年頭亞媽發過1次甩牙夢(詳見今年1月日誌)
到衣家9個月親人方面好似都無乜收到咩野唔好消息，
今次到我發甩牙夢，個夢係覺得下排左邊隻牙有d鬆，
然後搵到個類似茶樓o既地方(其實係咩場所唔清楚)
通常酒樓都會有好似半個牆咁大o既鏡嘛，就照鏡啦，
用手指搖下果隻牙，輕輕力就甩左出黎完全唔痛，
醒左，又再上網查下甩牙夢，又再搵番高登果個post，
都係好多網民話發過好多次親人都健在，唔洗太驚，
而且向來自己都唔多係發夢靈驗果d人，亦唔希望係，
係o既話凡發親d衰o既或唔吉利o既夢都會好不安，
anyway啦特此1記。

做印刷呢行踏入8月9月就開始接到唔少出年o既年歷製作單，
我手頭上都整左幾個，1個車廠(好似係)o既、1個建築公司(?)、
1個唔知天主定基督教o既、1個係d好似馬仔果d繪本o既，
前兩者印量都正常，後兩者就唔知佢地咩心態，只係印1份，
講緊係有心機(算係啦)整十幾頁o既座檯月歷喎，只係印1份？
貪得意牙？正常應該整好多份派街坊或當贈品作宣傳用途丫，
整1份咁獨1無2o既檯歷打算擺邊度比人欣賞呀？動機不明。

都係忍唔住買左，本來係諗住出埋呢個月糧先買架，
凡出新機都會用果部機打篇blog先，不過呢篇唔係，
相信surface打字都唔多順，用番普通PC打番算 XD

主要都只係想要佢畫畫個功能姐，都諗過買surface3，
話就話機能上有差，總覺得用落各方面都會差過pro，
仲輕左添，之前買macbook都係咁，先買pro後買air，
用落根本唔覺air慢過pro但就輕好多變左用得多過pro。

咁點解呢次又要買pro呢？最在意o既係SSD，
睇過d spec，surfece pro用SSD，surface 3無SSD。

surface pro3跟筆唔連keybroad，要keybroad加4舊水，
surface3筆都無跟，要keybroad o既話要加多成千銀，
當然可以求其響腦場買個幾廿蚊keybroad插啦，
之前響youtube search過surface d廣告，有4G LTE，
點知買果陣話無d咁o既野，果d插到卡o既係大陸版...
算啦，暫時試過iphone個人熱點用surface連都幾穩定，
之前macbook air連唔到，要買多個華胃pocket wifi。

到重點啦，番到屋企梗係要試下用佢枝筆畫畫先啦，
未裝咩繪圖軟件，就咁開個小畫家試住先，
好似有d delay囉，同我想要果種手感仲係有d距離，
撇除直接響mon畫呢個優點，感覺比wacom差，
希望只係小畫家唔專業o既關係啦。

順帶1提，同樣係win8.1 o既倉頡，唔知點解，
surface pro3果隻1黎就有聯想字庫，PC果隻係無。
 

你唔覺得用膳時要幾個餐具處理幾個動作好麻煩咩？
食食下飯塊扒太大又要放低個匙根拎起刀叉，
鋸完塊扒要送飯又要放低把刀同叉換番匙根筆飯，
你知啦餐檯唔乾淨隨便搵塊唔知抹過咩o既布抹下之嘛，
d刀叉唔可以求其放埋1邊，long響杯頂或碗邊比較好，
但又唔穩陣好易跌落黎又污糟番，食個飯都固咁多野，
如果有刀叉根就好啦，咩野係刀叉根？

呢個可能係1個改寫西式餐具史o既革命性設計，
有日響茶餐廳用餐時，用把比較利o既金屬匙根，
去界塊肉，諗諗下呢把匙根其實都有刀o既功能，
如果呢把匙根前端再加上叉o既設計，
咁就係1把完美o既3合1餐具，暫名刀叉根啦 XD

