之前睇過地海o既朋友都話呢套野唔好睇，睇過之後都覺得幾九唔答八。
一開始無端端就出現左條龍，之後無端端又話咩世界唔平衡，
跟住無端端個王子刺殺父王，然後個王子又無端端跟左個大叔浪跡天涯。
睇到呢度一頭霧水，諗住睇落去會慢慢交待一切啦。
王子係路上救左個女仔，個女仔又無端端好憎個王子，
之後又無端端出現左個巫婆，無端端呢個女仔又同個王子和好，
最後係行貨o既勇者鬥惡魔o既橋段，點知個女仔又無端端變左條龍。
想點呀大佬？f(=_=)套野其實想表達D乜架？
個王子又唔知點解要殺佢父王<--呢個劇情已經令人打交
又唔知點解要周圍走，一切都係出於「唔知」。
想話搵出世界唔平衡o既原因？咁關殺個巫婆咩事？
一開始果D橋段係咪多餘左D？其實果個係咪王子對個故事根本無影響。
個巫婆咁大o既堡壘得果幾個士兵，個女仔走入去完全無人阻攔。
估唔到宮崎俊系列都有咁無里頭o既作品...

客服營業時間係有心留難上班一族，你番工時佢開工，你放工時佢收工，
星期六日及公眾假期例休，唔係請假都好難可以拎部野去維修。
維修幾日之後又要請多日假去領取，絕對唔user friendly。
前前後後蝕兩日人工，分分鐘部野仲要整過千蚊，
衣家都仲未報價，睇下整幾錢，筆值低過一千我都會整，
唔整就比番100蚊檢查費，買部新o既相機好似canon ixus都係千幾蚊之嘛。

ps:RICOH個客服中心租D高級商業大廈，
大堂容納3個籃球場o既空間，升降機內有電視，
NIKON、CANON、SONY o既客服中心完全無得比。
客服中心之嘛，洗唔洗咁華麗呀？

真係一套超低能o既電影，相信咁o既故事橋段係for閃電傳真機個時段播放。
一開始搵幾件唔識講普通話o既蛋散扮少林方丈，好心佢啦，
搵真o既大陸人洗幾錢呀？d普通話講到咁嘔心好難令人相信佢唔係弱智喎，
仲話得高望重o既方丈？講番日文好過，再唔係配音都得姐，下話。
而個最後大佬o既目的更加係kai，純粹係想撩交打，
不過最尾柴崎幸K.O個大佬o既方法更加係kai爆！
唔整呢幕套野我最多話佢低能，未去到超低能。
唔係掛住周星馳o既大名做監制，的確唔會有一睇理由。
升字幕果陣先講主角果隊波點勁，點都要黎幾野少林足球式猛虎射球，
d氣勁唔係應該將d敵方球員o既衫扯爆晒咩？

ps:戲中柴崎幸飾演o既角色有d似我一位叫阿諮o既朋友 XD

好日都唔check email，一開就見到9月30號寄來o既GeoCities關閉最後通知，
當然，衣家先睇到係乜都做唔到。Yahoo o既野話摺就摺，
對上有Yahoo相簿，衣家有GeoCities，難保第時連Yahoo Vedio或Yahoo Blog都要摺。
都係穩陣起見將Yahoo Blog d野過落第二個server度好d，當買個保險。
所以衣家Qooza都用番Yahoo o既分類系統。 XD

我唔會浪費無工番o既日子，今日答船去長洲學踩單車。
答船開住手機o既收音機，大氣電波覆蓋成個海面全程都收得好清楚，
地鐵真係要撿討下啦，落隧道答船都聽到收音機靜係地鐵唔得。
一到步即刻租單車去踩，歷時四個鐘，kick爛褲腳、擦傷手腳，
總算學曉左，只係仲未控制得柔刃自如。
轉灣果方面都要有較大空間先轉到，仲未能入L灣。
其實長洲大部份路都唔適合我呢d初哥踩o既，周圍都係人，好易撞親人。
飲左兩大枝蒸餾水都無去過廁所，可見水份完全由汗線揮發，
惡鬥到五點，拖住疲憊o既身軀歸家，即刻訓教。
今日過得相當充實，係人生上又多一項技能，總算不枉此行。

ps:由中環碼頭踏3開出o既都係快船，踏9開出o既就係慢船，
由長洲碼頭踏8開出o既係快船，踏正開出o既係慢船，
下次真係要預番d時間去答快版，錯過左要等一個鐘之後先有得再答。