既然買左部靚投影機，當然要諗計令電腦方便駁落去，
最基本就係插hdmi線，不過咁樣就唔叫方便，
條線亦都無咁長，部surface pro3都想output，
有左chrome cast就可以解決到以上問題啦！

chrome cast係google間公司出o既串流螢幕輸出工具，
細細舊野，1邊係hdmi線，另1邊係插type c頭供電，
樓下間電腦舖賣350蚊，旺角電腦中心賣300蚊，
不過都響旺電問左好多間先搵到間有，其他都話賣晒，
因為佢地衣家賣緊chrome cast ultra要700蚊，
問過ultra係乜，係加強版，網速快d支援4K傳輸，
我連普通版都未試過唔想1黎就買貴1倍o既ultra版。

番到去要插響mon/電視setup，因為部野無任何掣o禁，
插左之後螢幕會顯示指示介面，教你step by step做，
雖然唔算複雜但都比想像中複雜，要用手機裝個apps，
叫chrome home，然後響手機入個wifi password，
跟住又要等佢唔知update乜定load乜load成幾分鐘。

setup完啦，就即刻試下，用電腦開chrome選投放，
真係將個chrome入面個畫面output出黎喎，
然後又試用佢黎播愛奇藝d劇(主要係亞媽想睇)
發現有d問題，經常播播下疾1秒左右，唔算嚴重，
但係唔理想，好在連續播幾集劇都無正式斷線，
我係用surface播愛奇藝o既，唔知關唔關部機事。

又試播netflix，呢次用番大電腦播，全程無疾過！
畫質比愛奇藝清好多，再試播facebook d片，
1樣係無疾過，係咪部野夠力？定係個網站夠力？
既然播netflix都有咁高質素，咁仲洗乜買ultra？

chrome cast雖然方便，但只係出到chrome入面o既野，
即係想用佢當電腦mon用黎打機或photoshop應該唔得！
可能有方法啦暫時未搵到？至於睇mp4片呢？得o既，
只要將個mp4拉落chrome播放就得，download左d片，
都可以用呢個方法播到。

部chrome cast同部投影機相性好夾，
因為部投影機後有得插hdmi同埋USB，
所以chrome全部野插晒落投影機都運作到，
唔洗搞到d線咁亂。

久違左兩年o既冬天呀，無錯，係兩年呀！
上年全年都夏天，所謂o既冬天我都係著夏天衫，
已經忘記左冰冷o既手摸落塊面果種感覺，
已經忘記左開大坐落塊廁所版果種壓力，
仲有番到屋企無出汗o既方便，呢d先係冬天丫嘛！

上個禮拜買左部投影機，應該要享受響被竇睇片，
但好衰唔衰呢個禮拜差唔多晚晚都要OT！
放工番屋企無晒私人時間直接訓教第朝又番工，
連禮拜6今日都要番工加班，真係唔係時侯！
點解唔比我好好咁享受1下冬天o既假期呀？
天文台又話下星期1會回暖，錯過呢幾日冬天，
又唔知會唔會好似上年咁變番夏天？

PS：目前都未開暖爐，出門只係著多件風褸，
熱果陣除左佢可以綁響腰間進可攻退可守，
唔係好敢著有帽衛衣驚出汗又唔方便除衫，
仲未去到好嚴寒o既。

既然買左部靚投影機，當然要有好野播先唔浪費啦，
netflix近年來都幾盛行，我知道主要係睇美劇，
不過上佢官網根本睇唔到有d咩野片可以睇！
就算注冊左做會員都係無野睇，1定要你比左錢先，
先可以入到去睇有咩野片可以睇。

對我呢個動漫迷黎講，netflix就無乜新番作品，
最新o既應該算係盾勇、紫羅蘭花園、約定夢幻島、
fate apocrypha、fate extra、帶手機闖異世界等，
然後好多都係舊番，有返叛路路修、終結熾天使、
甲鐵城卡巴內里、心靈判官、another、鋼鍊...
想睇新番就唔洗諗啦，連搜尋one piece，
佢居然出個naruto，連呢d國民作品都可以無？

電影方面亦唔會好新，首頁連星爺d功夫都擺出黎，
無線重播都播到爛晒啦，可想而知亦唔洗期望。

我又唔睇開美劇o既所以對呢方面無乜評價，
不過netflix賣點係佢地自家製作o既作品，
例如A.I.C.O、新世紀涉谷戰呢d，有個紅色N字。

電視100寸要幾多錢？應該都要5位數甚至6位數，
但要同等視覺享受o既投影機只係幾千蚊就有部！
仲要可以唔止100寸，總之你度牆有幾大就有幾大！
我保守估計150寸都有，識玩，肯定係玩投影機！

