呢個係第2次o既RO見面會，我當然無出席啦，
個會響台灣搞o既關我地d香港人乜事？
不過作為1個RO玩家都好關注遊戲今後o既發展，
活動前1個禮拜響巴哈版就有大批玩家發表問題，
待有份抽到參加名額o既人代為發問，
但好多問題都好唔實際，例如希望顯示已婚/未婚，
希望組隊人數增加話咁樣弱勢職業就有立足之地，
(就算比你組到100人d隊長都唔想組d弱勢職業啦)
個帖就變左許願池，結果到現場有限o既提問時間，
都解答唔到呢兩個重要問題包括：其他部位拆卡、
咒術GVG鎖釋放幾時先肯開番？咁對咒術唔公平！
最慶o既係黃金蟲卡居然持續GVG有效，
鎖釋放已經削弱左咒術然後仲要整多隻黃金蟲？
點解要對薄血最易被秒o既咒術咁殘忍？
雖然我唔PG但主力玩法系好唔想見到咒術被欺凌！
另1樣慶o既係關於卡登半粒鐘官方唔會改動，
點解可以咁面不改容宣佈樣咁有問題o既設定？
卡登1分鐘都夠阻止d人狂登入造成伺服器負荷啦，
洗鬼卡夠半粒鐘？你叫d人組緊隊卡登情何以堪？
唔知情o既以為佢不負責任，敗壞該玩家o既聲譽，
更甚o既係比d盜帳者有更充足時間轉走晒d財物，
以前盜帳果d如果個玩家搶登佢頂多得1分鐘時間，
做唔到d乜野，可以保障被盜者免受嚴重損失，
點解要做埋d對玩家百害而無1利o既設定？
講左咁多壞消息，講下比較好o既消息，
官方考慮轉第2個防衛系統唔用nProtect，
呢個NP又係對玩家百害而無1利o既野，
既防唔到外掛亦防唔到內掛，只有防礙玩家，
變得開住RO唔可以同時開其他game(例如MHFG)
入game又變慢左，仲經常hang到連RO都開唔到，
反正開外/內掛果d非官方程式都唔洗經NP批準架啦，
都唔知整黎做乜？

對上1部iphone4由2010年10月入手用到衣家6年，
今日先黎轉iphone7，米睇4同7隔左只係兩個number，
iphone系列係每兩年先跳1個數字，即係2010就4，
2011就4S，2012就5，2013就5S，2014就6，2015就6S，
到兩個月前先出7，如無意外出年就7S啦。

其實部iphone4都仲用得，只係有d暗病，
例如個home掣壞左，舊電唔come洗，插耳機位塞左，
唔支援某d新apps，反應慢等，不過用左6年夠晒啦。

響豐澤出機128Gb亮黑色6388，周圍都係呢個公價，
之所以唔揀白係因為黑come污糟，再買多個mon貼同機殼，
開機設定地區時間，去到要求網絡就卡住左set唔到落去，
要插sim卡先比set，原來插iphone4張sim卡都係唔o岩size，
走去門市換細卡。

番到屋企第1件事係set番部機d基本野，之所以用番iphone，
係諗住貪佢可以駁落itunes過番晒d野還原舊機o既資料，
話晒都4百幾首歌同咁多apps，重新入過就好煩啦，
點知隊落個itunes居然出「無法拷貝來自iphone的診斷資訊」
診乜野斷呀？搞錯呀，我已經用mac機啦，同牌子都認唔到？
上網又睇左d方法，兩邊重開機啦，揀信任裝置啦都係唔得，
只好連個mac OSX都更新埋sierra，等左兩粒鐘，
再連部iphone7，終於同步到啦，痴線架？只係想同步組，
居然要連OSX都更新埋？又要局我用個陌生o既作業系統。
1同步到話咁快部iphone7又入番晒舊機d歌，但入唔到apps。

雖然只係用左1陣都講下新機用後感，反應係快左好多，
尤其用facebook就完全感受到，由上到下高速咁拉落去，
就算唔o禁d影片都會自動播放(無聲)都好流暢，
好似哈利波特入面o既魔法報紙咁d相片識自己旭，
而開過o既apps會放入背景運作唔識得熄，其實都幾食電，
我知iphone7性能勁，但無乜必要都唔想浪費系統資源，
研究左好耐先知入背景apps要向上推先可以熄左佢，
新系統o既日歷連農歷初幾都有埋，幾方便，
仲有個時鐘icon枝秒針係識旭o既，唔係裝飾品，
呢代個home掣其實係裝假狗並唔係實體掣，
不過o禁落去果下配合佢震1震都好有o禁左落去o既感覺，
堅o岩得下人，home掣有指紋識別功能，大致都幾準，
假設記左你食指指紋，你用中指、無名指都無辦法開機。

唔怪得facebook到衣家都無dislike呢個funtion，
你唔like咪米鬼睇囉，做乜要dislike人姐？
早幾日放條片上youtube，都未正式對外公佈，
只係up定先，無厘啦更就多左個dislike，
我條片邊度得罪你呀？又唔係比你睇，
就算有乜唔滿意都留言講聲等我都知個原因丫，
又唔會知係比邊個負皮，真係無仇報，
雖然有心要負評人可以開假帳號都係奈佢唔何，
負評左人地自己又唔會有任何損失，
如同周街打完人地1拳人地都吹你唔帳，
可唔可以要負評果d人負番d責任呀？
例如每負1次要扣積分，最起碼負評要有合理理由，
如果無理被負評可以上訴cancel番佢個負評之類。

