個夢係同洋子去餐廳食飯，果日好似係洋子生日，
同檯食飯果陣仲有佢男友(?)都坐響隔離，
然後我就全程用講得唔流利o既日文黎同佢傾計，
佢係用番中文答番我。

其實現實我連洋子咩野樣都無乜印象，
夢入面當然係無見到佢個樣，只知道果個係洋子，
佢o既日文係勁到可以響日本同人交流到，
如果佢真係用日文回應我可能都無辦法傾落去 XD
不過夢醒果刻我都仲記得我用d日文文法係正確，
只係唔多流利姐，應該講得好過我真人少少(?)
我都好耐無操過日文啦。

至於呢1日當然唔係洋子生日啦，完全無關聯，
我10年來都無同呢個人見面，連網上傾都少，
最多間中like下佢d文，算係唔係好熟o既網友，
佢有無男朋友我亦唔清楚，點解會夢到佢？
我都覺得真係幾9唔答8。 XD

不嬲都無睇開電視，通常都係亞媽響度先會開，
我最多只係路過望兩眼果隻，topic係兩個節目，
東張西望係1個講下城中熱話或娛樂圈o既節目，
例如講下有個亞婆每日拎d食物餵流浪老鼠，
又或者訪問謝金鈴賣帽，介紹新o既公共設施等，
以前都有今日睇真D、城市追擊之類o既節目，
我覺得電視台係需要有呢d知訊性節目，
尤其比d唔識上網o既長者睇，但係最近o既題材，
居然係介絕佢地個台o既電視劇集金宵大廈？
仲要唔止1次，我呢d無乜睇開o既都見到兩3次啦，
喂，唔係無野講到要幫個劇賣廣告呀fa？
尤其近幾個月修例風波，大把野可以講啦下話？
咁多事發生，咁又係o既，講黃絲唔o岩又比人投訴，
以佢地個台立場講藍絲果邊唔o岩駁炒咩？
應該講o既唔講，無必要講o既就拎黎攝時間，
anyway，其實金宵大廈我1集都無睇過。

老闆話部電腦用3萬蚊砌出黎，咁事實係幾快幾穩定，
不過較早前photoshop就出現開耐左有delay問題，
好明顯下，只要用鋼筆工具快速咁求其點幾野就見到，
會見到點完後隔0.5秒出下1個point再隔0.5秒出下1個，
相當影響工作，正常情況係點完幾點d point同步出晒，
好在只要重開photoshop就解決到，再delay再重開咁，
開photoshop都係幾秒o既事，問題不大。

幾個月前Gloria響度果陣有時比佢坐我位用我部機砌稿，
佢話佢唔熟mac機要用PC，又唔識用倉頡輸入要用速成，
就響我部機整左速成，但佢無做之後我都移除唔到速成，
唔係唔識得響邊度移除，而係次次入到語言偏好設定時，
set輸入法個位會不斷loading load極都出唔到黎，
所以部機1直有倉頡同速成，本來唔切換去速成係無影響，
但操作輸件時經常都o禁到切換輸入法個指令ctrl+shift，
save as就ctrl+shift+s，物件跳到最上層ctrl+shift+]，
所以經常無啦啦變左速成，1打字果陣又出唔到想要o既字，
雖然可以o禁多下ctrl+shift換番倉頡但經常都要多此1舉，
即使影響唔大，但本來明明就無架喎，多樣野好煩架嘛，
直到今日，見到下面行bar輸入法個位唔同左(去左前面)
咁就試下會唔會改得番個設定啦，入到去真係改得到呀！
困擾左幾個月o既問題突然解決左！開心！

點解幾個用都解決唔到今日解決到？實際原因我唔知，
又無windows update d乜，不過部電腦有少少唔同o既，
就係換左mouse，原先用開個mouse上星期開始壞壞地，
單click變double click，所以買個個新o既換左佢，
因為換果陣好似拎錯左keybroad個USB插頭，
再插番果陣亦插左第2個USB位，呢個係同平時最大分別，
唔知關唔關事，理論上應該唔關事o既。

呢排認真禍不單行，3月壞抽氣扇，
兩個禮拜前先壞完冷氣機滴水，
衣家輪到壞熱水爐，臨到夏天先壞呢d野！

其實前幾日熄左熱水爐個電源掣，就出事啦，
話說果個電源掣係幾年都長開無熄過，
只係兩個月前整抽氣扇以為個師父會熄總掣，
所以熄左1陣，點知原來佢唔熄總掣都照整，
諗住衣排開始養成熄熱水爐電掣o既習慣，
點知熄第2次就壞左。

上星期4朝早起身聽到廚房傳來奇怪o既必必聲，
走過去睇，係熱水爐自動又開又山發出o既響聲，
有時仲連續必幾下好頻密，熄左個電源掣，
再開番都係咁，壞呢d點可以安心沖涼呀？

其實個熱水爐打從買番黎個衡溫系統就有問題，
1係就d水熱到辣手，1係就無熱水出凍水，
唔係太熱就太凍無個中間位，要開水龍放住d水，
先至可以調較到適中o既水溫，幾年黎1直係咁，
都想換好耐架啦，諗住等流動儲備再多d就換左佢，
點知衣家壞d無可忍受o既野，唔換唔得。

呢次買部4800蚊(亞媽出)又係未聽過o既德國品牌，
本來部野標價5800蚊架，個店員平1千蚊比我，
見係咁就買啦，唔係就買左部3700蚊o既日本牌子。

今日安裝完，試用之下，都係有之前個衡溫問題，
d水唔係太熱就係太凍，1部又係咁兩部又係咁，
不過呢部好似好d，水龍頭可以放少d水都適溫到，
但係都係要1邊放水1邊沖囉，唔可以就咁開黎沖。

中美貿易戰已經打左1排，不過雙方停戰90日，
但係早幾日特朗普突然宣佈加徵中國關稅，
呢獲可能又令人民幣跌價，之前都試過咁樣，
只要人民幣跌先制衡關稅o既加幅打番個和。

本來唔關我事，但係我就係有個人民幣戶口！
其實都唔係我開o既，係親戚將d錢放響果度，
只係帳戶係我個名，但人民幣跌仍然係心痛，
點解響停戰期間唔果斷將d錢轉晒做港幣先呢？
雖然唔係咩野大數目，都等同我幾個月糧架。

身邊d朋友都覺得人民幣唔會點跌，
甚至覺得遲早會升番，唔洗急住放，
呢d講法亦係令我無轉番做港幣o既原因之1，
明明我又唔係專家亦無咁好心機經常去銀行，
真係唔想玩外幣，如果再有出現停戰期之類，
呢次我肯定要將人民幣換晒做港幣唔傾！
就算之後人民幣會升番我都無所謂，
總好過衣家跌要勞氣，唔玩就乜都唔洗煩。