新_線個MHFO都摺左兩年，雖當年響佢摺之前我就脫出左，
但總會有手㾗想玩番o既時候，正如RO都斷斷續續玩唔少次，
早排仲同蔡記傾開日服MHFO，又話可以轉釘宮、花澤配音，
好吸引，概嘆要玩日服要翻牆要課金包月又無渠道好唔方便，
點知MHFO靜靜雞又重返華人市場，仲要開左兩個幾月，
諗諗下上次同蔡記傾MHFO果陣台服可能已經開番，
唔係睇睇下巴哈見到個MHF廣告，我諗到家下都完全唔知情。

今次仲係無代理camcom親自做番，不過又話時話有得做咩？
都曾經目睹新_線版MHFO興衰，呢D技術要求極高o既game，
得D老米會玩，心血來潮玩兩野就話姐，你要人包月喎，
邊行得通架？除非capcom唔怕蝕1直run落去啦，
唔洗比版權費只係開1個server有心做唔係咁難掛？
衣家o岩o岩開都叫做幾熱鬧，呢團火唔知可以維持幾耐。

anyway啦，就創角入去睇下有乜分別，D譯名好似有D唔同，
例如輕奮菇變左心跳菇，笑左，又搵唔到以前o既6怪鳥任，
想當年就係打6怪鳥起家，不過衣家好似有3倍HRP，
低HR時幾乎求其做個任就升1HR，唔知係期間限定定長期有，
HR13做個HRP櫻火連升兩HR添，最大分別係有NPC陪出團，
類同以前o既賴狩人不過果個要同玩家簽約仲要得1個(好似係)
衣家出個任有兩個NPC同行下位狩獵都0針解決。

最重要當然第1時間換釘宮把聲啦，果把仲係典型o既夏娜聲，
1路揮劍1路聽住釘宮把聲靈舍爽 XDDDD

太耐無玩好多野都唔記得晒，又再上巴哈爬半日文，
衣家無課金裝就整萌芽武，據聞係百位之前頂尖性能，
下位上位武器就1把搞掂唔洗點煩啦，比以前易上手好多，
咁又係o既，衣家出到HR999後G位又SR又霸武又烈武，
仲同你搞套上位裝搞成個月？玩到2016都未上G位啦。
新武器種類穿龍棍好吸引，睇D影片好似air combo咁，
好型棍，但係要G位先比用，咁咪有排？
不過o禁下D路人偷睇佢地資料，都幾多G位友，
應該都唔洗好耐就有得玩棍掛？

唔知今時今日MHFO o既生態又係點呢？
係咪開火事、先讀陷阱、麻暈大法、卡蕀龍剛票、
打馬卡狗隆、4弩卡柱、雞霸國民裝等等...
真係越講越懷念以前o既MHFO，
唔講都唔記得以前大家都玩到咁pro，
係度報導係咁多先，玩耐D感受下新MHFO後再講。

響大家真風騒聽到幾個關於動物o既事：

如果渣緊車突然有條濕潤o既巨大柱狀物，
貼住塊檔風玻璃，架車又比條野綴住左，
你會有乜反應？唔係特攝片先出現呢D情況，
今日外國一個國家公園有隻發情大象走出黎，
見到車就走埋去un，名附其實o既車震 XD
由於架大象夾住架車，架車又走唔到，
但車主都係要留響車廂入面，如果走出車，
隨時會被襲擊，發情期o既大象係好有攻擊性。

蟻多嬲死象唔只係俗語，有機會係事實，
有隻象行行下森林撞到棵樹撞跌左個蜜蜂竇，
D蜜蜂當然就傾巢而出猛針隻象，
不過象皮咁厚，D蜜蜂針得入咩？
D蜜蜂都蠢唔晒，專揀隻象最嫩o既部位黎針，
例如眼睛、象鼻入面D肉等等，
結果都真係將咁大隻象活生生針死！