現實上，都見過結合叉同匙根o既設計，
就係之前KFC比o既膠叉，佢係叉之餘，
仲有較大o既兜狀可以剩載1定份量o既液體，
純叉係裝唔到水份，齋匙根亦難以吉野同叉起d麵，
佢個膠叉就可以同事滿足兩個進食須求，
可惜近來KFC比o既膠叉都變番純叉形，
筆唔到湯，雞皇飯配o既膠根亦無位比你吉野。

而我o既概念就係base on較早前KFC拎o既膠叉根，
KFC果隻始終係膠，側邊位太頓完全切割唔到食物，
如果呢個設計改用堅固o既金屬物料，修薄厚度，
或者兩側邊位加少量鋸齒狀(非必要)就大功告成！
1把餐具筆飯筆湯又得、吉野叉麵又得、切割肉塊亦得！
從此純正o既刀、叉、匙根可能會慢慢被淘汰，
如果有餐具製造商睇到我呢個post，仲等？快d生產啦！
拎埋專利1旦發揚光大，其他生產商要向你買專利，
剩係收版權費都賺到你笑啦，雖然係我o既構思，
衣家無私咁豪出黎造福社會 XDD

唔係咩新番，應該係幾年前o既Fate劇場版，
只係咁o岩響youtube見到有，咁就欣賞1下，
睇o既仲要係國內同人普通話配音版本，
本住好奇心睇下佢地配到咩質素，以業餘黎講，
其實唔算差o既，起碼有投入感情唔會格格不入，
只係甩咀情況頗嚴重，同埋有部份惡搞台詞，
例如叫士郎做土狼、叫士郎用主角威能、
直叫金閃閃呢個名、仲有係咁媽的媽的媽的...
除此之外都無乜大問題，整體無乜脫離軌道，
ED由神級業餘歌姬祈Inory唱，1向都勁buy佢。

講番故事，如無意外係將24集o既Fate Stay/Night，
濃縮做個半鐘o既劇場版，如果無睇過原版o既話，
肯定好多位都接唔到，睇到勁多問號唔知想點，
套野無明確交待士郎同saber點黎只係用短片帶過，
TV版例如Saber訓練士郎之類o既劇情都skip晒，
Rider死得好hea，Basaker主人好似無做過d乜就死左，
可以話節奏快得滯黎唔切接受到個劇情就到下1幕，
仲有skip幾多我就唔清楚，TV版我都只係睇過少少，
大約睇到Rider出場左右。

講下整體流程，首先快鏡交待個序後凜話同士郎敵對，
Basaker出場打兩野走人，跟住Rider出場插1插士郎，
唔知咩事就死左，到Caster利用個日本刀客(唔記得叫乜)
搞搞震，捉走Saber，凜個從者Archer投靠Caster，
凜同士郎諗住搵Basker聯手點知Basker比金閃閃殺左，
然後Lancer又無端端話要同凜、士郎聯手，
救出Saber，Saber變左凜o既從者，Archer捉走凜，
Lancer比主人言峰下令自殺死唔去殺番言峰救出凜，
(估唔到原來Lancer係個大好人)士郎打Archer，
並交代Archer其實就係未來o既士郎，Saber食花生(?)
士郎居然贏到Archer，然後就去打最後大佬金閃閃，
日本刀客出黎阻路比Saber做低華麗退場，
士郎越戰越勇，識出埋劍塚結界，贏埋金閃閃，
Saber去破壞聖杯(其實係團肉)唔知做左d乜華麗地死埋，
尾段凜情深款款再要求Archer(唔係死左咩?)做番佢從者。

都係太趕戲無乜醖釀過o既關係觀眾融入唔到呢d感動位，
D英靈無乜展現過光彩就收工，同d雜卒無乜分別，
即使係咁，尾段d打鬥位例如saber對日本刀客果d，
都係熱血o既，只係士郎可以好打到咁又係接受唔到囉，
仲勁過saber，查實呢套野o既saber好似好弱咁。