玩左咁多RO打到o既卡之中呢張係最貴果張！
話晒都係紅框王卡，雖然卡片實際功效低，
但必定比小怪卡難量產，因為係副本王，
1個角色1日只能打1次，除非練幾廿隻角色，
每隻角色每日都打1次啦，先1日幾廿次機會。

可惜丫，呢張卡之上仲有1張覺醒暗答卡，
顯得呢張卡只係次貨，上85網查過價，
呢張卡只係值千零蚊，其實都算貴架啦，
打張卡賺過千喎，不過前日精煉蝕兩千呢，
所以都唔算有橫財，只係令前日無蝕咁多，
我又唔賣o既，始終第1次打到o既紅框王卡，
有少少唔捨得賣，想收藏留念，或者過排先，
就算賣可能都將佢換R幣，自用就實唔會架啦，
插左落裝備又要王水，係插都插覺醒版啦，
順帶1提，覺醒暗答都只係大約3千幾。

打到果刻，1時反應唔切，其實應該開錄像，
將呢個上廣時刻拍低做vedio，唔係淨係cap圖，
反正個副本得我1條友單刷，唔會有其他人搶，
總算有幾個人開廣666我，仲有1個密我添，
反應唔算好熱烈，算係咁啦。

對上1兩次打到「所謂」o既王卡上廣係戰死，
有打過暗妖術同埋暗魅影卡，無人666架。

其實我又唔係果d每日都打1場古副o既人，
之前幾個月夾埋都可能打唔夠幾次，
係最近呢排打多左少少，1個禮拜都打1兩次，
而且打密左o既次數加埋都未夠5次，
我識有d人係半年黎每日都打1場風雨不改，
所以話係你就係你架啦，唔係o既日日打都無。

喜悅係有，但唔大，可能唔係72或魔劍卡掛？
真係無特別開心囉，相比3000P倒落咸水海，
100個鐵祝全軍覆末慶到唔知講左幾多次粗口，
所以我唔鐘意賭博，因為輸果份激氣感，
遠遠超過贏o既喜悅，只係超時空頭綁帳號，
遲d+12果下局住唔賭唔得，等出左糧先啦。

尋日就精煉地獄，今日再買5000點mycard點數，
再精過，1開始買105個鐵祝26個高密度鈣，
跟住用側錄程式錄影，唔可以用內建錄像系統，
因為個精煉介面同埋特效係唔會錄到落去。

26次，都係唔能夠將+10精到上+11，痴孖根！
計埋尋日3000點，已經用左超過200粒鐵祝，
即係精左50次以上都仲係上唔到，計埋+9卷，
已經超過左+11防卷o既價錢，仲有2000P，
唉，都精埋佢啦，失敗左好多次之後總算+11，
所以話，千其唔好心存僥倖以為可以慳番D錢，
蝕到入肉呀！下次直接買+11卷啦！
唔計+9卷o既錢，剩係+10到+11都用左2千蚊！
買張+11防卷都只不過係千2千3蚊炸，陰公。

anyway啦，上左11總算叫做止蝕，蝕係蝕左，
但起碼都有教好訓啦，唔似得尋晚咁chok住，
+11之後果然龍火連噴順晒，即刻打個古副，
雖然無話勁左好多，但紫綠腐屍惡靈1發秒，
係後面暗屬幽弓劍深淵血腥都係要噴多幾下。

但惡夢仲未結束，仲要上埋+12先可以告1段落，
我諗住入夠1萬P先開始衝+12，每次要8粒鐵祝，
成本比+10上+11仲要高多1倍，諗起都煩。

放完新年假後尋日係第1日正式番公司工作，
即係朝早10點打卡放工7點後打卡果隻，
呢個變動係老闆響星期1視像會議公佈o既，
因為近幾日香港o既武漢肺炎疫情緩和落黎，
確診數字維持個位數，前幾日仲單日0確診。