其實我1直以黎都誤會左投影機o既質素，
以為肯定唔夠電視清同鮮艷，要射落專用白色幕，
而去親電器舖都無乜人會display投影機，
就算有，都只會係濛查查，睇落都唔多開胃，
原來唔係架！只要熄左燈，質素等同高清電視！
電器舖都好光猛，所以發揮唔到投影機真正實力，
職員亦唔會為左示範比你睇而暫時熄1熄燈，
同埋唔洗專用幕，只要有度白色牆就可以，
部野輕巧，自由度高，可以響房播又得響廳亦得，
甚至我試過射上天花版都無問題，訓響床睇都得！

當初只係本住買個方便播野o既投影機心態，
無乜要求過質素，總之睇到唔好太濛我就OK，
第1次播映果陣比佢o既清晰度同鮮艷度嚇親！
哇！乜原來可以去到咁o既質素？仲可以放到咁大！
試過投影機，番唔到轉頭，我諗唔會再買電視，
唯1缺點真係日頭唔用得囉，或者要用不透光窗簾，
遮晒d窗口光，咁屋企就任何時侯都係私人映院。

我唔幫部野賣廣告啦所以唔開牌子名，部野4300蚊，
有埋喇叭，行android系統類似小米盒咁，內建wifi，
可以安裝d睇劇apps唔洗另外插播放器獨立運作都得，
佢裡面都預載左youtube個apps，已經可以直接睇片，
size應該同任天堂以前果部gamecube咁上下大啦，
支援ios果個營幕輸出功能無線插放，當然亦有hdmi，
麻雀雖小，5臟俱全，咁o既價錢有咁o既質素，
我覺得性價比爆燈！可能係大6牌子先有咁o既CP值，
d大6電子產品通常都係乜野功能都塞晒入去架嘛，
我買之前有查過其他大牌投影機例如epson、acer果d，
正常都要7千蚊部，相信亦無內建android呢d玩法，
再上去就要過萬蚊，唔知咩質素啦，無人示範實物，
不過有個好癲可以播到3D，帶戲院果d眼鏡睇果隻，
遲d有錢d都真係要買番部擺屋企爽下。

基本上齋講播放功能係無可挑剔，不過佢個android呢，
就真係虧虧地，又安裝唔到apps啦(目前未試過安裝到)
個remote有類似滑鼠o既cusor功能經常用用下唔見左，
係好令人火滾！亦多次無啦啦熄左機reboot，
相當唔穩定，不過算啦，果d當係額外功能，
我本來只係想買部野可以插hdmi播放就夠用啦。

算係夏番之中o既蒼海遺珠，無乜人氣，
少有o既題材講美國刑警同搭檔o既故事，
就咁聽呢個描述應該吸引唔到動漫迷，
但佢係玩粗礦大叔配萌系傲嬌蘿莉，
呢個玩法相當新鮮，類似o既玩法都有o既，
fate/apocrypha小莫o既master就係大叔，
不過太中2病，cop craft就走寫實風格，
但係都有加入異世界、魔法等科幻元素，
睇慣王道作品睇下呢套係耳目1新o既感覺。

當初接觸呢套作品只係抱住試下睇1集咁，
完全無認知，但就比佢o既另類風吸引到，
當然最重要係可愛o既女主角啦，
試下整佢原本果兩個大叔做搭檔丫，
我諗最多睇完1話就棄番。

主角圭的場係美國刑警(但d人好似係日本名)
同佢合作4年o既partner響1單案件中喪命，
佢上頭就安排個新o既搭檔比佢，
就係來自異世界o既蘿莉女主角緹拉娜，
兩個開頭都火星撞地球唔妥對方但被迫合作，
圭雖然黑口黑面但其實心地唔差，
隨住相處耐左兩人建立起信任，
睇佢地由亙相討厭變相愛都係1種期待，
暫時睇到第8集，唔知佢地會唔會修成正果啦。

故事就圍繞住1d同異世界有關o既魔法罪案，
例如販賣妖精，操控死者犯案o既法術，
總之呢d超自然o既案件就自動搵上主角，
想睇佢地偵查1d普通o既案件都唔得。

或者緹拉娜對好多後宮番作品黎講係普通貨色，
不過響cop craft世界觀就相當鶴立雞群，
本來已經係異世界外幫人o既身份，仲有戰鬥能力，
而作品除左d麻甩佬外就係d著高爭鞋o既風韻女人，
就算同為異世界o既其他女角亦唔見有呢種蘿莉氣質，
所以緹拉娜好搶鏡，成為作品o既焦點，
不得不吐糟o既係佢有時戰鬥前會變身，
但變身造型令我諗起黃飛鴻電影o既白連教主 XD
做乜整到唱大戲果d咁？本來紅色民族服裝咪幾好睇，
又其實變身o既意義唔大，唔變身1樣打得變黎做乜？

覺得又係異世界又係後宮番了無新意o既朋友，
誠意推介睇呢套cop craft！保證別有1番風味。