呢套野都10年前啦，記得以前好似買過1套VCD但都好似無睇過，
記得以前有個叫check it o既日本網站經常cap呢套野d圖黎惡搞，
話晒(斷斷續續)玩左RO咁多年，RO官方o既相關作點都想拜讀下，
1直都未睇無視左，最近見youtube有人上傳，就好好咁睇1下啦。

睇左10集，唔係太好睇，先唔講畫面，無理由用套10年前o既野，
同今時今日d動畫質素比，睇慣左衣家d高畫質黎講的確不堪入目，
但我針對o既係呢套野o既分鏡，唔單止生硬，有d仲格格不入，
可能節省成本，同1個落地動作重覆兩3次其實好un眼，
即係條友打打下比人轟飛播1次，又再打打下比人轟飛又播1次。

故事編排都好悶完全唔引人入勝，如果佢唔係掛住RO個招牌，
睇完第1話就已經棄番確定，主角只係1個觀音兵完全唔討好，
女主角好多時又見異思遷，只識利用男主對佢o既愛去差遣佢，
港女1名，都係睇到火火地，個刺客懶係高手咁1出手都係廢廢地，
女商人成日想做佢地生意又係煩膠1名，成team人行動又9唔答8，
1陣又走去商城唔知做乜，1陣又走去夢羅克唔知做乜，
無野搵野黎搞，明明好似行事審慎o既女魔法師突然又暴走，
總之睇到想講粗口，糞劇本。

踩左咁多句，都要講番d正面野o既，女主聲優係水樹奈奈，
仲有子安武人，都叫有名聲優助陣丫，其他CV真係完全未聽過，
套野純綷係想將RO各種元素玩落去，呢方面算做得合格，
睇落都有熟悉感同共鳴，唔排除會勾起唔少人o既玩RO回憶，
對白可能比其他動漫用字比較淺，好多時都可以聽得明，
好話唔好聽，N4日檢聽解果part隨時仲深過呢套野，
又要再踩多腳，既然都裸正版權，點解唔用番RO本身o既BGM呢？
如果佢行入城鎮播番城鎮o既音樂相信會更加感動！

被吟為「千年僅有1人o既人才」「靚得唔科學」，
曾拍過合味道炫技及變身杯麵魔法少女(?)廣告，
99年出生過多個月就17歲o既僑本環內，點睇？

無容置疑係靚女1名，不過「千年僅有1人」呢，
個人認為太誇張啦，千年喎，話係千人僅有1人就合理，
老實講，以idol黎講響我眼中佢只屬中規中舉，
論樣，靚過佢o既大有人在，例如武藤玲奈，
論才華呢，咁我又真係唔知佢有乜耍家野，恕不討論，
所以齋講樣，最近僑本出席公開活動d相都肥左，
扣小小分，係，佢個身形都仲係好好，但無之前咁好，
作為背負千年僅有1人o既稱號，呢個狀態唔合格囉，
當然，作為偶像，佢已經好過好多人。

咦？個名係咪寫錯？專登o既，純綷想自由發表意見姐，
比佢d粉絲咁易search到就唔係咁好啦 XD
 

哇終於再次用得著旅發局呢個分類啦 XD
對上1次用差唔多5年前，本來開呢個分類，
係想記下d旅行野，無計啦都無乜去旅行，
印尼旅行果期仲未開始活躍寫呢個blog，
衣家只好連行街都唔放過...入番正題先，
平時唔多落旺角，唔鐘意去d人迫人o既地方，
只係想買隻valkyrie driver觀塘區賣晒，
先萌生落旺角o既念頭順便遊下。

落信和地庫見間賣(老翻)日韓劇/動畫o既舖，
其實賣d野同觀塘廣場頂樓果間無乜大分別，
想搵o既動畫都係無(例如未聞花名等)
見到高達o既blueray碟居然索價4百幾蚊？
睇個包裝封面連家用printer都印得靚過佢，
d字又蒙又無出血(有白邊裁得唔準)咁o既質素，
點可能賣4百幾蚊？堅匪夷所思，邊個會買？
入得呢d舖都係想幾廿蚊買套劇姐，
呢個價位唔係正版價啦咩？正版唔通過千蚊？

懷舊game比人拎番出黎炒熱係周不時都發生，
但係最近d超任盒帶究竟發生左咩事？
有舖頭專賣超任game都算，居然有d賣千幾蚊？
仲話接受分期付款，呢個價買部遊戲機都得啦！
又有(非官方)手提超任機，唔係要插住咁大餅野，
拎出街打下話？其實幾年前我部PSP(唔係vita)
已經玩到超任game啦喎，洗乜咁麻煩？
又有game舖電視播住超任o既街霸2同洛克人，
隔離就demo近期隻fallout4，畫面緊係無得比，
不過睇超任畫面又別有1番情懷係真o既，
諗番起細個時經常響game舖廚窗就係睇呢d畫面，
明明只係咁單調o既demo都睇得津津樂道，
睇番衣家次世代咁精彩o既demo都無果種feel。

facebook d無謂野真係普及得好快，繼冰桶挑戰、
反手摸自己肚臍(要瘦先做到)，近日又有新梗CD眼鏡，
就係將兩隻CD分別套響眼鏡左邊同右邊個柄位，
個頭向前chok，兩隻CD就會彈向前面，向後chok，
就將兩隻CD收起，完全唔洗用手，變身CD超人(?)
然後就1大堆人跟住做再拍片...

暫時見過chok得最型棍o既係有條友渣埋把玩具弓箭，
響牆邊鼠出黎chok1野變身射箭再chok解除變身(?)
唔通個CD係描準裝置？

雖然個title寫日文雜談，其實部份應該都適用於各種語言學，
亦記1下自己呢1個階段o既學日文心路歷程。

語言分：講、寫、讀、聽，最難果part係聽，跟住係講，
然後係寫、最容易係讀(即係睇)，即係：聽>講>寫>讀

以上係指同1程度o既內容，同1篇文就算明明睇得明，
都可以聽唔明，寫同講可以係output所以先唔講住。

聽，1快或者長就會聽唔切，其實唔好話日文，中文都會，
只係因為中文太熟，根據前文後理會自動補完番整句意思，
例如講個「鞋」字，會接呢個字不外乎著、除、買、刷之類，
唔會出個「食」字架嘛，食鞋咩？所以就算另1個音唔清楚，
都會根據個聲調而立即分析到果個係咩字，所以要聽得明，
唔係剩係識，係要好熟、勁熟果隻。

讀，係最容易，對於華人黎講，睇得明仲有兩個分野，
A)睇得明但讀唔出，B)睇得明又讀得出，因為d中文字，
大部份都真係同中文1樣意思。1般情況讀係無時間限制，
可以慢慢讀，唔計考試啦，不過好似玩game咁，
其實就算讀得明都未必讀得切，有時讀到1半就跳下句對白，
所以理解速度響讀呢方面都不能忽略，目前理解速度都偏低。

講，暫時都未能夠隨心所慾咁即刻講到，都要諗1陣先講得出，
發音方面可能未夠準，例如d要高音o既講左低音之類。

寫，講得出都未必寫得o岩，有時唔記得個字真正o既spelling，
只係記得大約咁寸，有無濁音、ne或re係容易寫錯，
最陰人o既係某d漢字得兩個音但係以為3個就無寫到後面個音，
例如變個動詞kaeru其實個漢字只有個ka音eru要寫番出黎，
有時會誤會個漢字係kae所以就咁寫左變ru...

以上都係指同1程度o既野，唔係拎d N1程度睇唔明就話難，
N5程度聽得明就話易。