RO可謂多災多難，先前有素質水疊加BUG，
衣家又疑似出多個掉寶率疊加BUG，
近日波利伺服器MVP卡好頻密上廣，
更有人話係同1人，幾日打出十幾張王卡。

老實講，我無留意人名唔知係唔係同1人，
每日上線o既時間都係平均兩個鐘左右，
1日出幾多張王卡雖然數唔到，
不過都真係明顯睇到早幾日出左好多張。

有人話係掉寶加倍裝備切裝+掉寶糖chok出黎，
(掉寶加倍裝有漂浮快樂氣球、蔚藍蝴蝶結)
但至今都未證實，例行維修後官方鎖掉寶糖，
並聲稱已查可疑玩家o既電磁記錄但查無不法。

巴哈d人就嘈搞錯呀，電磁記錄都睇唔到用BUG?
照計玩家o既1舉1動都1目了然丫，
又有人話根本就無BUG，只係最近d咩消費活動，
出左好多血枝，d人開1日開過千血枝黎打王，
咁咪出卡出得多囉，不過呢個論點站唔住腳，
原因係有出3王果d卡，1日打得幾多隻3王？
所以佢好快就比人負評到摺埋。

我雖然唔能夠證實有無掉寶BUG但我係信有o既，
巴哈並唔係1兩個謠言可以帶到風向o既論壇，
至於官方話查唔到有異樣呢1點，
我猜測電磁記錄只係有記低簡單o既物品流向，
我估有無穿脫裝備、打咩怪物打出幾多傷害、
用咩技能甚至連對話呢d都通通都唔會記低，
好簡單，試諗下如果要記咁多野，全RO幾萬人，
每秒就有幾萬個log，1日有幾龐大o既數據量？
仲要係十幾年前o既系統技術邊有咁勁？
以前我亦睇過私服o既電磁記錄(?)都係咁上下，
不過唔知同官方果個差幾遠。

之前素質水咁快就可以響電磁記錄查出黎，
階因使用道具亦係物品流向記錄之1，
計我話其實官方係鎖定左可疑目標，
只係未搵到足夠證據去拉人，仲未知個BUG用法，
就算睇到佢短時間內係咁連續食掉寶糖，
佢都可以話我鐘意倒錢落海呀，吹咩？
而且官方亦有心放長線釣魚，就算衣家鎖左佢，
個BUG依然存在，不如等佢chok多幾次搵破綻，
之後再連人帶BUG鎖先至稱得上乾手淨腳。

官方仲話縣賞10000P商城幣徵BUG用法，
不過之前素質水o既BUG係有殺錯無放過，
唔理有無用BUG圖利獲利，係咁耳試下都照鎖，
仲邊有人夠膽亂試BUG丫？唔驚比人凍帳咩？
到時乜都無做過就入左停權名單就最唔抵，
無得集思廣益增加左搵出BUG用法o既難度。

知道BUG果d人只要低調忍下手唔好打咁多王，
或者轉去農1d唔會上廣o既高價物就唔易出事，
維修後的確唔再見d王卡頻上廣，緊係啦，
件事都揚晒，唔通想迫到巴哈暴怒上報紙咩？
傻架咩？玩串個party盞無啖好食，
衣家慢慢玩有排佢賺。

我都希望掉寶BUG係假o既，事關1日有呢個BUG，
1日就唔知邊樣野係不正當途徑生產出黎o既，
仲邊夠膽買8591？點知邊日會莫明其妙回收？

其實呢，用得8591賣野都應該有綁銀行帳戶，
即係點都搵到個賣家掛？假設賣家賣BUG物，
令買方蒙受損失，響台灣法例告唔告得入呢？
涉案金額如果係黃金蟲卡片呢d過萬港幣價位，
相信受害人唔會摸下鼻哥當倒霉就算數囉！
如果告得入，賣BUG物o既人都有1定風險，
點都起到d阻嚇作用，唔敢亂黎掛？

