連續幾篇日誌都離唔開PSVR添，無辦法，
VR真係好震撼，只係又好似以前1出3DS飢喝期咁，
護航作品得果幾隻完全唔夠喉，最慘係除左bio7外，
好似無乜其他VR專用作開發o既消息。

目前實體game得5隻，其他要PSN課金買，
我d點數得番2千零唔多夠，響觀塘廣場買儲值卡，
好在目前日圓7算，1萬yen都係780蚊，唔算貴。

終於可以課隻summer lesson體驗1下做補習老師，
調教1下呀凌曉魚呀唔係...係宮本光 XD
呢隻亦被喻為人類滅絕計劃o既其中1項，
點滅絕法？個個都有虛擬女友仲點繼後香燈？XD
可惜呢隻o既設定係自己坐響度，唔可以4圍行，
自由度大打折扣，遊玩性亦都頗單調，
只係選擇題，不過選擇方法幾好，係靠望，
鱷高個頭向上望都幾有思考緊o既感覺，
補習(考慮)時間無限制，可以細心欣賞小光溫書，
溫到咁上下仲有特別活動，唔好諗邪野，
只係佢會比你睇下佢影d相、同你1齊聽下歌，
聽歌果part係佢拎個耳機插落你耳仔度，
但個頭稍有移動好易鬆脫，然後佢就黑你面，
暫時呢個event發生左兩次，我盡量唔旭個耳機都甩，
然後玩左兩週目(好快玩完)拎左1件便服，
不過佢d成績都係未如理想。

有另1間廠幻象社就快推出隻叫VR彼女(直譯)o既game，
無論房間格局，女主套校服都明抄summer lesson，
聽講呢隻有H環節，但平台唔係PS4(唔排除日後會有)

雖然PSVR比到我唔少震撼體驗，但仍有唔少改善空間，
由最基本o既問題開始講起，首先個頭罩有線連住，
即係帶住佢360度轉身會比d線綑綁play，自由度扣分。

又要依賴camera判斷距離，規限遊玩空間，
本來諗住訓響間床度玩，咁個cam咪要set響天花版？
咁都事少，個定位系統唔夠穩定，玩多陣就偏移，
用佢個劇院模式，畫面會慢慢移左向左邊，
你由正面望變左個頭要擰向左邊，
時不時都要o禁實option黎較番正中間，
呢個都算，玩vr game偏離o既話明顯視點唔協調，
即係你個頭向前伸d景物會左或右移動咁變得好奇怪，
簡單d講就係視點同你活動o既方向唔成正比，
最慘呢種偏移並唔係o禁實option就能夠解決，
而係要o禁home掣出番設定果度重新定位過camera，
希望呢個問題可以透過update系統解決到啦，
唔得o既話即係硬件本身有問題，唔出新o既解決唔到？
不過玩sumer lesson只要唔多旭坐定1個位無乜偏離，
過場好似會自動夾番正，玩耐左都未覺有偏差。

另外手掣o既靈敏度都未做到100%同步有待改善，
最理想o既control係可以detect到每節手指灣曲o既手套，
目前呢樣野都未面世，分分鐘呢個概念都未有人諗到，
玩果陣經常會想用手摸下呢樣摸下果樣，當然摸空氣啦，
如果做到隻手可以同個畫面亙動投入感肯定上另1個層次。

畫面質素差都好多人講，雖然我覺得合格，
但始終有d位蒙蒙地係唔舒服，
奇怪係點解要帶眼鏡玩？明明都唔係真係望遠野，
VR個螢幕同你隻眼o既應該唔到兩cm，
居然唔帶眼鏡會睇唔清楚，好在PSVR帶眼鏡問題唔大。

VR暈呢樣又係硬傷，好睇個人體質，
有d人答車答船都暈車浪暈船浪就無得好講啦，
我就玩VR無乜暈，希望玩VR感到不適o既人唔多啦，
因為咁會縮窄左個市場，市場1細就無乜廠肯開發遊戲，
到頭來亦係VR愛好者o既損失，唔希望佢好似3DS咁，
衣家d人玩3DS都熄左個3D效果貪新鮮完就可有可無。

又係硬件問題，PSVR必要配件同線實在太多，
又有個處理盒(?)又要cam又要額外火牛，睇到都煩，
唔能夠1個眼罩搞掂晒咩？算啦，除左個VR唔係無線之外，
配件幾多都唔影響VR體驗，所以呢點放響尾段先講。

第1隻試o既game就係driveclub，
玩呢隻就好似自己坐入個車箱入面，
望左邊可以見到隔望座位，向後望見到後座，
係車迷o既話肯定開心死，買1隻game，
就可以體驗坐響各大名車o既內籠，
利伸：我唔係車迷只係對賽車game唔反感，
比起賽車，我更enjoy佢o既遊覽模式，
可以響唔同o既賽道慢駛欣賞異國情懷，
設定果度可以整代表自己o既角色，
但set完玩緊果陣都係睇唔到自己，
原來要響重播賽事先睇到，1播黎睇，哇！
你就係坐響個司機隔離睇住佢點渣車！
可以感受下做駕駛學院d師父點教車 XD
replay果陣仲可以隨時o禁停，當停止果陣，
你都可以自由觀測靜止左o既世界，
即使撞飛個垃圾桶亦會停留響半空，
呢1刻感覺簡直就好似x-man入面個快銀咁！
美中不足o既係玩緊果陣自己變左隱形人，
靈魂出竅？向下望見唔到自己對腳或身體。

