番開5日制o既人知唔知放兩日假係幾咁滋潤？
唔知哩？生在福中不知福，以前我都係咁，
前公司5日制，覺得係理所當然o既事咁，
直到做呢份工後，間中有得放星期6日，
先明白到原來咁大差別！心情都唔同d。

1年1度o既MH本家系列又黎啦，又係早1日偷跑入手，
不過黎緊下星期要應付N4日能試無乜時間玩啦，
雖然玩日文game或多或少都有助提升日文能力，
但想響考完N4前暫時將學習範圍縮窄響N4內。

係咁2玩左兩野，換左把90攻o既太刀(最初果把得60攻)
村任清晒1星，試用過突擊style、空戰style、武士道style，
除左空戰之外其餘兩個style仲未搵到有咩特別之處，
空戰style係改左個迴避動作變左跳，只要怪響前面，
就借力踩隻怪(?)跳到好高，再高空劈番落去，
耍帥1流，實唔實用就唔敢包，但起碼用落分別好大。
突擊style只係可以安裝3個技能(其餘果d好似只裝得1個)
技能方面太刀就有櫻花氣刃斬(咩style都裝得)
出完氣刃糟即刻升1級，白色變黃色再出多次變紅色(最高?)
但起手動作太長，加上草1次發動值都幾耐貌似唔太實用。
另外兩個技能都唔知點用(定被動技能?)裝左等如無裝，
只係心理上覺得3個技好似勁d(?)

上到村2星就解鎖可以到歷代村莊，例如MHP2個雪山村、
MHP3G果個東洋村，可以睇下呢d村立體左係咩樣，
如無意外條條村受付娘接d任都係1樣。

呢隻都算係我其中1隻印像深刻o既game，
(其他同期o既應該仲有街霸II、炸彈人、孖車等)
近日響youtube搵到呢隻第2代o既playthrough片睇，
果然回味無窮，1下子由第1關睇到爆機。
點解心血來潮諗起呢隻陳年舊作？
唔多唔少都同G鬆某專欄講起konami有關，
講起呢個系列已經比573擺入雪櫃無再出新o既。

咁多集之中個人亦認為第2集係最佳，
無論遊戲豐富性、配樂甚至畫面都可能係系列之冠，
唔係掛？超任畫面居然可以比後期出o既好？
當年第2代只係16Mb容量，肯定比第3代(24Mb)靚，
靚在畫面o既美工設計同埋角色o既比例，
靚唔靚唔係單以容量黎判定，好睇製作人o既功力，
好似KOF咁，98果陣d畫面已經靚過韓國製o既02，
論容量好似係後者較大，所以美術觸覺更勝容量。
原理亦同「買貴o既單反相機唔會送技術」1樣。

第2集真係好有心思，關卡設計充滿濃厚o既和風元素，
仲有d好得意o既機械老鼠車、機械吹泡泡魚車等載具，
玩法除橫向捲軸外，仲有遊村同第1身機械人對戰，
game入面亦收錄其他mini game(揭底牌、沙羅漫蛇等)
以當年o既超任game黎講呢1點令我嘆為觀止，
BGM旋律亦好有feel，隔咁多年依然隨時亨得番出黎，
尤其其中1條放煙花o既祭典村落BGM。

第3集都好玩，可以隨時變身以及利用角色特性，
過1d只有佢先過到o既位，呢點幾爽o既。

第4集唔知點解好似無玩過，衣家睇番片都無乜印像，
可能當時正值playstation王道時期，已經玩緊FF7、
jumping flash果d，部超任已經收起左(或者唔用得)
但睇番d畫面都係未超越到第2代。

然後到次世代機(ps1?)版，廠方單純人有我有心態，
五右衛門都轉用3D模組，可惜技術唔夠做得肉酸，
而且果個世代起格o既3D畫面今日睇番都好傷眼XD
寧願佢用番2D好過。(其實呢代我都無玩過)

到到G鬆個專欄作者講起其中1代(好似係NDS版)
將角色黎個大番新，五右衛門變中2少年、
惠比壽丸變美少女(?)結果d系列擁躉接受唔到，
搞到下1集居然要澄清其實果個中2少年係冒牌貨，
出黎對真果個五右衛門道歉，完全否定前作o既改革，
要咁兜法，真係好樣衰下，何必呢？
 

做得呢行都預左發生，掂得最多o既除左mouse就係紙，
不過3個幾月黎都未比紙界傷過，可能天氣唔算乾燥掛？
以為乾燥d日子先會出事，呢排都唔算好乾燥姐？
點知今日就界親，應該同d紙o既厚薄有關，
平時拎開果d通常最薄都有128G，今日要用80G紙，
仲要印萬幾張，放低疊紙果陣，疊紙又綴唔實打斜扇落去，
就咁樣比d紙1拖即刻損左，3個幾月未比紙界過1次，
今日1日內比紙界左3次(不過其中1次唔覺有傷口...)

雖然應較無乜人在意，不過巡例開個topic清澄番，
較早前日誌寫話GameWave已經摺書，
但近日行開些粉、OK書架，見到有GameWave賣，
雖然貌似已經唔係我熟悉果隻十零蚊本講game為主，
而係封面係男聲優(好似係)賣幾十蚊定位模糊o既刊物，
仲要包住，想好奇打下書釘睇下入面乜料都唔得，
我又唔會花幾十蚊買黎睇下入面係咪面目全非，
最近又發現多本掛GameWave名o既某game攻略本，
似乎GameWave仍然正常營運，的確係1件好事，
我呢種console機迷都唔希望市場上少多本game書，
因為咁o既話某程度上反映緊console文化熄微緊，
2黎亦紙媒步向夕陽工業，兩樣都係我唔想見到o既事。
(其實多本game書亦都唔代表console文化活躍，
紙媒仲有發展潛力等，只係心理上好過d姐 XD)
的確有1排響呢d書架上見唔到GameWave縱影，
先會產生誤會，特此聲名。