對於否定形有d模糊，好似呢句N3會接觸到o既文法咁，
林擒ほどおいしいものはない[蘋果咁o既程度好味o既野唔存在]
正確黎講係咁o既意思，呢度o既ない係[無]，
但ない亦有[唔係]呢個意思，咁點解上面果句唔係[唔係]呢？
[唔係蘋果咁o既程度好味]例如有人話呢個野有蘋果咁好味，
你食過之後覺得唔係果回事，答[唔係蘋果咁o既程度好味囉]
如果唔係用[林擒ほどおいしいものはない]呢句咁應該點講？

黎多個，食べない究竟係[唔食]、[無食]定亦或[唔係食]？
睇落好似意思接近，但係爭小小就唔係我想表達o既原意。
例如問食唔食飯呀？答[唔食]，問食左飯未呀？答[無食]
問呢個藥點食架？答[唔係食(係飲)]日文都係[食べない]？

中文o既[但係]、[不過]呢d字係接響第2句o既開頭，
所以好多時講左第1句之後先再諗[但係...]，
有時講第1句果陣都未必聯想到第2句有[但係]，
係講完第1句之後先發現好似有矛盾先再補上[不過]，
但日文o既[但]係接響第1句句尾o既[が]
所以變左講第1句果陣就要諗定[但]，
變得要先讀，癲覆晒我o既思考模式，諗唔切囉。
就算英文o既[but]都係放響第2句開頭丫~

日文文法仲有1樣蝦人o既地方，同1個字好多唔同意思，
就用から為例，有時係解[從(地方)]有時係解[之後]，
有時係解[因為]，喂，好混亂囉！可唔可以專1d呀？
中文o既[因為]就係[因為]，[之後]就係[之後]，
唔會有第2個意思丫嘛，所以中文真係世上最簡易o既語言，
動詞唔會有過去式、現在進行式、未來式，
好似英文go咁，過去式went同未來式gone根本變到體無原膚，
又唔洗有被動形、役使形、意志形、否定形等等。

早霸王1開頭通常都係森美發表下佢o既人生哲理，
有時聽落又真係幾有道理，不愧為森美大哥。

講起兩性關係點為之信任，就係你唔去check對方，
都依然信佢先係信任，即係另1半話佢無偷食你信佢，
要查佢手機短訊就即係唔信任啦！信又洗乜查姐？

我衣家合埋手同你講手裡面有個5蚊你信唔信？
你係相信我o既就信有啦，唔會要我攤開比你睇，
如果我攤開左比你睇，咁仲洗乜要你「相信」？

跟住另1個主持就話攤開手明明無5蚊都依然信有，
咁先夠晒信任，小儀即刻疾佢呢d唔係信任係叫蠢！
 

當然topic只係比喻，番新工就撞正黑雨，
帶左遮都好似無帶咁，除左頭之外全身濕晒，
(唔帶仲衰連頭都濕埋)連對防水波鞋入面都濕晒。
出門果陣都仲係細雨，落左巴士都仲未黎料，
其實本來可以幸免於難，係行到過左公司後，
雖然尋日都探左路大約知道公司位置但仲未熟，
行多左1條街口上去，仲響度搵咦點解無o既，
果陣先黎料，如果無行錯路絕對唔洗濕身！

因為大雨無出去食飯，老細決定叫外賣pizza，
不過外賣都唔肯送，到中午後變左黃雨先送。
由於番新工要帶自己d工作證明之類比老細影印，
所以果d響各大公司重要o既「畢業證書」都濕左，
已經有file夾住都奶野，好在未算嚴重，
不過駱克果張本身已有d退色，衣家左上仲化埋。

因天雨關係(應該係?)舊居電視訊號花晒，
亞媽無電視睇就叫我用電腦開套戲比佢睇，
咁就求其上youtube search電影試下啦，
search到呢套大上海，有亞媽like o既發哥，
仲有吳震宇、洪金寶、黃曉明座陣，
就呢套啦唔好煩，youtube黎講呢套畫質相當好，
1定靚過VCD啦，套戲背景應該係民國時期，
講周潤發後生果陣係黃曉明(?)同唱戲o既女仔相戀，
因為幾9唔答8o既原因，比巡部拉左坐監，
然後比吳震宇救左出去，之後就做爛仔拍住洪金寶，
越做越大做埋大佬，然後就變左周潤發，
老實講，其他演員換人都無乜遺和感，
吳震宇、洪金寶直情無換過人，
但黃曉明變周潤發真係勁過日本超級變變變，
喂發哥好似仲老過吳震宇喎，點解吳震宇唔洗換人？
跟住又係日本仔打到黎，吳震宇做漢奸發哥去消滅佢。

基本上套野主要係玩浪漫同埋英雄本色，
勁多唔make sense位，派幾廿個殺手教堂亂槍掃射，
曉明同佢老友兩丁友就KO晒？真人電影都開老金，
然後轟炸機炸到黎，全部人逃難走晒，
全條街只得發哥同佢愛人兩個響度4目交投？
套戲咪就係為左睇呢d場面囉，劇情？行埋1邊啦。
洪金寶又係葉問2入面果個打扮，諗住好好打啦，
全套戲只出過1次手，仲要係打個毫無還手力o既人，
咁呢個角色求其搵個大叔做都勝任啦洗乜洪金寶？
人地吳震宇話晒都係發哥救命恩人丫，
發哥恩張仇報，呢d劇本邊個諗架？

原來MHFG獵團個系統有咁o既設定，只要團長1段時期無上線，
團長之位就會自動讓比副團長，而比較活躍o既團員會補上副團長，
呢個新團長又無上線1排又自動波比新副團長取代如此類推，
依我所見呢個無上線o既日數應該係兩個禮拜，維護後就換人，
上個禮拜我無端端做左副團長，有得玩下就打算整頓1下獵團啦，
丫點知原來副團長根本乜野權限都無，收人唔得、踢人又唔得、
換註文都唔得，同普通團員有乜分別呀？咁做副團長有乜用呀？

今個禮拜變左我做團長，即刻將d60日無上線o既團員踢走先，
唔好搞到個團死氣沉沉咁，仲諗住收下新人，撞正今期狩人祭，
點知衣家唔比我參加，頂丫赤組蒼組都唔係o既團點好意思收入呀？
上個禮拜我做副團長都有試申請參加狩人祭，要團長先比申請，
早1個禮拜比個團長我做就可以入魂啦！硬係要衣家先比我做，
團員唔知可能以為我做乜唔參加，係參加唔到呀，陷我於不義。
仲諗住趁狩人祭期間整個小號放置團都好丫，叫做有d假人氣。

原來獵團系統仲有咁o既設定，1個月內無4個人上過線就解散，
目前都仲叫做有我同埋3個20日內有上過線o既人響團，
有個每日都上線o既團員今日都走左，剩番果d唔知會唔會走埋，
所以呢個團都唔知補唔補得住，都係等狩人祭完左再收人啦。
唔知其中1個有上開線o既突然走埋剩番唔夠4個1個月內有上線，
會唔會即刻解散呢？(汗