雖然果日0確診有d唔相信，似係官方做假數，
但理性分析後，以香港目前o既資訊自由度，
要做假仲有少少難度，即係假如果日有人確診，
而政府宣佈0，確診條友應該會上社交媒體唱，
然後好快就比連登仔大造文章街知巷聞，
除非比左掩口費或確診者係唔識上網o既長者，
話雖如此，但個人認為現階段未能放下戒心，
最起碼限聚令仲未結束，食市仲封緊部份檯位，
人人仍然帶口罩出街，無必要急不及待復工，
touch wood講句，到51大6解封大量6客落黎，
可能再爆發另1波，到時又再home office過？
起碼等全世界解封晒1個月內0個案先復得工，
唉，不過果d做老闆o既人又點會咁諗丫？

平時呢我個人都幾自私o既，係希望打風黑雨，
可以放1日半日假，果種唔係小確幸係大確幸！
但呢個武肺疫情真心希望快d結束恢復番正常，
我寧願如常番工都唔希望呢個疫情持續！

痴線價！switch比人炒貴晒，去穌寧問要3380，
上個星期去屋企最近o既商場問，豐澤賣晒，
百老匯因為門口有人拎探熱槍所以無入去問，
(之前講過唔係得發哥先好憎比人用槍指住個頭)
同商場另1間賣玩具精品o既舖頭亦都賣晒，
明明部野建議零售價大約2千幾，家下貴左過千，
仲要大型連鎖電店都要玩炒價，有無咁好賣呀？

近期動物森友會爆紅，facebook比人勁洗版，
friend list好多朋友莫名其妙入埋坑，
手遊版出左兩年營運至今又唔見佢地玩？
起碼我到衣家仲有keep住玩手機版動森先啦，
其實我都諗住買，不過部野炒到咁貴，唔啦。

由於武肺肆虐好多人都唔出門留響屋企打機，
所以帶動左switch銷量，比人搶購甚至炒賣，
除左動森，仲有ringfit都係好受歡迎，
尤其無得出街做運動，響屋企都可以keep fit。

本來諗switch呢d炒價過1排就會回落架啦，
game就容易啦，可以買download版唔會炒到，
但係亦因為武肺疫情導致switch生產工場停工，
老任話無辦法趕貨，錯失擴張市場佔有率時機，
睇黎響貨源不足o既情況下，部野有排貴啦。

switch版動森主要都係勁在DIY功能，
可以自己畫(?)件衫、地版、牆紙等，
唔少人整左林鄭個樣放地下係咁用捕蟲網打，
有d人整光復香港牆紙，有d整領導人o既花牌，
呢d涉及政治o既惡搞玩法多不聲數，
就係因為咁，國內將呢隻game下架，
本來老任應該發大財，點知食唔到大6市場，
又再1次錯失擴張市場佔有率o既機會啦，
真係多得港台玩家唔少啦，國內玩家無得玩，
不過仲好啦，如果上面都搶購埋實炒得更貴！
而且老任都唔夠貨，唔下架都無機賣啦。

發哥有句明言「我最憎人用枝槍指住我個頭！」
唔係淨係發哥專利，我都好憎架！當我係乜呀？
之前見百老匯門口有職員渣住探熱槍我就唔入，
唔係有發燒身有屎，單純好討厭呢種感覺姐。

最近連麥當勞都有槍手守門，唔好話堂食，
連外賣都唔想買，但係早幾日落茶餐廳食個飯，
入到去搵位坐低左，就見職員渣住槍行埋黎，
呢下估佢唔到，唔響門口check入到去先check，
咁人生第1次比人用槍指頭就衰左響呢間茶記，
門口有就話唔入姐，都坐低左唔通起身走人咩？
當然啦，探完熱o既結果係無問題正常用餐。

公司早兩個月出糧係直接過數去我戶口，
點知今個月又話要番去拎支票喎，唉，
早排公司都下令每個入門o既員工都要探熱，
然後用手機影探熱槍顯示o既度數貼上群組，
第1次比左茶記，第2次就係公司啦，
拎完支票去埋銀行入數，跟住唔爭在啦，
去食個麥記，又再1次比人用槍指個頭啦。