上季因為武肺疫情好似令動畫數量少左，
事實上我都無乜點睇，今季恢復番正常。
魔女之旅
被喻為魔法版奇諾之旅(其實我都無睇奇諾)
故事講女主學有所成後周遊列國所見所聞，
本來以為係輕鬆小品，但其實係相當腹黑！
頭兩集都無乜野，第3集就開始黎料，
講個國家人民比植物迷惑然後比植物食埋，
然後又講個女仔比人買番去做奴隸受性侵，
無畫畫畫出腸，只係見個女仔行出房後，
領主衣衫襤褸從後出房，暗示o岩o岩診完，
無人國o既王女仲癲，講女王將父王變怪物，
將全國人民殺晒，然後女王殺埋怪物父王，
原因係父王阻止佢同廚師相戀仲殺埋廚師，
所以報仇，第5集就無乜黑暗野歡樂渡過，
暫時只睇左5集，女主聰明亦幾有氣質，
好多主角都設定蠢蠢地1開始無乜自信果隻，
相對黎講呢種1開始就有氣質o既主角較少，
睇呢種人o既視覺其實都睇得幾舒服，
不過就見死不救相當無情，有評論護航話，
女主唔係萬能，見無辦法改變現狀只能著草，
有別於1般主角滿腔熱血乜都那屎上身。
成神之日
key社麻枝准繼charlotte後又1新作，
未出前d人笑言話肯定響中途會有場棒球賽，
點知第1集就出現啦，唔洗等第6第7隻 XD
故事講有個自稱奧丁o既女仔無所不知，
不過行為都幾弱智，遇上男主後幫佢溝女，
並且告知世界只剩番唔夠30日時間就末日，
跟住我都唔知會係點發展啦，救世丫？
定亦或繼續無聊日常等末日？睇左兩集。
站立於百萬生命之上
第1集尾段疑似女主就比怪物咬斷兩截死左，
不過呢套野設定上死左都可以30秒復活，
只要唔好全隊死晒就唔會死，人設還可，
定位有d模糊，以為係腹黑番點知又好胡鬧，
尤其之後打怪呢個死完果個又死，
畫面都懶得畫佢地點死，出慘叫聲就算數，
其實我覺得呢d有無限復活o既作品，
主角群係可以盡情出多d血腥獵奇演出，
個男主都好唔3唔4，又要描述佢好厭世，
應該好cool先係，但又要比佢頻頻出醜，
抽職業又要做農夫，轉職都只係個廚師，
又無乜戰鬥天份，分明就出黎搞笑，
不過金毛女幾靚，為睇佢追番未嚐不可。
無能力者nana
呢套又係腹黑作品，第1集最尾先揭露，
開頭係輕鬆校園番，間學校係專收能力者，
相傳每隔唔知幾多年就會有怪物來襲，
所以要訓練1班能力者去挺身對抗怪物，
但怪物之說可能係假o既，真正o既怪物，
就係果班能力者，佢地可能威脅世界，
所以幕後組織派nana去族1消滅d能力者，
nana自稱擁有讀心術，其實係假扮o既，
只靠佢觀人於微去猜出能力者o既諗法，
亦有少少色誘，引能力者去無人o既地方，
然後就殺死佢地，頭1話果個好似男主o既，
就係咁比nana殺左，雖然宣傳海報有佢，
唔排除遲d會番生有再出場o既機會？
另1個睇落好似無咁易領便當o既白髮男，
以為係銀魂個版田銀時客串(當然唔係)
nana只能靠智取，佢似乎無乜戰鬥力，
呢d太壞心場o既女主亦有少少令人反感。
熊熊勇闖異世界
又1套異世界開掛「熊」傲天，
睇左第1集最尾女主角帶住VR頭罩，
原來只係玩game，即刻感覺好兒戲，
都無乜心機睇落去，聽左yprchannel，
原來第1集係專登做到女主玩game咁，
第2集先交代佢比神(?)掟左入異世界，
嘛，其實分別不大，都係開掛番啦，
女主亦1副既來之則安之o既態度，
查實女主氣質顏值同魔女之旅差唔多，
只係佢所處o既世界無咁黑暗，
如果兩個女主交換應該反應無乜分別，
可惜o既係熊熊女主件裝備太kai啦，
扣左唔少分，撇除套衫唔會低分過魔女，
呢d衫間唔中著下OK，變固定型態就PK，
另外除左第1集打大蛇有戰鬥場面，
之後打好多怪都只係整個風景+效果音，
咁就當打完啦，同百萬生命1樣求其。
寒蟬鳴泣之時業
呢套係陳年舊作番新，不過唔係重製，
睇d評論話開頭都令觀眾以為重製版，
睇完第1集先知另1故事線(未動畫化過？)
我就未正式睇過寒蟬系列，好耐之前，
細貓向我極力推介，大概知道係d乜，
講雛見澤村受到咒咀，d人會發癲殺人，
之後又重置死人番生又忘記殺人o既事，
係咁loop，只係次次發癲o既人唔同，
大約係咁，係1套血腥獵奇作品，
睇評論都話如果未睇過前作睇呢套，
會睇到1頭霧水，我就試下睇下啦，
頭兩集都係日常歡樂番夾雜殺人訊息，
之後龍宮雷娜出手殺K1，但反被殺，
K1響醫院醒番，得知連梨花果d都死埋，
正想睇下呢班人點收科，到到下1集，
又重置番，個個若無其事去另1故事線，
其實咁樣落去應該沒完沒了都幾9唔答8，
梨花貌似知道真相，唔知有無得解救？
無o既話單純係睇d美少女點殺人同點死？
純粹官能刺激番？不過d女顏值比較1般，
當然唔計病發顏藝果d樣，平時都唔多靚，
可能係專登保持番十幾年前果種畫風？
d聲優似係較年長o既可能係當年原班人馬，
睇K1個配音係保志，係上1代前輩級聲優，
尤其個金毛女護士完全係大媽聲線，
netflix似乎有得睇番舊版o既動畫。
以上部份幾套有官方授權(正版)渠道觀看，
百萬生命上同寒蟬業響ani-one youtube，
無能力者nana、魔女之旅、熊熊響木綿花，
不過睇緊途中就要忍受強行插入o既廣告，
買左youtube premium可能無掛？
|
