目前新居理論上仲好乾淨，唔應該有咩蟲，
(雖然無記錯之前都出現過甲由...)
不過今日響廁所發現掛窗口裝洗頭水個兜，
有幾pat好似白色沐浴露之類痴住堆黑色1點點，
初時以為係1堆蟻，以前舊居都發生過，
1堆蟻嬲住d牙膏(果隻高露潔牙膏甜甜地惹蟻)
睇真d，果d唔係蟻黎！前半部似蟻後半部得條尾，
而且旭到果d類似沐浴露，果d謎之蟲開始著草，
好似飛行服務隊響直昇機遊繩咁降落(好在速度慢)
2話不說即刻用花灑將呢d唔知咩蟲沖落廁所先啦！
然後清理下個兜，見果d蟲響廁所慢慢爬番上去，
哇！咁沖落水都唔死得？咁頑強？！再沖廁，
暫時應該解決左，廁所周圍都再噴d殺蟲水，
以減低漏網之魚生存機率。
 

上年舊居房間果把風扇條支撐柱又斷左，
(之前都斷過用牛皮膠紙格硬痴番再用1排)
雖然亞媽有意想補番，當時天氣開始轉涼，
我堅決怒掉，反正D風扇又唔係貴，
唔洗為左件百零2百蚊o既野補黎補去呀fa?

1直都想要放直立式風扇，無咁阻訂，
尋日響日本城買左把伊瑪牌扇風機399蚊，
(伊瑪牌？南洋伊瑪打就聽過，乜有出電器？)
本來都諗過買新居果把JHE牌再平100添，
貪呢個伊瑪牌出風位高過JHE小小(真係好小)
本住試下第D牌子o既精神，就買伊瑪牌。

買番去後，造工睇落幾扎實喎，
外層用左光鮮滑膠質感都比JHE果隻靚，
組裝方法同JHE果把幾乎1樣，
不過我都要將把野上下倒轉先方便組裝，
趁亞媽出左街放響佢間床組裝 XD
都驚把風扇漏油(JHE果把推跌左試過漏油)

舊居間床比較低，就咁擺都食到呢把野D風，
新居間床好高，把JHE要放響電飯煲盒上面，
個風口先夠高吹到。

我諗美中不足就係呢把無得換隔塵網，
用耐左如果績聚左D塵都唔知點清理。
妖幾百蚊之嘛太污糟咪掉左佢買過把囉 XD

以下純粹個人對高達o既偏見，不代表呢隻game差。

或者高達已取代左KOF同街霸等格鬥game王者地位，
(雖然D機械人打黎打去但我唔多覺高達算格鬥game)
但1直以黎我都唔識玩，拿，KOF我都認自己識玩架，
只係渣姐，高達比我o既感覺就係~~不受控制。

即係明明覺得呢刀劈落去係可以劈中對面部機，
但點解劈唔中o既？反而仲比佢劈番轉頭，
明明覺得呢槍可以射中但又唔知點解射唔中。

換轉KOF，我跳埋去重拳起碼扑左落去交足貨丫，
最多佢檔左或者迴避碌走左，但位置無乜偏差，
唔會明明跳過去重拳對方企定響度我都係打miss。

除左無乜距離感，仲有無乜方向感，
都唔知自己飛左去邊亂咁飛，總括黎講，
響呢隻game我搵唔到操控順利o既成功感。
就算負碌打贏人都唔知自己點贏，亦無成就感。

正因為呢個網誌係我重要o既記憶之1，
唔排除有朝1日呢個網會突然摺左，
又或者摺果陣無任何幫客戶備份o既機制，
就算得兩3個月期限要手動備份都唔夠，
(唔洗番工或做其他野咩？咁得閒齋backup?)
7年黎過千個blog喎，唔少野架，
2013年開始有間中backup緊部份blog，
到今日終於將2008至2014年o既blog備份晒。

點備份？咪開個日誌資料夾，裡面分年份資料夾，
每個年份資料夾入面再分12個月份資料夾，
之後將每篇日誌copy & paste落個txt檔度，
每個txt檔名都寫番日期同埋日誌主題。
聽落好似好簡單，但我已經用晒hotkey，
即係highlight完ctrl+c再ctrl+v再ctrl+s，
然後alt+F4咁樣，又唔可以ctrl+a select all，
會連左邊欄目位、日曆位、廣告都select埋，
唔止內文，個檔名都要paste番個題，
每分鐘只能夠整到3篇，整4篇都好窄，
所以要備份1個寫滿30日o既月份黎講，
最少要10分鐘，未計手殘select錯位，
有時內文用左D香港字或日文會save唔到，
要將D香港字改做同音字或者轉unicode，
呢D位又擔誤左時間。

backup d有相片o既文章都比較麻煩，
由於txt檔落唔到相片，所以相片會另行儲存，
相片檔名改番同日誌同名，多過1張就加數字，
然後內文果度好似雜誌編輯D入稿咁樣，
加番乜乜乜.jpg響相關段落下面。

點解唔用word檔或者其他黎backup？
我係想做到最大相容格式，去到mac機都開得。
反正我有落相片o既日誌數量唔算多，
尤其意識到backup唔方便，2013年打後d日誌，
如非必要都盡量唔落圖。

都有諗過再搞埋分類資料夾，又係龐大工程，
不過就咁響資料夾search番個分類名，
就list晒相關o既分類文章(每篇野都有寫分類嘛)
好方便，所以根本唔洗額外整分類。

其實我2008同2009年得好少blog，
衣家閒閒地1個月都寫超過當時1年o既總量 XD
 

都寫左超過1000篇日誌，係時候換下新口味，
轉左呢個新版面，更符合網誌主題~

不明飛行記錄

感覺好似1個記錄資料o既file夾...
(其實睇真D都唔知係乜 XD)
呢個都係qooza預設o既模組之1，
直接用唔洗煩。