平時響舊居用BT download野有500kbps已經唔錯，
最高時上到7百幾o既，1向都知網上爬係慢，
諗住其他寬頻都係千幾kb/s，新居用3上網，
用BT download野o既速度居然超過5000kb！
差唔多係舊居o既最高平均值o既十倍速度！
upload方面都見過超過千幾(未知最高去到幾多)
舊居upload呢？唔好提啦，60kb算多啦(唔好提又提？)

最近都無乜點玩MHFG，蔡記都無on過，
幾個禮拜前佢月費到期都無再包月，
佢走左去玩bloodborne，話就話會再番黎，
不過我諗好難啦，1但脫坑就好難番轉頭。

早3個禮拜都無乜吸引o既任務同課金裝，
係開左烈種黑川，同埋開多次極征天翔囉，
今個禮拜有第1回獵人祭+第3回大航祭，
佢都話會番番黎打大航祭賺公會P，
呢兩日星期六日咪又係無出現過。

估唔到熱情淡得咁快，好心台卡檢討下啦，
開saber裝、初音裝、G銀火雷轟、加快改版，
留住d人氣，PS3/PSV版都未出熱潮就散啦，
咁個款點涯到2019年(好似話合約到期)呀？

新居電腦都裝埋Bamboo咁就可以響果邊都有畫版用，
塊畫版又唔係大又唔係重帶住兩邊走都唔係大問題。
裝完之後發覺win8之下居然比win7運作正常！
就係唔會枝筆1點落去塊版出果個圈圈d線條硬直晒，
唔洗每次入去服務果度熄左個tablet pc input service。

然後裝埋落imac度，原來以前ravi(定黑Q)所言非虛，
mac系統係唔對應Bamboo枝筆，唔係無筆壓咁簡單，
係點落去之後旭唔到，只支援觸控操作，搵手指畫呀？
明明隻碟安裝到落mac但最重要o既功能可以鬼隱左。

見facebook經常有人分享d實用產品，
例如有個浪衫架摺埋只係1本黃頁咁上下大，
攤開高過個人類似摩天輪咁o既圓形架，
好正，唔浪衫果陣收番埋勁慳位。
又見過1把剝蛋殼器，不論生蛋熟蛋1樣剝到，
仲可以set到隔開d蛋黃淨要蛋白，乾淨利落。
又見過1把摺埋好似白菜咁o既雨遮，
1向都覺得平時d遮造形好悶，係呢把最搞鬼。
又見過1個刨，可自由set刀片位置或更換，
可以將d食物切出唔同形狀o既絲或片，
連波浪紋果d薯片都切到。
又見過1個金屬裝置(?)都唔知點形容呢舊野，
可以隔開d水撈起d野同埋摺埋超薄易於收藏。

最大問題係，全部都得個睇字，香港無得賣，
明明好實用結構又唔複雜(無電子零件或晶片)
睇落應該都唔洗好貴頂多都係幾百蚊。
但睇到買唔到真係好克人憎囉！
 

1套好o既作品，係明知結局係點樣，都照樣睇落去，
而且仍然感動流淚，呢套就係咁，都明知女主角死硬，
基本上只係睇22話前可以將我o既情緒炒到幾沉重，
然後22話宣布宮園薰死訊果野可以有幾悲壯幾虐心。

套野另1吸引力就係，咁樣o既人同咁樣o既人1齊，
佢地o既發展好令人期待，或者會擦出咩野火花出黎。
各角色內心描寫仲多過對白，全套野都係睇佢地諗乜，
無可否認個人覺得相座兄妹同繪見o既劇情係有d多餘，
仲有d拖戲之嫌，最關心o既都係公生同薰o既劇情。

22話公生克服左心理障礙，響佢演奏完升學比賽果刻，
直接跳去墳場拜山，名次都無交代(呢1刻已經唔重要)
心諗洗唔洗畫畫畫出腸，連比個腦補空間觀眾都唔得？
然後果封遺信先勁，道出其實5歲果陣薰已經暗戀公生，
就算第1話公園初遇，薰響d小朋友面前表演流眼淚，
果滴淚其實都係因為可以認識到夢中情人公生而流，
4月謊言呢個劇名就係薰講大話話自己鐘意渡而命名，
打從開始薰就處心積慮去溝公生(搶樁愛人)係個壞人，
而且佢同公生出街時要公生幫佢挽手袋，經常鬧公生，
甚有港女/公主病典範，縱然咁衰咁狡滑但完全唔克人憎！
宮園薰o既耀眼光芒強大到無論做咩野都無損形象。

仲話之後會有OVA版，仲可以點樣？講公生同樁1齊？
定係講無左宮園薰之後o既日子點過？夠啦！唔想睇！
除非佢講薰復活或者同佢鬼魂1齊(咁變左科幻/鬼片？)
再唔係話其實薰只係扮死o厄公生，其實未死o既。

套野真係製造左好多遺憾，公生對薰o既真情否白，
就算連面對面都只係響內心講，點解唔講出口？
真係睇到想煎把佢，而薰自細立志要同公生合奏，
咁多集真正響舞台合奏過只有1次而且仲1塌糊塗，
仲有o既，最尾1集有以靈魂狀態同公生合奏，
呢1刻靈魂出竅或者已經意味住手術失敗啦。
當然亦可以係公生幻想出黎o既景象，
但薰o既靈魂到現場支持公生咁樣諗浪漫好多。

有諗過如果套野薰完全吸引唔到公生會點呢？
公生只係當薰係友人A，套野就唔會咁催淚 XD

宮園薰其實都幾唔make sense，可以響鐘意o既人面前，
表現得淡定仲要向佢吐糟，呢方面樁o既表現就科學得多。
另外薰受病魔煎熬依然散發陽光活力，勇敢積極面對，
唔會自暴自棄發放負能量，呢種表現已經好刺眼，
果然呢種人格只係響故事世界先會出現。
仲有1個大bug，明明宮園薰父母都係黑頭髮，
點解佢會係金毛？！ XDD

睇到論壇有個post話公生之後同邊個1齊好，
我會覺得係繪見，雖然佢個髮型已經鑿左路人兩個字 XD
但佢已經係薰以外最亮眼o既女角，有相同電波o既人，
發展都有所期待，樁呢？雖然佢戲份多，仲要表埋白，
但我唔會承認佢 XD

音樂方面，我唔係咩音樂家，所以都唔知佢表達o既情感，
例如佢話節奏鬆懈起黎，我心諗，有分別咩？ XD