前幾日壞左抽氣扇，呢幾日都有問下行程，
大約知道價位，本來都諗住剩買機自己裝，
不過考慮到有玻璃膠箱實同埋駁電線，
呢d錢米慳啦，比多兩3舊搵人上門安裝啦。

就咁搵屋企樓下街市o既水電工程舖買扇連安裝，
今日買今日即刻裝，唔洗就時間，非常好，
買左個panasonic有防風電閘o既連安裝650蚊，
無防風電閘果d再平d，爭得果百零蚊豪比佢啦，
之前經常覺得開左抽氣扇d風力推唔開塊閘，
可能因為塞左d塵搞到個閘好實唔易推開，
咁抽d氣撞落度閘門又番番轉頭等於白開？
又或者熄左個抽氣扇但個閘無拍番落黎，
經常要我拎枝地拖棍隊1隊個閘門手動落閘，
更加驚有時出門開山門果下對流將個閘推開左，
開住個閘即係比個空位d蚊蟲飛入屋，幾煩下，
所以想試下電閘係唔係咁堅。

普偏黎講抽氣扇得兩隻size，1係8寸1係10寸，
總之就1大1細，我目測屋企果個就係細果隻，
但驚買錯，所以專登搵拉尺度清楚再影埋相，
電視機或電腦mon個尺寸係打斜度，我打斜1度，
咦喂？15寸喎，打橫再度都11寸喎，有咁大咩？
買果陣比張相個店員睇佢話我果個係8寸，
之所以度出11寸/15寸係因為個寸數係計扇葉，
頂，居然係用入面塊葉黎做標準？！

安裝o既師父推左1車架生黎，比想像中大陣丈，
開工前我問係唔係要幫佢山左個總掣佢話唔洗，
下？唔怕電親？佢話只要個抽氣扇掣無開著就得，
哇，比著我就唔敢，熄左總掣我都驚仲有電果隻，
佢好熟手用介刀介開d玻璃膠將個舊扇拆落黎，
過程唔洗1分鐘，比著我可能半日都未拆到d膠，
然後安裝，拆左新扇個插穌，將d線駁番落供電位，
我睇完佢整之後比我想像中複雜，好在無自己裝，
唔係應該卡關卡到跳掣都似，呢d安裝費抵比！

試開扇，原來後面度閘係慢慢升起唔係1野推出去，
熄電掣果陣就真係1野拍番落去。

抽氣扇個面蓋係可以拆出黎唔洗用螺絲批，
方法係用力向下壓然後響個底拉出黎，
其他抽氣扇應該都係方法相同，以前唔知，
以為有螺絲轉實晒。

同場加映，屋企個熱水爐打從day1開始都規規地，
d水唔係太熱就太凍，下下要開住洗手盤水侯先正常，
想換左佢好耐，頭先去睇過d價錢都要4千幾蚊，
等流動資金再充足d實換左佢。

全日出街無出汗，響屋企唔出汗都無咁難，
因為以我o既步速行長路係好容易出汗，
平時由屋企步行番公司通常1半路程就出汗，
今日答車出上環D100站買網台節目，
然後再番舊居食住家飯，再番番新居屋企，
居然無出過汗，尤其回程巴士落車個位，
步行到番屋企同屋企步行番公司差唔多遠，
而我今日仲係著住件長袖衫(雖然好薄)

睇番iphone跟機個天氣apps其實都係18~20度，
點解之前好似13~16度都出汗，衣家反而度無？
其實呢個禮拜都係18~20度但無乜點出汗，
除左長期天陰陰(前兩日仲落好大雨添)之外，
仲有乜野唔同？唔知關唔關我飲食習慣事？
呢排無乜食早餐，最多番到公司咬下d零食，
以前日日番工前總會食個麥記3號餐，
唔3號都豬柳蛋漢堡餐加薯餅，再唔係燒賣，
會唔會食少個早餐少左熱量無咁易出汗？
有待進1步觀察。

上星期都仲係南洋咖喱，今日拜終於轉番普通咖喱啦！
等左好耐啦，個南洋咖喱上架左應該有1年甚至以上，
咁耐以黎我都只係食過兩次咁大把，因為好腥唔好食，
第1次食就已經負評，再比多次機會食多次都係唔得，
但係就遲遲都唔下架，長期都仲係南洋咖喱。

咁佢個普通咖喱有乜特別？無乜特別，就只係好味，
相對於大快活、甚至其他茶餐廳o既咖喱黎講，
大家樂果隻咖喱算係相當好食架，再配魚柳1流！
以上講緊o既比較係間間都唔同味，分得出o既，
咁有無比大家樂果隻好食？有，土司工房仲正d，
拿，土司工房果d就真係南洋啦，但1d都唔腥，
再配上浸到軟林林輕輕用利1頂就散o既雞翼，
仲正，不過土司工房唔多順路，大家樂容易食d。

受同事邀請去戲院睇呢套龍珠劇場版電影，
其實對上1次睇龍珠應該係龍珠GT，
果陣只係睇左頭幾話VCD就無再追落去，
我當然唔係龍珠迷，鳥山明畫風亦唔係我杯茶，
不過又對龍珠唔反感，只係唔會專登去睇果隻，
有人邀約喎，咪睇下囉，就係咁。

