呢次想講講nisi同事，工作方面佢比我感覺做事好hea，
唔多細心、交到貨就得果隻，當然相對地做野速度好快，
做野方面我就同佢相反，我就做得細心d但速度較慢，
因為好多時係過唔到自己果關，唔容許hea貨上碟。
佢行動力亦好高，即講即做，根據命理學說黎講，
呢d人雖然未必會成功，但好大機會成功，
起碼同樣o既時間佢走o既路會比我行得更遠，
估計佢將來應該可以做自己生意賺到唔少錢。

外表上佢都係好hea，番工著到好似響屋企咁，
(其實亦代表響公司唔存在令佢感興趣o既對像)
但睇得出佢係1塊未雕琢o既玉，望落似普通o既石頭，
如果肯好好修飾自己，將會發光發亮，
佢妹就係1個好例子，其實素顏個樣同佢差唔多之嘛，
but佢妹好識打扮好靚女，開埋fans page收左1大堆兵。

如果可以同佢1齊o既話，佢應該能夠帶我行得更遠，
生活變得更多姿多彩，我有唔少嗜好同佢1緻，
應該幾夾得黎，而且做事方面我亦能同佢亙補長短，
同佢合作出同人本應該幾有睇頭，可惜感覺上佢都幾惡，
可能會經常比佢鬧，唔易相處和諧容洽果隻(笑)
雖然同佢做左咁耐同事都未有發生過任何口角或不和，
但係做情侶或夫妻又兩回事嘛 XD

常言道「求學不是求分數」，唔係求分數求乜？
做左咁多年人，我可以好肯定咁同大家講，
中學學到o既野有90%都唔會響日常生活用得著，
或者個別行業有用唔知啦，例如會計要用Amaths，
做建築師(唔係地盤工人呀下)要有物理學底子，
做醫生要睇bio，做化學家(乜香港有咩？)要chem等，
歷史呢？咩職業用得上？諗唔到，歷史博物館掛？
咁唔通個個都會計師、建築師、醫生、化學家(?)咩？
好似我從事設計咁多年，以上提及o既科目1d都用唔上，
(唔好意思，中學o既美術堂同design亦完全係兩回事)
加上現今香港都無製造業，市場得服務業同炒家主導，
試問呢堆學問邊有機會派得用場丫？

我細個都算係個唔係好讀得書o既學生，
唔係我學唔到野，而係無興趣o既野根本入唔到腦，
要用呢堆唔知有乜用o既課文去斷定1個人o既能力，
絕對係唔公平，不過呢個社會就係咁，無計。

不過有1科我係幾後悔中學無好好學習o既，
就係英文，只有呢科係做咩野都有機會應用到o既，
就算睇復仇者聯盟唔洗睇字幕都爽過人啦 XDD
中文基本上都係無用，就算唔讀中學1樣打到呢篇blog，
亦夠應付社交場合，講野勁唔勁唔係睇中國語文係睇轉數。

拿，我只針對中學，未否認到小學程度o既課文，
小學o既中英數社科健算係日常應用到o既基本知識啦，
普通o既加減乘除數概念點都要有o既，
仲有木、膠唔通電、金屬、水會過電、個人衛生之類，
中學開始就越黎越極端，學1堆完全唔等洗o既野，
就算比你當年考試裸滿分，結果十年都無用過，
咪就會唔記得囉，咁係咪白學丫？

呢套係1兩年前o既作品，只係因為人設討好所以睇下，
都係響youtube搜黎睇，可惜中文字幕版唔齊集數，
大部份都係睇英文字幕版，對故事應該都幾1知半解。

男主角春虎出身陰陽師名門，但無乜天份，
過住平凡生活，繼承祖業o既重任就落響佢親戚夏目身上。
春虎條女北斗1次意外被殺變左張符，先知原來北斗只係式神。
跟住春虎就去搵夏目諗住得到力量為女報仇定唔知點，
殺北斗(意外?)果個鈴鹿原來係想令佢哥復活，
夏目同春虎夾手阻止佢，事後春虎又跟埋夏目去讀陰陽術名校，
過住柴娃娃o既校園生活，然後連鈴鹿都入埋呢間學校，
原來北斗係夏目背後操控，後來春虎又被揭發係夜光轉世，
相馬令夜光覺醒因此春虎失控，誤殺左夏目，
春虎諗辦法復活番夏目，最尾復活到(應該係?)但春虎又隱居。

套野係以陰陽師做背景，但全套居然無乜提到靈魂之類o既野，
係後尾夏目暫領便當後出現過類似靈魂出竅o既描述。
而套野鬥法用o既所謂式神居然係1d類似索斯獸o既機械獸(囧
當初阻止人用復活儀式o既男主，結果為自己愛人又用復活儀式。
令我比較在意o既係，負責配北斗o既聲優同配相馬o既聲優，
都係同1個金元壽子，仲諗緊會唔會北斗其實就係佢，又或者，
北斗o既原形其實係當初夏目求其響本雜誌搵個模特兒做出來，
其實果個模特兒就係相馬？結果都無交帶到。
另外CV果度發現有種村梨沙，分別係配年幼版春虎，
同某集o既某女學生(無名)，今時今日屬女主角級o既種村梨沙，
估唔到當年東京暗鴉果陣只係負責配d閒野。

