妖術之前用開+9黑杖轉+12守護精靈杖盾，
傷害無乜顯著增幅，有d失望，
最近睇巴哈話+14破杖傷害少贏+14守精，
咦？咁對比我把+12守精咪大贏？
再加上因為守精套係由日本引進o既野，
而日服精鍊上限最高只有+10，
台服精鍊可以+14或以上，同樣設定下，
變相比日服勁左好多，所以有人估會nerf，
驚佢改到精鍊效果只支援到+10，
都係買定把+14破杖比較穩陣，
到守精nerf左果陣+14破杖就升值啦，
而且破杖仲自帶INT+3同AGI+10，
有利推素質減詠同埋減攻速後延遲。

入手後即刻上考古1/F試杖啦，
平時用靈爆打修繕機械人約5萬4上下，
換左+14破杖後居然打到上6萬！！
哇，足足多左差唔多5千！好有感！
心諗打人型o既勘查機械人肯定守精贏掛？
話晒把守精插左兩張札古舟對人型+20%，
平時冰完再魔增連鎖電擊勘查29萬，
點知破杖電落去後可以上30萬，都係贏！
唔係掛？增傷大到多過20%？咁得啦，
連打人都輸把守精杖可以放得入倉啦。

其實論帳面MATK破杖係爭守杖約70MATK，
不過破杖係4級武器守杖只係3級，
過度精鍊後o既額外增傷真係唔講得少，
另外破杖仲有每精鍊2就MATK+1%，
即係+14就MATK多7%呢d響帳面睇唔到，
缺點係SP消耗亦明顯多左，
加上我帶開魔導王唔識回SP，
有機會吸魂術入不枯枝回唔到本。

估唔到出左咁耐o既破杖目前仲係無可取代，
唔插卡o既話破杖最勁，不過守杖係兩洞，
加上個盾有得插抗性或黃金蟲，都唔弱o既，
日後會有枝比破杖更勁o既叫向日葵少年，
論MATK、額外增傷、INT、洞數都係破杖之上，
當然裝備o既野緊係越出越勁架啦，
新裝打舊裝臉係常識，不過枝向日葵仲有排，
聽講後過貓星人o既版本，仲要等多兩個ver，
呢段時期破杖都仲係1哥。

其實我最想玩o既VR Game係行街Game，
類似GTA或sleeping dog咁不過變第1身視點，
最好可以慢無目的咁自由自在想搞乜就搞乜果d，
可惜目前已出o既PSVR遊戲大部份都係企定定，
例如job simulator或嘉年華，響個範圍內玩，
或者until dawn咁軌道式槍game，
講真，如果job simulator可以4圍走肯定正好多！
我唔奢望可以用腳行街，十字掣代步就夠啦，
但以move右邊o既設計，根本就無方向掣，
好難做到移動，而左邊move就無左個發光波波，
即係camera係detect唔到，所以先要人買兩個右邊。

歸咎move係6年前o既產物，當年o既設計，
應該完全無考慮到今日應用響VR度，
最好就將左邊o既move加番個波波，
左右手兩邊都渣住咁o既move就接近perfect啦，
左邊手控掣前後同橫移，右邊手控掣轉角度，
咁就Call of Duty果d槍game都可以1路行1路射啦，
希望sony會推出專為VR而設o既第2代move啦。

日前就呢個move設計貼左上巴哈PSVR版分享，
只係將左手邊move用photoshop key個藍波上去 XD
但得到o既回應係似乎大家都唔係咁睇好，
話咁樣o既移動VR Game好易玩到頭暈，
認為VR致暈o既主要原因就係移動同大腦唔同步，
所以目前出左咁多VR Game都係定點為主，
如果係o既話真係好失望，不過如無意外，
黎緊o既bio hazard7都係可以自由移動o既VR Game，
到時再睇下係咪真係咁多人玩到暈。

目前已出o既自由移動PSVR game仲有Rigs，
不過呢隻要用頭黎描準敵人射無乜興趣。

查實如果自由移動會暈，咁現實坐果d電動輪椅，
咪又係1樣用方向掣移動，咁d傷殘人士咪日日頭暈？
果d玩賽車會暈o既渣真車都係1樣姐？

有朋友最近搵我，話佢朋友申請左間公屋，
但係間野有人自殺過，問有乜野方法搞搞佢，
點解問我？因為眾所周知我有朋友專門捉鬼，
咁我就轉介左佢單case比我個道士朋友幫幫手。

點解好揀唔揀揀兇宅丫？就算做完法事之後，
你估真係住得安樂咩？個心都會形住形住架嘛，
當然呢d兇宅緊係特快上樓啦，唔係邊個肯住？

不過呢，有d人專登申請呢d兇宅唔係真係住，
只係為左掛個名，拎個公屋持有人資格，
我唔係話緊朋友個朋友呀下(而且我都唔識佢)
只要持有公屋就有優先權認領居屋，
而且仲可以以特平優惠購買，點解咁著數？
政府就係想吸引d人放棄公屋騰空番d單位出黎。

