繼上星期開始再接觸番砌模型之後，
尋日放工後再出旺角買多盒黎玩，
今次去階旺，呢個商場模型o既比例佔90%，
比信和更專精，信和仲有賣game、漫畫、精品等，
模型頂多佔40%，上網亦睇左壽屋系列o既資料，
呢次比較有目的咁去搵，點知搵晒幾層，
我想要果系列o既模型好似稀有品種咁，
10間9間都無賣，有賣o既都係得兩3盒款式唔多，
高達同不可動公仔就多啦，點解壽屋咁少？

上網睇中左MD系列朱羅忍者限定版影衣，
其實半年前就響網上見過朱羅(原版)就覺得勁型，
電腦亦有save低d圖片，果陣當然唔知係乜啦，
亦無深究，單純收藏幾張相當擁有就算(?)
咁衣家既然叉左半隻腳入坑當然打算買啦，
居然響階旺到間有賣呢個朱羅忍者限定版！
影衣o既顏色係比原版更有魅力，更令我心動，
但1問之下佢要綁埋弓兵兩隻1齊買要800蚊，
其實都唔係咩大銀碼，只係入門唔想1買買兩盒，
再者對隻弓兵無乜feel，我只鐘意隻忍者，
所以放棄，只係響果間買左隻FAG紅魔鷲就算，
雖然唔係我最想要，不過FAG系列周圍好難搵，
有就買下，嫌之前o既Architect面部無黎精神，
起碼可以換魔鷲o既神氣表情都唔錯，
但睇真d先知呢隻紅版表情得奸笑、怒叫、
同埋被欺凌(?)樣，並唔係想要o既表情......
間野仲有隻朱羅忍者蒼衣版，都有少少想買，
但考慮到蒼衣o既顏色太kai無氣勢，無買到。

巡例行埋信和，點知發現有間有賣影衣！
仲係單獨賣488蚊唔洗硬食埋隻弓兵！即買！
本來網上睇呢個限定版都覺得香港買唔到，
唔好話限定丫，連普通MD系列都難搵呀，
估唔到可以比我買到，開心。

可能對上1次砌模型已經係小學果陣時，
細個對砌模型莫明興奮，enjoy個過程，
對將d野組裝變做完整形狀有滿足感掛？
踏入中學之後都無再砌過，變左打機。
大個之後更加理智地無再買模型，
因為明白短暫開心砌完之後放置play，
唔單止舖塵，又阻訂(土地問題)
結果咪又係要掉。

不過難得放長假想做d同平時唔同o既野，
所以就萌生出買模型黎玩下o既念頭，
起初都無諗住要買要砌o既，想買現醒o既，
響信和行黎行去都好似搵唔到o岩心水o既，
仲有1間2樓o既店員態度好趕客，
我1路睇1路係咁問「想要邊盒拎比你睇」
其實巡例問1兩聲無問題架，佢係係咁問，
我答「睇緊」佢又再問，煩到爆廠！
你間舖擺幾百盒野睇半粒鐘都未睇得完啦，
咪由得人慢慢睇囉，唔想人睇就米Q擺出黎！
我回佢「都話睇緊」佢又話「今日多人嘛」
喂大嬸，信和有邊日唔多人？你講！
我當然唔會幫襯佢，佢成功做到趕客效果，
我知道我1個唔幫襯對佢營運唔會有影響，
只係想響度講聲，生意唔係咁做架？
正如前述，我並唔係有目的咁想買邊款果d，
又無留意開呢個界別o既動向，外行人1個，
單純只係見邊盒靚就想買邊盒咁o既，
所以唔會答到「想要邊盒」呢d問題。

睇左好多間，總算搵到盒o岩心水o既野，
係FAG系列o既Architect，其實無接觸過呢系列，
只係之前有響網上睇過類似o既公仔覺得幾靚，
仲以為係類似figma果d，點知原來要自己砌，
咁就買盒番去試下啦，都要250蚊，
算平架啦，有d靚o既figma要差唔多600蚊。

