本來諗住睇完1季寫感想，不過呢套過左1季時間，
仲繼續做落去，算啦，先講住頭12話啦。
套野真係好熱血，明明只係廚藝比試咁簡單o既野，
果份氣氛都可以做到滿眶熱淚，究竟係劇本o既功勞呢？
定係製作組o既功力？

我要收番之前話雉切繪里奈係女主角o既說法，
呢個最多只係最後大佬，個人認為田所惠先係女主！
而且佢怯懦o既存在能夠製造出對手o既強大，
更加製造出面對強敵創真依然淡定o既大將風範，
如果無田所惠驚到腳震o既表現張力1定大減。
創真為惠被退學竟然賭上自己學位向前輩挑戰果下，
真係好激昂！經歷咁多野如果最後1齊唔到真係有d希虛。
雖然個人都唔太buy弱氣女，總覺得攻陷惡女先有意思，
近年動漫都係走呢個方向，不過naruto都有鳴門雛田CP，
弱女都有1片天，但呢個惠弱得連雛田都不如，
雛田起碼都面對敵人都唔會退縮先啦。
而繪里奈呢？做過d乜？只係識得1副睇唔起人o既臭臉，
而且係個睇人唔順眼就以強權手段欺壓o既典型壞人格，
目前為止唔認同佢有資格做女主囉，傲嬌都要有個譜假，
就算第2季先開始將功補過都好難蓋過惠o既印象分，
更何況蠟過下漫畫版，如無意外就算去到第3季o既進度，
繪里奈仍然係無同創真發展o既空間。

上完日文堂，又再次走果條熟悉o既路，
亦即係幾年黎響觀塘番工放工o既必經之路，
諗番起響辣椒o既工作生活，
覺得呢份工原來都幾可愛，
不自覺地愛上左觀塘呢個地方，
話愛上又誇左d，叫做情義結比較貼切，
老實講，當初o岩o岩到觀塘見工番工時，
(其實第1份觀塘o既工係麥苗唔係辣椒)
覺得呢個地方都算幾煩，答地鐵要轉月台，
唔能夠1程車直落，搵到位坐都未坐熱就要起身，
巴士又只得1架經觀塘仲要班次勁少，
不過幾年o既番工已經對以上o既野麻木晒lu~
反而覺得觀塘係個幾方便o既地方，
不論食野又好，買野又好，打書釘(3聯)又好，
衣家住新居要買野都係過觀塘。

風雲入面有個地方用黎擺放大量廢棄o既刀劍，
叫做劍塚，無記錯雪飲狂刀就係響呢個位出黎。

如果有個地方用黎擺放大量蟲o既屍體呢？
係咪叫做蟲塚？妖邊Q個咁痴線收集蟲屍呀？
係d蟲自動自覺死埋去架！真係唔知點解，
有種類似烏蠅但size再細d唔知咩蟲黎，
會死響1個固定範圍度，好似舊居廚房燈掣頂，
就hea左1堆同種類o既蟲屍，試過抹走晒，
過排又死番1堆蟲出黎，究竟果度有乜特別呢？
點解咁多位唔死硬係要揀果個位黎死呢？
係果個位風水好丫定點？

然後新居都發現類似情況，呢次係廁所個窗台，
又係死左1堆都係呢隻型號o既蟲屍，
完全係理解唔到！唔知你地屋企又有無呢d位？

目前我套裝備：
頭：獵團員之證GF[剛閃] Lv6
身：劍客GP服飾·青 Lv7
手：灰晶蠍GX腕甲 Lv7
腰：劍客GP腰甲·青 Lv7
腳：輝界龍FX護腿 Lv2

插左o既珠：兩粒暴鋸龍射珠GX1、3粒灰晶蠍劍珠GX3
兩粒太陽劍珠GX5、4粒太陽劍珠GX3、4粒月神劍珠GX4

發動技能：真3、閃3、豪3、弱特、利刃2、藥仙、
快吃、怒氣衝天、見切4(up)、迴1(up)、劍術1(up)
*有(up)代表入場後技能等級up

呢套技能算係近戰裝應有o既都有齊晒，仲相當美觀，
簡直就係著住整齊制服儀態端雅、純潔o既氣質少女 XD
之前套正義裝+個吟遊頭雖然未至於嘔心但幾肉酸，
家下好似整完容出黎成個唔同晒，咦靚女你邊位呀？XD
o岩o岩拎齊12本秘傳cri+16%入場會心有96%！

製作過程：為左整呢套裝唔知農左幾多隻G級銀火、灰晶，
銀火都仲好d，搵唔到人幫手自己1丁友都搞得掂(係耐d姐)
灰晶1條友帶3個NPC幾乎無可能斷到佢尾，要有打擊同斬系，
呢套裝灰晶部位都係3粒珠+1隻手姐，人地有d裝要十粒仲慘，
跟住煩o既就係d用公會點、N點、祭點都換唔到o既煩膠素材，
例如艷色香果實、暴鋸龍翼膜，好在暴鋸有翼膜救濟任，
另1樣煩o既係獵團頭要大量獵團證，最衰我個獵團得9級，
聽講14級獵團有個任1場出30飛證，慳好多時間。

只係初步完成，仲有得再升上去，不過衣家已經好夠用，
係隻腳仲係FX(霸防)扣大約30%血就無晒skill up效果，
將佢升埋做烈防就perfect啦，skill up無條件長註(好似係)
但剛防系列最煩，每1層都要HC素材，層層都卡住晒，
好後悔上個禮拜有得換狩人祭P果陣唔拿拿聲升爆佢，
衣家最快都要兩個禮拜後先升到。

本來都無諗過咁快齊技能，諗住有真閃3頂住先用黎刷素材，
輸出高d都刷快d嘛，係咁打獵團票黎升個獵團剛閃頭，
就係呢個得兩個插珠位，點知升到Lv6就變3個咁就齊章！
D部位都唔洗再升都有齊要o既技能，比原定早左好多上碟。

齊skill後再去打18張獵團票個雙響狼任，好似平時咁，
我mark1隻黑響狼，其餘伙伴、傳賴、臨賴3個抽1隻白響狼，
以前都係佢地早過我ko隻野，衣家變左我快過佢地ko隻野，
即刻感受到輸出真係差好遠！整好呢套裝都可以畢業啦，
我諗呢1年內好難有另1套裝外觀+實用程度好得過呢set。

呢個唔係咩故事，只係1個概念，即食杯菜，
即食杯麵就食得多，不過麵始終無咩營養，
但入面都有d脫水菜碎、蔥粒之類o既野，
其實都好好味，如果呢d配料份量好似麵咁，
直情整1碗杯麵咁o既size o既脫水菜，
菜變做主角，加番杯麵d湯粉變做即食杯菜，
你話幾好呢？有益又好味，日日食都唔怕啦。

唔單止咁，甚至可以用黎做出前1丁o既配菜，
煮出前1丁果陣再倒埋d菜落去1齊煮，1流。

可能你會問，點解唔用新鮮生菜呢？懶丫嘛，
去街市買菜，番到去又要洗菜、切菜，
有時仲要搣走d爛左o既部份，跟住仲要煮，
對於1個番工o既人黎講放左工都全身都散晒，
邊得閒搞咁多野丫？