學日文生字最好o既教科書1定係日文漫畫，
尤其係果d標示注音o既，透過畫面去記，
印象都深刻d，以有趣同華麗o既畫面學習。

但係雲雲眾多作品，如果無乜特別心水，
揀邊套好呢？唔洗煩啦，買本漫畫刊物，
random睇最方便，而且仲有另1個好處，
反正唔係為追漫畫而買，可以買d過期o既，
通常呢d過期刊物d日文書店都會特價散貨，
厚過本字典o既漫畫刊物唔洗4草就有交易。

不過漫畫刊物都仲有好多隻牌子，
例如最出名連載過無數大作o既少年jump啦，
仲有好多香港人如無意外聽都未聽過o既刊物，
雖然話唔係為追而買，但刊物質素參差，
有d印刷品質低劣，有d連載作品水準麻麻地，
由於書店通常都將呢d書包住晒，睇唔到內容，
我揀呢d書通常睇兩野，1)價錢，2)封面吸引度，
打開左先知質素，以下講4本睇過o既比大家參考。

首先講下印刷品質低劣o既係少年magazine，
(個magazine係日文片假名ma ga jin)
紙質差不在話下，d印刷好似浸左水化晒咁，
又蒙又淺色，報紙都無印得咁差丫，
今時今日仲要係make in japan都咁o既質素？
不過我買果本連載o既都有幾套出名野，
包括妖精尾巴、七之大罪(唔係好咸濕果套)
山田君與7人魔女、聽神名的話等等，
好衰唔衰我買果期妖精尾巴劇情超級恐怖，
講話有個屎忽下爬樣衰科學家發明左d藥水，
只要聞到d藥味o既人就會變樣衰科學家咁個樣，
主角群幾乎全員包括顏值唔差o既女角都有中招，
我本來對妖精尾巴感覺良好，睇完呢篇之後，
型像崩壞到1個極點，對妖精尾巴反感，
快d搵人話我知果篇只係同人惡搞唔係原作丫！
唔想再拎起果本野睇。

跟住講miracle jump，唔知同少年jump有無關係，
咁厚o既漫畫刊物居然採用騎馬釘而非膠裝，
印刷質素正常，我買果本連載o既有乾物妹小埋、
潔癖男子青山，呢兩套叫略有名氣有動畫化，
其餘果d就名不經傳，係有套叫Retort Pouch，
係人渣本願作者橫槍老師o既作品。

跟住講comp ace(日文片假名kon pu e-su)
印刷質素正常，呢本有好多type moon作品，
仲有奈葉、over lord、強襲魔女、幼女戰記、
艦娘等，論作品名氣贏晒miracle jump。

跟住講G's comic(日文片假名ko mi xtu ku)
睇名就知電擊G's magazine旗下刊物啦，
印刷質素正常，呢本以key社作品打頭陣，
有angel beat同charlotte，但頁數略少，
有SAO不過係月曜日tawawa果個比村奇石作畫，
仲有chaos;child、乃木若葉勇者等，
收錄名作量同comp ace不相伯仲，
我買果期超厚，雖然好似好抵，但渣上手勁重，
睇1陣就手軟，我知唔係本本G's comic都咁厚，
係我貪平揀本厚o既姐 XD

本來無諗住玩呢隻，玩緊1隻原祖RO仲唔夠呀？
果隻都消耗我唔少時間同金錢，仲黎多隻？
但呢隻手遊版我好多facebook friend有玩，
果d人多數都係好耐以前有玩過原祖版，
衣家已經無再掂，但貪新鮮又去試下呢隻野，
反而長期有玩原祖版果d朋友對手遊版無興趣，
另外手遊版響巴哈哈拉區排名長期高據3甲之內。