首先利申我唔係咩野預言家，只係純綷理性推測，
亦唔以空想科學角度黎幻想(即係叮噹、高達果d)
只以目前科學發展到o既技術預測近未來會發生o既事。

1)無限資源
根據物質不滅定論，其實地球上所有野都唔會憑空消失，
只會轉化為另1種形態，正如你放杯水幾日後d水無左，
只不過係蒸發左變左氣體，所以能源都係1樣，
只要搵到個可以巡環o既法則就可以有無窮無盡o既能量，
並唔係咩神奇o既事，據聞呢種技術已經面世，
但會威脅到某d企業所以封鎖，可能要等某日石油用盡，
呢種技術先可以正式問世，據1位做燈飾o既行家透露，
世上已經有100年唔會熄滅o既燈膽，只係唔會推出，
出左d燈膽商賺乜？

2)殖民星
到資源無限啦，但人口劇增o既情況下土地都係有限，
只有移居到第d星球方可解決，唔洗講到系外行星咁遠，
金星同火星就係類地行星啦，只要開發到水源，
就製造到大氣層，然後種植樹木製造氧氣，
咁要整個同地球差唔多o既環境唔係咁難姐？
其實金星同地球o既自轉及公轉週期都好接近，
所以比火星更似地球，只係金星更近太陽肯定熱d，
火星就凍d咁解，水土不服在所難免架啦，
呢樣野唔好話去其他星球，去其他國家都會啦，
不過呢d投資同回報唔成正比o既項目邊個會做？

3)防止冰河
全球氣侯暖化，北極o既冰塊漸漸溶解會導至水位上升，
有機會令水位浸過晒d大陸淹沒城市，好似d科幻電影咁，
d人就要住海底，其實呢種災難可以防範於未燃，
唔係叫人環保d用少d膠袋滅少廢料之類，晒氣啦，
其實將部份冰山搬出地球咪得囉，近近地就搬上月球啦，
咁大座山點搬呀？分批咁運囉，1日運幾公頓，
總有1日運走座山o既，而且又可幫月球開發水源綠化月球，
係呀，呢個係現代版愚公移山呀，技術上唔係做唔到丫？

4)大型機械人
睇高達睇得多以為未來會有咁大架機械人咩？
我可以話比你聽就算有咁o既技術，就工業或軍事用途，
都唔會整機械人出黎，係多餘o既，整多兩隻腳會飛得快d咩？
仲要渣把斬艦刀飛埋去劈友？遠程射枝飛彈過去唔好？

5)長生不老
要科技有大躍進首要條件係要延長人類壽命，
就算做唔到長生不老，最少都要延長3倍有幾百歲命先啦，
相信透過基因改做o既新人類可以突破壽命上限，
有幾百年先可以研究更多科技，更多嘗試，
更大膽投資時間去做1d短期唔會有成效o既實驗，
不過響新人類未普及前社會就會出現1個斷層，
例如正常人(舊人類)同新人類o既矛盾，
長命o既新人類點會想娶個過多幾廿年會變老人o既舊人類？
衣家香港供層樓30年到退休都無乜時間享下清福，
如果有200歲你話幾好呢？涯50年換百幾年有屋住都值得丫，
係呀，全香港得你1個有200歲命咪係囉，
我敢肯定到人類平均壽命有200歲果日，
樓價會貴到打百幾年工先供得完，呢個世界無咁爽o既。

以上的確係幻想，不過有時FF下都幾好玩丫，唔係壞事。

響759買o既GANCEDO桶裝薯片條(定薯條片)好正，
正在come食，如果1條條咁食應該可以食足1套戲，
可惜已經無見759再有賣，都幾憎試759 d新零食，
1但上左癮佢又唔再入貨就吊住條癮都無得再食！
聽聞759會年底結業，真o既話可能更加無機會再食。

之前屋企有1桶未開，1直都唔捨得食，
諗住等佢再翻貨先開黎食，等到過晒期，
睇番張招紙，最佳日期前食用係2016年7月22號，
遲左3個月都未食，再唔食o既話驚會變質，
局住開黎食啦，食落又唔覺有問題喎，
仲係好脆無林到，之前有桶開左口擺耐左無食，
就林晒，其實個蓋都係密封式應該無乜點漏氣，
唔知點解開過同無開過o既保存質素爭咁遠。

描述1下桶薯片，牌子應該係flaper，
不過睇張招紙最起眼最大隻字係GANCEDO，
上面寫住Productos de Calidad，
下面寫住Frutos I(定係J?)ecos，
同埋Elaboracio(上面有1撇)n desde 1949，
好明顯唔係英文啦，解讀不能，
有人知道仲有邊度有得賣不妨通知聲丫，
感激感激。