下星期先上堂，呢度部份心得及小發現係個人參透出黎，
未必好有用，但係或者對同樣初學日文o既人有d幫助。

要記生字，就記自己鐘意o既字眼，課本果d記到就記，
記唔到就skip，首先，自己常用或鐘意o既字眼易入腦，
課本有d唔好話日文，就算連中文1年都未必用到1次。

N5、N4程度o既課文先會1堆平假名(尤其是d日能試)
對完全唔識日文o既華人黎講，N5、N4係1堆外星文字。
反而N2以上o既文章好多時漢字仲多過平假名，
完全唔識日文o既華人齋睇中文字都明解到1半 XD

暫時讀左咁耐響50音中最少用得上o既係ぬ，
目前記得有用到ぬ字o既只有「死ぬ」同埋「脱ぎ」，
某程度呢個字係比較陌生，會容易讀錯。

暫時50音入面を字都未讀過係以wo發音，
因為呢個字通常用黎做助詞發音會變做お，
目前亦未學過生字o既拼音入面會出現を呢個音，
可能有o既，只係我資歷尚淺未接觸到。

初學日文電腦1定要裝埋日文輸入法，
雖然話o岩o岩學都仲未打得出咩野文章未洗裝住，
裝呢個輸入法主要用途係驗証生字o既發音，
對於記生字黎講有1定幫助，例如有d字有印象，
但又唔係好肯定係咪咁拼，開個輸入法打出黎就知有無。
如果你拼音係o岩o既佢會顯示呢個字o既漢字，
甚至你要查呢個字係い定な形容詞，係1段定5段動詞，
只要你打出黎接な系統將你前後間開條底線就知打錯，
或者打個動詞接ない出唔到就知前面個音要唔要轉あ段。
當然，你會問點解唔查字典？或者查番自己o既記錄？
你話查字典/notes快d定係用輸入法打個字快d呢？
當要記上千個單字時族頁搵肯定無效率。

唔識普通話o既香港人又要講果陣，會將廣東話讀咩少少音，
雖然唔係百份百準，只要捉到佢o既發音規律都可以撞中唔少，
其實日文音讀1樣係咁，知道發音規律將中文讀咩小小，
就算見到未學過o既漢字都有可能讀o岩佢個發音，
點都無讀讀下日文讀到漢字又up左中文發音咁膠啦？ XD

好似「約束」、「約束する」、「予約」呢d都有く音，
但「約速」讀やっそく、「約束する」讀やっそっする、
「予約」個「約」要讀よやく，明明同1個拼音，
真係唔知佢幾時要讀埋個く音幾時唔洗，怕習慣讀錯後，
好難改番正，搞到唔敢讀？有方法可快速查到正確讀音，
用google翻譯打出黎再o禁喇叭即刻知。

呢個係睇1個youtube教大家點應付N5試o既miss學到，
記生字時請記埋該生字o既相反/相對字(如果有o既話)

學動詞變化時，如果動詞ます形時係い段尾就好多野變，
係え段就乜都唔洗變，又有d動詞同係い段尾但乜都唔洗變，
呢d字唔多，出口老師list左6個比較常見o既，
分別係：浴び、足り、落ち、起き、でき、借り，
當然唔止6個，只係呢6個比較會接觸到先記呢幾個姐，
我搵到第7個，就係生き，呢個玩rpg 1定有接觸到啦。

查實日文漫畫係唔錯o既學日文材料，尤其學生字方面，
因為日本漫畫多數響d漢字隔離注埋平假名讀音。

賞試多d用日文諗野，或內心每諗1句都即刻翻譯做日文，
就算明知文法可能錯都照諗，只為加快聯想日文字o既轉數，
相信持之而行要達到隨心所慾咁講日文會近1大步。
其實唔只日文，學習任何外語都應該要多用果種語言諗野。

同1發音經常有唔同o既字，例如：放す、話す都係讀はなす，
同1個字唔同發音又有，例如：止める可以讀やめる或とめる，
同1個漢字有時有好多唔同發音，例如個「生」字，
先生、生きる、生まれる入面個「生」字發音都唔同。

想扮番工要搵個地方hea大半日，圖書館係個好選擇，
我向來都唔多讀書，對上1次去圖書館都唔知幾多年前，
今日又帶本日文文法大全去溫書，1開始走入普通檯位，
現場大部份都係d老人家坐睇報紙，好似走左入護老院咁，
仲不時傳來d咳聲，感覺都唔多健康，坐到食飯時間撇，
過德福商場食野+hea陣下晝5點又番圖書館睇下乜環境，
呢次直接走入自修室(同圖書館係隔開)情況完全相反，
自修室大部份都係d後生仔女，有d仲著住校服溫書，
無正話個老人院feel咁頹，感覺良好得多，
就咁響呢度再hea到放工時間，1邊帶耳機聽住d日文對話，
(幾日前將文法大全附送隻CD入面d mp3檔入晒落電話)
1邊響本簿仔盡量寫番出黎(練聽力)其實我都堅係溫緊書架。

當然唔少得行下圖書館睇下有乜書睇，有無學日文o既書，
暫時未發現，可能我呢邊呢間細間，不過就響小說欄果度，
搵到我響前公司砌o既小說，估唔到呢度都見到自己個名，
另外無諗過圖書館有得借CD，心諗係唔係古典音樂之類，
居然搵到w-inds同某d韓國組合o既碟，新唔新就唔知，
如果想壓無損mp3檔又唔想比錢買碟，去圖書館借啦 XD