試完driveclub再試跟機o既playroom vr，
頭先就置身響幾可亂真o既仿現實世界，
呢個就色彩繽紛o既夢幻世界又另1番體驗，
老實講，真實世界你行出街就已經係啦，
但呢d虛構世界係你咁大個從未置身過o既，
可以有更加意想不到o既驚喜。
playroom vr不愧為sony自家出產，
更能用盡PSVR特性發揮出更出色o既表現，
入面有6隻mini game，其中1隻好似孖寶兄弟咁，
控制隻tvbuddy(?)響版圖入面跑跑跳跳，
又有得食金幣，連個BGM都好有mario風格，
但係用VR黎玩係耳目1新o既體驗！
好可惜只有1關，好快就玩完，唔夠喉。
當年老任出咩野wiiU姐？懶係嶄新o既思維，
如果果陣出wiiR(老作o既，不過又幾夾喎 XD)
咪又再次將sony、徵軟1軍領先業界囉！
除左呢隻同夾公仔機外，其他好似唔能夠單人玩，
要多人玩先過到關，所以無詳細試到啦，
隻夾公仔機夾出黎o既扭蛋可以拎響面前欣賞，
就似渣住舊玩具響手咁，可惜1旦放置左響將木檯，
就唔能夠拎番上手，可玩性大減。

跟住就響psn下載d免費game黎試玩，試隻demo，
vr wolrd可以體驗海底世界，你就響個鐵籠入面，
上面慢慢降你落去，睇住d魚響你面前遊來遊去，
越沉越低咁，跟住試隻rigs(其實我有實體game未拆)
呢隻係坐入個機械人度控制個機械人，
唔似driveclub咁做隱形人，向下望可睇到自己隻腳，
而且唔同渣車可以前後左右自由移動，係幾爽架，
可惜操作極之殘念，射擊居然唔係用手去描準，
而係用頭，fing住個頭去射人？好膠姐。
再試1隻益智問答遊戲之類o既game，
佢d題目例如要你將手頭o既積目放到指定重量，
可以(用手掣)舉起舊物件代入感再上1個層次，
可惜我目前日文功力未夠都係應付唔到。

又再download隻初音演唱會demo版黎試，
好遠距離咁睇比想像中差，而且唔知點搖枝螢光棒，
好似正式版有得近距離企響歌姬面前睇。

見到隻allumette，老實講齋睇封面絕對提唔起興趣，
反正免費，down完唔鐘意咪delete左佢無蝕底，
1入game(根本唔係game齋睇之嘛)開場亦無乜特別，
入到故事度，咦喂？正喎！好似條街擺響你張檯咁，
近距離睇住d識行識旭o既泥膠公仔響你面前做戲，
雖然只得1個場景，但係都好過癮。

無錯，繼3DS後又1部首發入手o既遊戲機，
(PS4唔算首發，嚴格黎講係首發周邊)
都諗住walk in買，但無諗過真係賣斷左，
藍店果d全部係之前有訂購先可以拎得走，
卒之要用貴少少o既炒價入手仲要硬食兩隻game，
好在其中1隻driveclub本來都想買，算啦，
今日買唔到可能要等下個月，早買早享受。
由於本身無PS4，所以都同日購買埋slim版，
變左要抽住兩大袋野(PSVR+PS4)番屋企。

開箱果陣d配件同線真係見到都頭痛，
靜係VR都有監視器啦、cam啦、火牛啦，
搞左1大輪先開到機，又要set PS4初始設定，
又要update系統，又要set VR設定...

第1隻試o既係driveclub，戴上VR眼罩後，
會發現今日辛苦左咁耐都係值得o既！
置身於遊戲入面呢份體驗o既震撼度，
係當年初嘗3DS裸眼立體無法對比到架，
之前話過相比PS3黎睇PS4原地踏步無乜躍進，
響電視畫面睇當然係拍埋兩部都未必分得出，
不過戴左VR後我完全收番呢個講法，
PS4要有VR先符合到呢代次世代主機o既級數！
雖然係咁，不過VR仲有好多改善空間，
例如有線連住啦、唔帶眼鏡玩會糢糊啦、
VR裝置無搭配耳機(雖然有位比你另外插)
仲有對應手掣o既準確度同靈敏度啦，
手掣o既設計啦(我覺得應該要用手套)
機體o既配件複雜度啦、畫面質素等等，
唔排除(亦期待)sony會再出下1代VR，
至於game o既玩後報告留待下1篇日誌再講。

就快出PSVR，想響入手前先體驗下VR係咩野境界，
可以買個紙皮咁o既野摺個盒仔將個手機套入去，
再求其響appstore download d VR game就試到啦，
其實早就應該要試下啦，衣家先黎付諸行動。

不過未買個紙盒住，想試下部電話播唔播到先，
download左第1隻，開出黎黑左陣畫面又彈出去，
跟住就download隻播片apps，佢搜羅唔少VR片，
click播片果陣load左好耐都仲load緊，
click下載影片下載完又無下文，試多幾條片，
都係無料到，喂乜衣家appstore d野咁流架咩？
唔係比android有更嚴格審核機制？唔掂都比上架？
試左好幾隻都係唔得，試到1隻好老實咁話我知，
呢部電話唔支援(用英文寫)就晃然大悟，
1隻兩隻play唔到就可能係軟件有問題，
當5、6隻都唔得o既時侯就硬件有問題啦。
喂，唔支援應該download之前早響丫！
再唔係開出黎detect到唔得都單聲丫！
米粒聲唔出就彈出去或hold住響個loading度丫！
浪費我d時間。

又係o既，我部6年前o既iphone4，
粒cpu都唔夠力run呢d虛擬實景影像啦？
仲有個6軸感應靈敏度有無咁高都係問題，
好在未買個紙盒姐，慳番d錢，
都係等PSVR出先再體驗啦。