不過作為1個深層次RO玩家，呢隻掛RO名義o既野，
巡例點都要接觸下，但到呢刻我都無諗過認真玩。

最近先開始玩，本住有RO底諗住唔睇攻略玩，
最多係咁耳睇下d NPC位置，但係卡關卡到火滾，
JOB Lv10又轉唔到職，原來解幾個指定任務先比轉，
好啦，轉完職升左JOB Lv又點唔到1轉技能，
我以為中左Bug，上巴哈搜尋亦唔見相關資訊，
原來又係要同指定NPC對話完之後先解放技能，
痴線，原祖版RO邊洗咁？轉左就自然點到技能啦！
呢隻太多框架局限住，唔睇攻略玩唔得囉！
巴哈亦唔多初心者攻略，果d不明網站我向來唔入，
暫時只係得youtube視頻教學比較多。

呢隻守護永恆的愛整體畫面係比原祖RO靚，
雖然我覺得角色模組都係原祖版順眼d，
呢隻比原祖更Q版風搞到角色增添少少蠢o既感覺，
多左牽手系統，大大提升情侶放閃o既殺傷力，
而且盜賊系列牽住手仲可以共享偽裝(1齊隱形)
呢兩樣設定響好多年前未出手遊版之前我就幻想過，
以前創作故事覺得情侶檔並肩作戰要牽住手先浪漫，
如果刺客可以拉埋人1齊隱形可以1齊潛入敵陣，
做暗殺任務之類，咁就唔洗注定刺客要孤身作戰，
無諗過多年後o既RO真係會有呢種設定！
呢個亦係點解我咁想接觸手遊版o既原因之1。
可惜係以我所知牽住手只可以1齊行路，
無得牽住手打怪。

不得不吐糟o既係NPC配音把聲好老囉，
轉職場果個女刺客NPC聽把聲直頭係嬸嬸黎，
係唔係求其搵公司個清潔亞姐配架？唔洗咁縮皮呀fa?
角色個模組唔係好老姐，搵把後生o既聲音好難咩？
明明無日服版，但配音有得揀日文又係神奇，
見youtube有個日本女仔實況玩呢隻中文server，
係咁話「完全睇唔明」好可憐，其實佢可較日文配音XD

手遊game黎講呢隻1d都唔手遊囉，
往往玩1野都無半粒鐘，你都唔想個任務做到1半停左，
然後再登入再解埋佢甚至1個任務分幾次去做假？
不過隻game內建自動打怪功能，即係合法外掛，
都算符合手遊o既設定o既。

巫師o既服裝設計改良左，露番手臂位出黎，
原祖版好似無手咁，但女刺客就7化左，
有乜理由腰下面果塊布(?)係攝響底褲入面？
男祭司下面都多左塊紅色布，意味不明，
唔知點解某d職業有3轉好似主教、遊俠咁，
其他職業剩係得2轉進階2轉，咁咪好唔公平？
目前某d職業亦無得揀另1種2轉，
法師只能升巫師無得揀賢者，
但係劍士可升騎士或十字軍，
服事可祭司或武僧，又係唔公平。

另外唔知係ios問題定隻game唔穩定，係咁斷線囉！
but最近升ios後玩其他game都斷，呢個暫且唔追究住。

早排清空其中1個衣櫃用黎安放神位，
買左幾個大膠箱將d衣物收納入去，
尋日將舊居o既神像搬過黎新居，
1日來回新舊居兩次，朝早搬關帝像，
番到新居擺低後再去道壇還神，
順便下爐o既討糧符交番比師父，
我又唔係做生意或者做sales，
穩定月薪其實討糧起唔到咩作用，
所以暫時唔洗住，到有日需要o既時侯，
到時再搵師父幫我set過。

然後夜晚再番1次舊居將其他神像搬埋，
都係擺住先，仲未開始拜住，
因為衣櫃入面個平台係平較低，
變相我係低頭望住d神咁樣唔多好，
所以今日響JHC買左張木摺檯放入衣櫃，
神像放木檯上面，雖然未能放得高過我，
但起碼都水平望住無咁唔尊重。