1砌之下，覺得異常麻煩，不過唔會唔識砌，
跟住本說明書就自然砌到，係幾難扭d散件出黎，
好多都要拎教剪強行剪，唔係就咁扭到出黎，
通常兩個連接位而又大塊果d先可以就咁扭出黎，
3個連接位果d就扭唔到，都唔知做乜要連3個，
其實個模型設計都好多多餘o既部件，
有d明明1舊就做到o既野點解要分兩舊黎砌，
例如有d空心偷膠位居然要塞等2舊野去填平佢？
模型o既腳部更加反智，居然中間有位要另行剪走，
啤果陣唔可以整走埋咩？反正都係獨立o既個體，
有必要中間要連1舊唔啦間o既野咩？
係唔係好似砌圖咁加深砌o既難道達到益智效果？
每part野用唔同o既英文字黎表達，
但係又有兩part唔重覆o既單位都用同1個字母，
搞到開初以為說明書印錯搵果個字母無果件野，
扭d散件扭到手指痛，啪出黎亦有整到手指流血，
因為無專用黎剪模型o既鉗，教剪剪嫌湯口太大，
話時話我都係衣家先識湯口呢個專業術語，
指連接散件同框架之間好幼比你扭斷o既接駁位，
專業o既做法係扭完出黎仲要再用磨沙紙磨平佢。
最裸命係d細關節位，細到幾乎同個湯口1樣粗幼，
扭出黎唔小心打個乞痴都唔知飛左去邊果隻，
然後組裝果陣好似穿針咁插落去，小d眼力都唔得。

砌完啦，無認真計過用左幾耐，粗略估計4粒鐘，
當然成品係唔會好似個盒o既展示圖咁靚，
有d部位要自己上色同埋畫番d線位，仲有d縫合位，
睇網上面有d人唔知用咩方法做到無縫連接，
唔識啦，由佢啦，要咁完美就買製成品好過，
活動方面其實同figma差唔多，都係要輕輕郁，
唔係就甩手甩腳，砌o既模型都預左唔穩陣，
figma呢d製成品就唔知點解都咁唔穩陣！
明明響玩具反斗城買到果d蝙蝠俠蜘蛛俠可動公仔，
或者變形金鋼玩具任你點舞都唔易肢解架嘛，
如果figma果d都咁實淨就好玩好多啦 XD

砌完先開始上網了解下FAG系列o既資料，
原來之前網上睇到覺得好靚o既類似公仔，
係屬於MD系列唔係FAG，睇真d的確MD係再靚d，
FAG係Frame Arms系列機械人派生出黎o既系列，
其實FAG、FA同MD都係隸屬壽屋旗下o既產品，
但據網上了解FAG同MD係唔同結構唔係好能夠亙換，
有d失望，本來想買多隻MD系列公仔換下FAG零件，
同埋網上睇到好多好靚o既FAG產品響信和都無賣，
睇黎想要再落深d個坑都幾大阻力。

今年農歷年假由2月2號(年廿8)放到2月10號(初6)
放9日，不過只係之前埋版星期6番工補左落年假，
上星期忙到痴根，埋完版仲要搞餐牌又風broad，
加上帶病在身，就算恢復精神都仲日日肚柯幾次，
臨放假前星期5晚仲要同公司食飯，身心軀累，
星期6好好休養，過左大半日先察覺到係年廿8，
今年唔單止無剪頭髮仲無洗辣tat，都黎唔切啦。

年30晚就快跨年果陣開電視睇下有乜特別節目，
順便令屋企充斥下新年氣氛，點知大台節目廢到喊，
搵黎全部都up唔出名o既care呢啡做賀年show，
連司儀都唔知乜水，玩埋d廢game，唱下賀年歌咁，
哇，乜衣家大台資源咁貧乏咩？新年都咁cheap？
嘛，點都好過當年亞視臨摺果陣重播上年節目o既。
講開大台佢地整左首賀年歌全首走晒音唔知想點，
唔睇字幕都唔知唱緊乜，不過唱果班名星有d陣容，
都叫做有森美有鼎爺。

年初1，又係打下RO，適逢伺服器仲有經驗加倍，
咁又練下隻魅影練，練到可以點出繁殖Lv10，
應該有4年無上過線o既舊會員居然出現埋，
咁就同佢地打下覺醒古副，要等齊人出團都幾耐。
最主要係whatapps發下d賀年message刷存在感，
今次專登搵左張Fate手遊o既賀年圖(應該非官方)
再用加上恭喜發財等字眼，試下send動漫風格，
睇下會唔會收番d宅腐o既賀年圖番黎，結果無 XD
回應o既賀年圖都係大眾果d甚至第2個group都收到，
最多人貼o既係麥兜果個，係o既豬年丫嘛，應節。

預左年初1初2唔會出門響屋企食，所以買定丁飯，
買左兩盒OK咸蛋肉餅飯兩盒薯仔蚊雞，1盒7仔星米，
1盒7仔紅咖喱，1盒滑蛋吉豬飯，3盒淘大星米，
兩盒好e食波菜忌廉雞闊條麵仲有10杯合味道杯麵，
應該夠食，本來諗住響百佳買波仔飯，點知無！
先至局住買3盒淘大星米，仲有買左抽香蕉。

