地海傳說咁。(喂，幽靈公主出先架)
比起地海傳說呢套都較有羅輯，不過仍然有唔少吐糟位，
講到犬神族幾巴閉，又同d野豬忽忽講數，咪得果3隻狗，有幾勁呀？
一隻打十隻呀？又唔係特別大力又唔係識出龜波氣功，又唔係十米高，
只係大隻小小炸，人地蟻多都嬲死佢3隻象啦，仲有牙力講數？
仲要講到黑帽成條村d村民都怕左呢3隻野，呢個係bug位。
真正好抽就得個山神，但咁勁都比人打甩頭，第2個bug位。
呢套野一反宮崎俊老少咸宜傳統，又甩頭又有斷手斷腳，幾血腥下。

一口氣睇晒24話，作畫水準相當高，尤其是光源o既處理。
主角上條當麻看似一個平凡人，唔識魔法亦唔識特異功能，
有正義感路見不平拔刀相助，偏偏連最強能力者都敵唔過佢，
階因佢有幻想殺手(可以將所有超能力或魔法無效化o既能力)
睇佢點用特殊o既戰鬥方式戰勝各種能力者就係其中一樣賣點。
戰鬥概念係幾好，總好過睇撒亞人打外星人，閃黎閃去，
你勁時我變得更勁，你出個大波我出個更大o既波食左你果d。
當麻就只係得招無效化咁大把，要靠小小食腦o既作戰方式，
當然亦要劇本設定敵人果刻咁arm諗唔到應對方法先有戲做啦。
對史提爾時佢利用大廈灑水系統將d符o既墨水溶左令魔法失敗，
對只會用超能力唔識打爛仔交o既一方通行佢就直接用拳打，
有別於突然覺醒、發出強大o既氣、查克拉、靈壓、小宇宙去贏。
而御版美琴就係作品o既另一樣賣點，雖然唔係主角，
但比主角更耀目，以致要出套超電磁砲o既外傳比佢擔正。
不過睇怕index一日唔走，美琴都幾難同當麻一對，且看往後發展。
套野缺點係交待好多理論野，搞到講五六分鐘理論較長氣同沉悶。
相比之下新番o既超電磁砲節奏明快得多。

當今最受歡迎o既GAME非COD同L4D2莫屬，
不輪電腦版、PS3版、XBOX360版人人都連線玩。
尋晚同強哥、royce落網吧打L4D2，我係第一次玩，
感覺幾易上手同埋比想像中難死。電腦版操作如下，
鍵盤：W、S、A、D上下左右移動，E掣執野，R掣上彈，
mouse：上、下、左、右就望上、下、左、右，
個碌就換武器/道具，左掣開槍/用道具，右掣撥開d喪屍。
隻GAME極之血腥，為虐殺而虐殺，d喪死好似豆腐咁，
射兩野就甩手甩腳，d隊友(人類)練左鐵布衫咁，
亂槍掃射用斧頭劈都只係噴血個身完整無缺。
玩左一粒鐘就只係去到第一版第二個Area，
再玩落去就cut線，個職員話埋左數唔比續... =.="'
咁又係o既，我地續機個職員又唔會多錢落袋，
雞碎咁多人工做多咁多工，最好個個都唔好玩佢就唔洗煩。
royce就慫恿我同強哥買正版係屋企連線玩，
之但係屋企部電腦仲係六七年前貨色，唔知行唔行到L4D2。

由於GX100打左柴，衣家物識緊新o既代替品。
已經有NIKON D80 o既我唔會再考慮半專業機，
DC仔都係影方便相，影專業相就直接用單反。
唔係電話影相又慢&強差人意o既話直情DC都慳番。
尋日約左royce同強哥出旺角聚一聚舊，
佢地未黎前自己一個上去恆輝數碼睇相機仔。
係得恆輝咁慷慨放晒d DC仔出黎任人試，
千幾兩千蚊部野喎，你古買棵菜咩？
當然要渣上手試兩野d操作、手感、質素架啦。
平時去豐澤百老匯唔係無得試o既，要問d職員囉，
一路試一路比佢啤住，試多兩部當你運吉又黑面，
慌死你整壞佢部demo機咁，邊試得安心架。
DC仔論外型同質素Canon ixus系列係不二之選，
不過samsung ST550係唯一一部有前mon設計，
方便自拍，輕觸式按扭，渣上手都中規中舉，
定價約二千七算偏貴，其他機大約千零二千蚊炸。
同埋拍片果陣好似開唔到前mon，呢個有待證實。
上網睇過規格，拍片係mp4檔，我唔太鐘意呢個格式。
另外試過富士部半專機FinePix S200EXR，算係幾強橫，
都做到散景效果，當然要同單反d恆定大光圈比無得比，
當係一部插天涯鏡無得換o既D3000黎用囉(體積都似)，
當然又係有D80 o既我絕對唔會考慮呢部 XD

近日整理家居雜物，為騰空一點空間，把陳年舊物都丟掉。
雖說有點可惜，反正十年沒碰過的東西，就不信明年會拿出來用吧。
從抽屜裡翻出很多遊戲和遊戲機，都伴我走過童年的光陰。
雖然有點捨不得，還是鐵石心場丟掉...我認我不是一個好收藏家。

小學時，當年超任稱霸，差不多每個男同學也有，沒超任就沒話題，
超任的普及超任博士功不可沒，樓下商場遊戲店$8就得到一隻遊戲。
很適合當時小學生一天五元零用錢的經濟能力，
只要兩天不買零食就可享有一只遊戲。
如果不是有抄碟，小學生涯不知如何渡過。

超任過後的次世代機中第一部就是3DO，
當時可以播片及處理3D的遊戲技術令人嘆為觀止。
街霸是小學時期盛極一時的格鬥遊戲，
3DO就是唯一有SSFIIX的主機，(後來要PS2的集合版才有)
ROADRASH是隻瘋狂的電單車賽車作品，
可以電單車踐斃街上路人及用棒把對手擊落座駕，
第一隻這麼寫實的瘋狂遊戲叫人津津樂道。
當然，其後越來越多遊戲畫面及題材都有過之而無不及。

NEOGEO談不上是一台普及的家用機，但算是最長壽的一台，
它橫跨超任至PlayStation兩個世代，差不多至03年才退役。
SEGA多年推出不少遊戲機都屢戰屢敗，SATURN和DreamCast也是敗將，
以致SEGA退出家用機市場全力開發遊戲。
然後是PlayStation的世界，SONY盛世延伸至後繼機PlayStation2，
這時任天堂兩代主機N64、GameCube都處於下風，
直至它的手提機NDS推出才挽回不少面子。
到PlayStation3 SONY的王道才告一段落。

這些全是正版遊戲，新買時每隻約300元，這裡保守估計也三千多元。
那又如何？主機也壞掉了，還是要丟掉。

最後這些遊戲機的下場，就是在後樓梯一個垃圾桶裡......