就好似某d政治群組咁同敵對政見o既人罵戰，
果d留言靜係得句粗口或性器官無內容好無聊，
你有point就講無point就出少句聲啦，
講粗口只有浪費大家時間(尤其係讀者)
呢d同負評無乜分別(其實仲衰過負評)

另1單就早排RO個道具連結有bug可以令其他人跳窗，
有人響巴哈公開個bug用法，隨即換來大量BP，
雖然我唔係受害者但都鄧佢唔抵，佢個出發點係好，
就係將個使用方法公開令個個都識得用，
咁先可以迫令官方立即採取行動，的確佢發完帖後，
當晚即刻臨時維修將道具連結功能暫時移除，
佢受千夫所指但造福左人群，如果唔係咁，
唔知等幾時官方先會正視問題(官方作風的確係咁)
長期處於隨時比小部份知情人事害到斷線o既恐慌下。

最憎就係果d話有bug又唔公開又懶神秘果d友，
1係你就講清楚，1係你就唔好講，
講d唔講d吊住人癮最討厭。

亞媽都想用智能手機，就陪亞媽到先達出機，
亞媽就唔熟呢d野，所以幫佢考慮以下幾個條件，
價錢唔太貴，又唔洗最平，最平通常最廢嘛，
由於唔係袋褲袋，個mon越大越好，
d字都大d睇得清楚d，睇相片煲劇都舒服d，
搵個口碑好o既牌子，唔好小米華碩呢d大6牌子，
咁就Samsung啦，雖然佢部Note7會爆炸，
都係Note7姐，呢次買o既係幾年前o既Note3，
唔洗千5蚊埋單仲送埋mon貼。

其實我好耐之前就唔滿意Note3個機背殼，
明明係塊硬膠係扮晒真皮咁仲要整埋車線位，
做乜要做假姐？搞到細路仔d玩具咁款，
例如d玩具左輪明明無得入子彈，
硬係要啤個彈匣位但拉唔到出黎咁，
算啦又唔係我用，個殼幾膠都唔關我事啦。
(仿皮設計Note4都仲有，好似到Note5就無啦)
比著係我就唔會考慮Note系列，
主要係太大部袋褲袋唔方便。

買完機步出先達，無買到機套o既關係，
廢事袋響褲袋或手袋會hi到d掣，
所以將部機放番入個原裝盒，行左幾步，
feel到個盒震左1野，以為係錯覺無理到，
1路行都隱約feel到有震，直到答巴士，
我拆開個盒1睇先知唔係錯覺，真係部機震！
原來個盒o岩o岩好頂住個開關掣，
變相係咁開機、熄機、開機......
響巴士拎部野出黎已經好熱，
好在發現得早，唔係可能連Note3都會爆炸！
點解個原廠盒設計到連d決口位都無架？
patch入盒之前1定要拎走舊電心囉。

第1日就由我黎摸索下同埋設定部機，
例如set好個whatapps，入其他煲劇apps、
電筒、收音機之類，再set埋個通訊錄等，
順便測試下佢枝手寫筆黎寫字同畫畫，
響手感方面Note3贏左surface pro3囉，
我就咁試畫個正方框再響入面填間線，
Note3可以貼住個框線亦無乜點出界，
surface pro3就貼唔實個邊框囉，
但真係要黎畫畫o既話我又嫌Note3太細，
起碼都要A5尺寸丫，d繪圖apps又唔夠專業，
唔係o既話我都考慮買多部Note3畫畫用。

整整下睇番個介面，咦點解有兩個icon走左位？
1個係photo，另1個係音樂，走左去第2頁，
搞到原本塞到o岩o岩好o既第1頁漏空左兩格，
我嘗試將果兩個icon拉番入第1頁又唔比拉，
想點？封面果度有1大格寫住新聞，
以為係東方日報星島果d，o禁入去，
妖全部雞腸黎o既？又好似無得set香港d報紙。

搞完1輪再用番自己部iphone4，咦喂，
突然間覺得部iphone好的色，居然變得好唔慣，
明明都對左6年居然比部用左1陣o既Note3，
令我產生唔習慣iphone4o既感覺？！
可想而知mon大真係好重要。

日清合味道近年出左幾隻新加波風味，
先講辣椒蟹味，硬係覺得好似之前響日誌有講過，
但又搵唔到，算啦講過都可以再講姐，
呢隻辣椒蟹味配料無問題，只係個湯好大陣酸味，
勁討厭，之前買左兩盒，食左1盒之後唔想再食，
另1盒比亞媽食，但過左1排亞媽又買番盒辣椒蟹味，
遲遲都無人食，睇番個底顯示o既日期到今個月尾，
唉都食左佢唔好浪費，拎之前草落o既辣麵湯粉，
倒落去再沖水希望減淡d酸味，都仲係有。

跟住講下叻沙味，呢隻包裝畫左椰子，
食落又真係好大陣椰子味，整體都唔算差o既，
都有d辣辣地，夏天食就1身汗冬天食就爽啦。

新加波風味仲有隻黑胡椒蟹味，
米搞啦，食過隻辣椒蟹已經唔想再試。