跟住將d香爐灰倒番入香爐入面，
倒o既過程都倒到周圍都係粉，
總算set好個神位啦，即刻裝香拜1下。

7月番1套唔起眼o既作品，單睇劇名亦意味不明，
係蔡pen話佢有睇，咁我就開黎睇下咩料啦，
只睇第1集已經覺得呢套係大家睇漏眼o既出色之作，
尤其果種streampunk式o既世界觀深深吸引我。

故事係圍繞住間諜活動，主角安潔係間諜，
其實真正身份係王女，不過細個果陣掉左包，
比個同王女1樣樣o既女仔做左王女，
不過安潔同呢個冒牌王女都亙相恩愛，
所以安潔都想盡力協助佢得到權力。

以上係主線劇情，中間仲插左唔少支線劇情，
講下其他角色o既背景，例如千世大義滅親、
貝翠絲比佢老豆改造喉龍、多羅西個爛泥老豆等，
(3個都係講佢地o既父女情，無提及老母)
眾人認真執行支線任務氣氛唔錯。

不過安潔呢種滿口謊言o既角色我就敬而遠之，
唔會想同呢d人做朋友，都唔知佢邊句真邊句做戲，
1路睇1路諗會唔會出賣佢身邊o既伙伴或者王女，
可能對王女果d對話都係假o既。

又到吐糟位，其中1個任務講佢地調查毒氣殺手，
混入洗衣廠打工，個老闆做唔住要執左間廠，
王女就話接手，已經好囧啦，佢地用1晚時間，
將廠房翻新，然後提升生產力轉虧為盈，
話賺就賺，做生意係咁易咩？不過又係o既，
佢地幾個唔係凡人，智商極高又身懷絕技。

要吐糟就不得不講王女細個又會遇到個1樣樣o既人？
開頭未交待清楚佢地身世我以為係孖生姐妹，
原來只係平水相逢o既路人，有無咁巧合呀？陰謀論d諗，
會唔會1開始就係複製人？其實早就比人放佢入去，
企圖謀朝散位之類，咁設定其實make sense d囉。
掉包o既偽王女又可以琴棋書畫做到樣樣階精，
真果個王女又可以做到間諜學校考第1名，
唔單止個樣倒模，兩個都係非池中魚o既天才，
想做就做到，仲唔係複製人？

套野好多「想做就做到」o既情節，
但其實幾型o既，套野就係賣型賣chok，
唔洗太認真考慮實際行事o既困難度，
只係陶醉響型爆o既間諜氣氛，都唔錯丫。

講下印象深刻o既chok位，第1話安潔殺個外行間諜男，
個男人問安潔係唔係要殺佢，安潔1路答唔係1路開槍，
仲有千世話佢老豆教佢o既止痛魔法，
到佢去拜祭親手殺死o既老豆果陣問點解止唔到心痛，
仲有以歡笑歌聲交待多羅西未知佢老豆比人做低，
呢d情節真係chok得好出色！

結尾組織要安潔殺左王女，呢幕仲諗住會出事，
會唔會係安潔自殺保住王女？不過咁太易諗到，
結果係安潔想帶王女私奔，但王女1心想要管治國家，
將安潔反鎖響飛機倉自己扮安潔去同組織會合，
原來係要王女搞場宴會意外去整死女王，
其實殺唔殺王女並唔重要，安潔逃離機倉趕去救王女，
1直精明o既安潔調查王女下落反而擺左烏龍，
都算係1種反差萌，佢地集眾伙伴救出王女happy end，
始乎王女亦無辦法繼續其王女身份，就正式做間諜，
反正係唔係都做唔到王女，當初安潔帶佢遠走高飛時，
唔好咁任性拒絕咪唔洗咁麻煩囉。

意外o既係d反派角色仲未消滅，有個仲拎C ball走佬，
可能為第2季留伏線啦，不過有無第2季都未知，
製作單位話如果呢套d碟或者手遊大賣會出第2季。

呢種帶政治色彩o既間諜題材屬少數，
對上1套令我聯想起閃光之夜襲，
又係1套我幾鐘意但唔起眼o既作品。