有睇開4套作品，當中有兩透完食左，
分別係SSSS.GRIDMAN、SAO Alicization、
來自繽紛世界o既聽日、轉生史來姆。

先講完食左o既SSSS.GRIDMAN先，
套野1開始係走熱血特攝片果種超人打怪獸，
有向咸蛋超人及6神合體等作品致敬，
故事講響裕太失憶，突然背負拯救地球使命，
然後打怪獸啦，同1般同類作品唔同o既係，
打完之後除左裕太外其他人都無晒相關記憶，
而且激戰過後破壞o既建築物都會還原，
只係因怪獸襲擊而死o既市民都係會唔存在，
故事就係以呢種樸素迷離o既方向發展落去。
另1特別o既係做d怪出黎o既幕後黑手好快出現，
並向主角群面前表明其身份公然挑機，
個黑手就係新條茜，係裕太o既同班女同學，
原來茜係呢個世界o既神，佢破壞完又再重建，
不過佢都算失敗，好多野都不如意，
整d怪又打唔贏GRIDMAN，整d人又唔同佢friend，
尾段仲比外星人(?)操控埋將佢變埋怪獸，
最尾GRIDMAN打敗外星人，茜就番番神o既世界，
原來只係南柯1夢，1教訓醒番番現實世界，完。

如無意外個夢就係茜發o既，本身亦係女學生，
個結尾寫到咁應該都唔會有第2季啦，
都幾多唔合邏輯o既位，茜要殺人居然要用怪獸？
仲有d市民見到怪獸亦表現得異常淡定(應該專登)
老實講，6花同另1個男配角都可有可無，
茜雖然外觀靚女但性格扭曲腹黑都係唔討好，
不過ED畫面茜同6花真係chok到爆！

再講另1套完食o既來自繽紛世界o既聽日，
故事講2078年1個失意o既色盲少女瞳美，
比佢婆婆琥珀用魔法送佢去60年前o既2018年，
去琥珀17歲青春時期同佢d中學同學1齊玩，
瞳美慢慢由失意變得開懷，仲愛上左個男同學，
只有響呢位男同學o既畫作入面先見到色彩，
用左10集時間去描述佢地點樣建立友情關係，
臨尾瞳美就要番番去佢60年後o既2078年，
當然又係1堆唔捨得o既胃痛場面，
番番2078之前瞳美都醫番好個色盲，
少女琥珀又變番77歲老人家琥珀，
比瞳美睇下60年前d合照有佢o既相簿。

都係果句凡涉及回到過去o既提材1向唔死得人，
玩還玩，唔洗玩到60年咁大呀fa？
玩30年唔得？琥珀係瞳美亞媽唔得？
起碼瞳美番番佢個年份見番班友都唔洗走晒樣丫，
不過唔計瞳美，橫跨60年前後出現o既只有兩個，
除左琥珀之外就係琥珀老公(爺爺)圖書館店長，
其他60年前同瞳美好friend果d同學無再出現過，
甚至連瞳美愛上果個男同學可能已經死Q埋，
有1幕交代瞳美去掃墓唔知係邊個個墓啦，
不過60年前同佢玩o既同學都70幾歲死左唔出奇，
只係有種空虛囉，咁多集蘊釀o既友情1下子消逝，
套野又未至於感動到我喊o既，唔似得4月謊言咁，
瞳美睇番顏色果part係有少少感動o既。

另外兩套仲追緊，等睇晒先寫結論啦。

臨緊聖誕、新年總要食餐公司飯局，
今次去食日本野位於尖沙咀o既土間火，
去到門口格局高上，但係埋位就勁窄，
最唔開心係要除鞋，點解又要除鞋呀？
上次xmas party已經除左1次啦又除，
踩污糟對襪然後踩污糟對鞋內隆，
感覺極唔良好囉，未食已經扣晒分！
出出入入仲要踩上張長凳勁唔方便。

跟住上菜又勁慢，喂家下唔係食放題喎，
放題o既話可能叫10樣黎得7樣側側膞，
每樣野都係收費架，想黎少1樣收少1碟錢？

d3文魚壽司食落同爭鮮差唔多，暖o既？
你間野咁貴唔係比d爭鮮貨色我食呀fa？
不過anyway，日本野本身就好食，
就算只係爭鮮貨仔都唔差得去邊。

到11點就趕客，但d野食都係o岩o岩先上完，
呢頭都未食完果頭就要人走？想人浪費食物？
早d上晒d菜比充份時間人食先趕客都合理d丫。