本身佢係想約我去睇4DX版本，我話米搞，
1路睇1路震係咁騷擾邊能夠專心睇個故事？
結果佢禮拜日自己同老豆睇左4DX版，
問佢有乜感想，佢話正，1打交就會震，
不過係悟空同布羅尼打緊交佢震喎，
比人打果個係悟空又唔係你，震乜鬼？
除非第1身視點就話姐，人地打交關你乜事？
接受唔到囉，而個同事係再陪我睇多次2D版。

太耐無接觸龍珠中間甩晒，衣家都唔知超西幾，
已經去到紅色頭髮又藍色頭髮都唔知邊個勁d，
或者係太耐無睇，衣家睇番覺得劇情好白痴，
莊子搵7粒龍珠只係為左後生5年，
菲利搵7粒龍珠只係為左高多5cm，
點呀？呢d設定擺明比小朋友睇架喎，
不過果d打到甩頭噴晒血咁暴力又唔係兒童向，
而悟空d對白又係弱智，佢變番細路就話姐，
咁大個人做埋老豆孫(悟天)都有埋仲講kai野？
反而比達、笛子魔童果d比較正常，
明明以前睇TVB播果陣都唔覺悟空咁低能。

人大左，睇野經常都以理性角度出發，
所以睇龍珠勁多吐糟位，唔係講科學係講羅輯，
喂，你班友放個波就炸左座山甚至打爆星球，
但用肉身食波餅都無事，反而布羅尼捉住悟空，
將佢撻落地下就搞到悟空受傷件衫爛埋？
個地下只係凹左同裂左少少，唔係穿落地核，
呢d咪就係唔合理唔合羅輯囉！

因為之前吹得太勁，放個波炸爆地球果d呢，
衣家變超西又紅髮藍髮都麻木晒亦睇唔出有勁到，
響我眼中單純只係外觀唔同，變唔變身都無分別，
亦睇唔出由弱變強o既進化，之前地球都爆到，
呢次連個島都無毀到，係唔係down grade左？

其實呢套野好多劇情都係好kai好多違和感，
唔係動畫就kai，起碼我睇開果d都無呢種違和感，
例如果兩個菲利手下Call神龍出黎為左送走布羅尼，
然後菲利要殺果兩條友比格古洛阻止1下就放棄，
呢d完全唔符合人性，除非你話非利唔係人啦，
整體黎講果個世界d人做事都唔經大腦(其實係編劇)
果d懶好笑o既笑位例如增高5cm果d全場又無人笑。

又講下作畫，以今時今日o既動畫技術黎講，
呢套劇場版水準連d普通季番o既動畫都不如，
唔講畫風，上色、光學表現都仲停留響80年代，
亦會睇到突然線條粗糙o既瘕痴，係有度冰山3D位，
果度算係全套戲最精細o既，但同套野畫風唔夾。

反正都寫明含劇透，就係咁2交代下故事啦，
講悟空未出世前o既撒亞人星球比菲利統治緊，
比達老豆係國王，佢以為佢個仔係百年1遇o既奇才，
點知有個布羅尼更有潛力，比達老豆唔抵得，
將布羅尼流放去垃圾星球度，布羅尼老豆亦跟埋去，
然後菲利都怕撒亞人威脅到自已就炸爆撒亞星球，
咁o岩比達派左去第d星球出差，悟空老豆估到菲利，
送左個仔去地球，呢度交代番40年前悟空o既身世，
然後就到布羅尼大個左比菲利o既手下發現，
派佢去打悟空，布羅尼老豆又想個仔報仇做低比達，
跟住就打打打打到完場，最尾就係頭先提及咁，
菲利o既手下用左龍珠送走布羅尼番去垃圾星球，
係為左保護布羅尼免被格古洛殺死，
然後果兩個手下亦飛埋去布羅尼果度同佢1齊生活，
悟空用瞬移飛去佢地度送d生活物資過佢地洗，完。

雖然無乜睇開龍珠，但查實布羅尼唔係咩野新鮮人，
廿年前超任隻超武鬥傳就已經有得用布羅尼，
咁即係話其實布羅尼之前就有同悟空佢地打過啦？
咁點解悟空好似第1次見呢條友唔識得佢咁樣？
據我同事話係重設劇情，之前個布羅尼已經死左，
下？d人死左又可以復活，復活完再死又再復活，
再唔係故事reset埋都仲得，咁你講晒啦？
仲有乜野唔得姐？

對上1對防水鞋係兩年前(2017年5月)入手，
其實上年已經破防，只係1直頂到過左雨季，
到到尋日先再買1對新o既防水鞋，
牌子同樣係Columbia，不過唔係響專門店買，
而係響馬拉松買，同個同事放工去鄰近商場買，
其實我無乜揀過，求其walk in見順眼就扑錘，
最初我見順眼o既係另1對，但同事話呢對靚d，
雖然我唔覺，但我都求其買同事建議果對，
1向對鞋無要求，覺得鞋佔全身最唔起眼o既部位，
唔計個頭，件衫佔大半條褲佔1半，鞋頂盡5份1，
總之男人老狗唔著d露腳指o既鞋就唔影響市容。

對鞋標價接近千3但實收唔過千2，
初著覺得鞋底中間位頂起左少少鞋頭唔掂地，
普通行路無乜野，落樓梯感覺少少唔慣，
不過著耐左就好快適應覺得無左回事。

黎緊就快雨季，應該好快派上用場，
呢次諗住好天果陣著番舊鞋，落雨天先著新鞋，
又睇下呢對新鞋可以頂到幾耐破防？