通常臨訓教前都set電腦做sleep mode，
起身調1下風扇o既度數，電腦又著左，
明明距離個mouse好遠無可能旭到，
無理由放置play咁耐早唔著遲唔著，
係我起身先黎著架，試多幾次之下，
發現原來個風扇掣居然係另1個電腦開關 XD

雖然個風扇的確係同電腦插埋同1個拖版，
都無理由有關連架？真係令人費解。

不過只有開風扇或由1度調去2度先著到電腦，
熄風扇係唔會著到。

前幾日買o既窗簾布改短都唔洗等1個星期，
尋日宜家家俬send短訊通知我拎得，
雖然今日Rainbow Gala我都有出9龍灣，
但無去RG而係去MegaBox，響新居答的過去，
跳兩次標($25.2)就到步，估唔到今日超多人，
咁大間宜家家私周圍都係人，好多家長帶小朋友黎，
覺得間野似玩具反斗城多過似家私舖。

點解topic叫新居改善計劃，今日除左拎窗簾，
仲買左花灑頭、電子驅蚊器、衣架式乾衣機，
同埋個掛牆時鐘響宜家賣$10.9炸。

先講窗簾布，安裝左上去算係fit size，
可惜硬係覺得呢隻布質感覺好cheap，
而且透明度高容易比對面望到屋入面做緊乜，
不過呢個只係試水溫，衣家總算試到o岩size，
遲d訂造塊靚布質o既窗簾。

換左窗簾自然綁響窗花上面o既浪衫鐵線要移除，
取而代之買個浪衫架，諗住買呢個衣架式乾衣機，
貪佢就咁擺響度唔開著佢都算係1個浪衫架，
可惜連埋個笠套放響屋企勁阻訂，只能拆左個套，
只好要用果陣先笠番佢，另外開著佢都幾暖下，
或者冬天可以充當暖爐，響DSC買588蚊。
有小小後悔，其實應該買齋浪衫架可以摺埋好慳位，
然後再買多部抽濕機應該1樣解決到潮濕曬衫問題。

新居個原裝花灑角度無得調較，d水射出晒範圍，
都唔知邊個腦殘設計，點會無得較角度架？
所以響實惠買左個實惠牌花灑頭135蚊，
呢個花灑頭弧度偏低插上去d水無咁易射出界，
缺點係佢5種水壓模式就係無平均形，
兩個外圍射水1個弱水壓1個集中輸出1個慳水模式，
個慳水mode整黎搞笑架？只係1路滴幾滴水想點？

最近新居都有蚊患，所以要整番個蚊香，
想試電蚊香，新居樓下間百佳居然賣晒，
要搞到隔離屋村間惠康買，衣家試緊個蚊香，
不過好似無乜料到仲聽到隻蚊飛黎飛去...

個時鐘未掛，遲d先諗邊個位好掛，只係買左先。

兩個禮拜前更換自己qooza blog個介面，靚就幾靚，
但係有問題出來。例如篇blog有貼圖而圖片較闊，
呢個介面之下係會強制裁左張圖，鬼隱左右邊果忽，
仲有用mac個safari開呢個blog係會無晒d內文，
另外睇真d內文介面頂端同底端果張模仿撕爛張紙個位，
壓縮過度解像度好低起晒渣，遲d再換過第2個界面。

唔知邊個講話旺角有窗簾賣，尋日落旺角周圍搵，
連女人街都行雲仍然遍尋不獲，轉戰宜家傢私，
上網查過，全港得3間分店，1間沙田、1間9龍灣、
1間銅鑼灣，乜咁少架？呢幾日住新居就落9龍灣果間，
間野響mega box入面，答地鐵落德福仲要轉接駁巴士，
轉車都算，居然架接駁巴士排晒長龍，星期4下晝喎，
咩事呀？心諗間商場地段咁唔方便都唔方有人氣啦，
點知去到又唔係喎，同1般大型購物商場1樣幾熱鬧，
然後搵到間IKEA，有兩層，佔地超大，我行左好耐，
先行得晒晒全間舖，比我o既感覺好似外國d大舖咁，
原來地段差但勝在地方大，可能租1間價錢等如出面3間。

anyway啦講番窗簾，終於響IKEA搵到，可惜款式唔多，
無乜邊款o岩心水，不過都求其買塊用住先啦，
都唔知邊度仲有，但d窗簾大部份都係145cm x 250cm，
我諗我屋企樓底都未必有250cm高(門先得200cm炸)
實唔o岩用啦！而佢地有代客裁剪服務加多30蚊，
但係要等多1個星期，有無搞錯呀？cut塊布再啤口姐，
即場搞掂都得啦洗鬼1星期？唉1星期就1星期啦別無他選。

total199+30蚊，喂又唔貴喎，係驚cut完都錯size姐，
我叫佢改5.5尺，佢話洗水會縮水落單5.6尺，希望fit啦。

完左主任順便再行下個商場，哇呢個場真係傢私集中地！
又實惠家居又家居21，不過問過呢兩間都無賣窗簾。
大商場有家私舖係正常？慘得過太古城、德福1間都無。
 

排緊隊等的士，排我前面係3個細路(應該唔過小學3年級)
其中有兩個渣住個氣球，果兩個細路係咁用個氣球打對方，
心諗咁玩法隨時爆波，排隊等車好悶通常都睇書或者手機，
但佢地係咁fing黎fing去無法專心囉，唔知個波會幾時爆，
想走出條隊，不過排我後面都幾多人，無理由排到1半放棄，
只能祈求快d黎多十幾架的士載晒前面堆乘客，都等左好耐，
慶幸到佢地上車都未爆。

細路，咁多野唔玩點解係要玩氣球姐？唔係唔比你玩，
番到屋企咪玩飽佢囉，硬係要排隊等車呢d走唔到o既位玩，
前面果d家長又唔阻止佢地，就好似放左個計時炸彈咁，
搞到企佢後面都有壓力，玩爆個波會嚇親附近d人架！