買左滑版車啦，Kleefer牌o既pure180兩個碌o既，
2200蚊，係就係貴d，有唔少款千幾蚊就有交易，
只係貪佢有1秒摺起架車o既專利設計，
收車好方便，收起左可以好似手推車咁推住黎行，
其他兩個碌o既款唔得咩？係唔得架，
因為摺起左都係會左右西，好難拉住黎行，
起初都諗過買3個碌o既款容易d平衡，
好在無買，踩左1晚，都唔難平衡到，
兩個碌行起上黎已經好用力啦，3個碌果d更用力！

以為可以用黎番工代步，應該仲辛苦過行路，
係就係踩1腳可滑行大約5米，但呢1腳唔野少，
因為要企響版上面果邊o既膝頭微微烏低，
呢下其實都好消耗力氣，要持續移動o既話，
平均每隔4秒就要重覆呢下烏低o既動作，
你諗下，就咁企響度每幾秒重覆坐低起身，
你都辛苦啦，仲要1邊腳座低另1邊腳撥地下喎。
長期烏低身呢？即係坐無影凳咁，仲要單腳喎，
開頭玩果陣就係咁，好快隻腳就酸晒。

雖然買之前都有係咁耳睇下forum相關文章，
好多人都話行人路好鄧，我買個款都有少少防震，
但都係震到手痛，太低估磚地o既殺傷力啦！
第2朝起身隻手都仲痛緊，雖然未至於好痛，
但真係會震到內傷架。

其實只要個地面係平滑，係可以滑行好遠好順，
試過響屋企出面走廊果d階磚地踩感覺極良好，
踩1步閒閒地滑行7秒後先減速，大大延長烏低身o既間距，
無咁辛苦，而且亦唔震好舒服，如果條街係呢d質地，
踩1腳由街頭滑到街尾都仲得呀！真係可以用黎代步，
可惜香港d行人路通常都磚地，就算係石地，
磨得唔平滑(1條條坑紋patten果d)同磚地1樣鄧，
路面唔滑亦大大抵消版車o既滑行距離同速度，
反而行車路果d地面順滑好多，可惜好危險好大壓力。

如果諗住買版車代步？除非你果d路係平滑啦，
唔係o既話我勸你都係唔好諗啦！

M記又同壞蛋獎門人cross over推出新食物，
傻蛋孖牛堡都係用巨無霸果兩塊牛柳，
再加個豬柳蛋漢堡o既蛋再塊芝士同蔥夾埋，
汁方面麻麻地，應該係黑椒汁黎，
如果係用巨無霸果隻汁就應該幾好食，
不過佢都係同巨無霸1樣就咁用紙盒裝住，
無紙包住架下！要扣分！

睇見海報入面o既脆薯麥賣相令我期待，
食落其實係普通薯仔味，無乜驚喜，
連早餐果隻薯餅都不如，只係造型比較特別，
換番薯條仲好。

呢個意慾係呢幾日先開始萌生，我係行路番工，
正常步行由樓下間M記開始到公司要15分鐘，
都算幾長，條街人流唔多，見樓下d細路踩滑版車，
靈機1觸，係喎！點解唔用版車代步？咁都諗唔到？
但見多數小朋友踩多，上網查下好在都有成人向。

如果踩版車，每日番工應該快好多&輕鬆好多，
仲有直路位可以1枝箭咁向前標應該慳唔少時間，
不過我係無真正踩過滑版車o既，都擔心幾個問題，
究竟平唔平衡到呢？會唔會好容易仆親呢？
據我踩單車o既經驗平衡呢方面估計唔難克服到，
仲可能比單車更容易，因為起手(腳)動作少好多，
係驚d凹凸位即係坑渠蓋呀果d會唔會翻車，
呢d要真正踩過先知，但以上都未係最大隱憂，
更加驚會唔會有差佬或者交通警捉？
喂如果唔比代步架版車真係無乜意思喎，
唔通真係買黎響果d滑版場滑版專區度踩咩？

同埋究竟踩版車可以幾快同慳到幾多力水呢？
我粗略估計右腳響地下推1步可以滑行5米，
移動速度等同我o既普通跑速，咁即係話，
用行1步o既力度行到5米距離，都抵丫！
你可唔可以1步行5米丫？

當然都有考慮過單車代步，好快打消念頭，
第1，單車貴d，第2，太大舊太阻訂，
我番工途中必定要上天橋(行樓梯或答lift)
正常1架單車size入唔入到lift都有問題，
就算要打斜先質得入都會遭旁人側目，
行樓梯就更大問題，除非買5萬蚊果d超輕款式，
手指尾都舉得起果d，唔係慳埋d力氣都倒蝕番，
第3，收放唔自如，番到公司唔通拍架野響門口？
我又唔多想拍街邊用單車鍊鎖住覺得無安全感，
仲有無理由推住架單車行商場假？版車就唔同，
摺埋最多拖住個手推車咁行街無乜違和感。

呢幾個禮拜亞媽無過黎新居呢邊，
我o既習慣係屋企長期唔打開窗口，
主要原因都係唔想d蚊蟲飛入黎，
冬天山埋窗口亦暖d，夏天就開冷氣，
亞媽1過黎呢邊就1定會打開窗口，
然後果晚就總有1兩隻蚊殺完1隻又1隻。

果然，幾個禮拜無打開窗1隻蚊都無！
會唔會只係睇唔到炸？唔會囉，
d蚊飛得慢，1有o既話通常都好易發現。

結論係，d蚊真係響外面飛入黎架！
唔開窗口o既話係大大減低蚊o既出現！

中文又稱指尖陀螺，顧名思義就係響指尖轉o既野，
有咩用？可以話無用，純綷手痕果陣比d野你玩下，
就係咁無聊，但最近hit起黎(又未算好大熱o既)

其實都幾o岩我呢d隻手硬係鐘意搵d野搞下o既人，
平時做做下野都有轉筆，以前仲有玩coin roll、
甚至花式cut下牌都有，不過做呢d野都好易跌，
又要執番果下無癮，而且都要有d技術，
唔係人人1拎起個銀仔就識roll，轉筆要回彈都要練，
而spinner就唔洗練，1渣上手就自然識轉，
仲要轉緊o既手感都比以上3樣有過之而無不及，
加少少想像力，就好似有超能力或者氣功咁，
隻手渣住舊螺旋丸，或者草薙8神咁隻手渣住團火，
如果我係呢d能力者應該都會1得閒就放d查克拉玩下，
(中2病發作 XD)

睇死亡筆記或者monster，都有d角色係靠隻手活動，
去激發腦部轉動，例如Near會1路諗野1路搞頭髮，
moster入面個探長透過模疑打字(打空氣)o既動作，
黎激活記憶，亦有人話過左手旭動會刺激右腦之類，
所以有個spinner轉下可能轉數都快d架 XD

經開旺角諗住買，哇都要100蚊左右，仲諗住幾廿蚊，
明明係結構簡單o既野，加個鐵盒精美d就吊高黎賣？
見到有舊78蚊，就買呢個啦，貴d唔通轉得勁d咩？
擺左個響公司，1得閒都真係自然地會拎黎轉下，
仲可以右手渣mouse左手轉spinner。