早排綱絡上出現一張好得意o既大頭狗相片，
好似多年前the dogs系列魚眼鏡影D狗相咁，
不過呢隻咁得意o既狗背後係一段慘痛經歷，
話說隻狗本來都係比例正常o既正常狗，
有次行行下街見到地下有個皮球咁o既野，
手多多走埋去搞佢，原來個皮球係蜜蜂竇，
針到佢變大頭狗，隻狗救得番無生命危險，
算係不幸中o既大幸。

有人見到隻松鼠狗好可愛就買番屋企養，
不過隻松鼠狗同佢屋企d貓貓狗狗唔多夾，
有日隻貓唔見左，問佢老公有無打開過門，
佢老公又話有，之後響屋企附近張貼晒街招，
無下文，又過左一排連隻狗都唔見左，
貓就話離家出走一去不返姐，狗好少會咁喎，
主人又再響屋企附近張貼尋犬街招，
後來先發現原來佢果隻松鼠狗係狐狸！
D貓貓狗狗係比狐狸食晒！聽完個故仔，
我就有疑問，真係食左點都有D殘渣血績假？

有個屋企養貓又養魚o既人D魚經常唔見左，
佢以為係隻貓趁佢唔響度偷食佢D魚，
咁個魚缸有蓋衾住，D魚唔見左個蓋又無打開，
咁好手尾？隻貓食完識自己衾番好個蓋？
唔通有賊入屋？都唔會剩係偷走佢條魚假？
主人裝閉露電視之後先發現真相，
佢一直都怪錯左隻貓，D魚係比D魚食左！
只怪佢買魚果陣無搞清楚果隻品種o既魚，
將D食魚o既魚同D魚放埋一齊。

平時酒樓會養條大龍等，千其唔好比細路搞佢，
龍等好惡架，除時比佢一啖食左佢D手指，
有時D酒樓要show條龍等有幾生猛，
就搵D平價魚放埋落去，條龍等一啖就食左。

國內受保護動物之一o既娃娃魚，
亦係存活之今o既史前生物之一，
點解叫娃娃魚？因為會發出BB仔喊o既叫聲，
米睇佢個樣咁萌，其實係似鱷魚o既獵食性生物，
又係連同類都照食架。

俗語話大魚食細魚，魚係會食自己D同類，
唔單止魚，獅子都會食獅子，
例如隻獅子打贏另一隻獅子搶走D獅子乸，
佢係會將呢隻獅子乸之前生o既獅子仔食晒，
驚有朝一日呢D獅子仔大個會為父報仇，
乜動物都會諗得咁長遠架咩？
科學D講其實佢只係剩係保留佢o既基因姐，
唔屬於佢o既遺傳因子全部消滅。

公園一向都唔比人放生動物，
試過有人響公園D池塘放左隻鱷龜，
第二日池塘D魚比隻龜食晒...

越睇就越覺得前女友好似神通改二，
果種深藏不露o既眼神，或者叫藏神，
加上淡定o既笑容，雖然年紀較輕，
但最有大姐姐果份成熟o既韻味，
可靠o既感覺，會保護到重要o既人，
簡直係溫柔、文靜、乖巧o既模範生。

神通未改前只係一個病弱少女，
缺乏自信o既表情，尋求有人憐憫，
川內3姐妹中神通應該排第2(好似係)
仲有個睇落天真o既蠢貨細妹那珂。

查實川內改二係我最buy果type，
自細到大都對忍者有d情義結加晒分，
自信o既樣加帥氣o既甫士，英姿凜凜！
表情亦有股壞主意，似乎會惡作劇，
同佢一齊應該好玩得唔會悶。

不得不讚負責畫佢地o既繪師bob，
只係一張立繪就表現出角色深度個性，
唔係京亞尼果d大眾臉(剩係髮型唔同)
好想睇多d川內同神通o既其他日常，
搵到bob個p網(唔確定)可惜無半隻艦娘，
睇佢o既作畫水準確實符合bob應有功架，
但係睇佢收藏作品果度就有d微妙，
作為艦娘官方繪師之一o既佢，
居然收藏其他人畫o既川內同神通？XD

利申：其實我一次都無玩過艦娘，
最近套動畫版都未睇過(bilibili又唔比睇)
只係因為插圖精美所以有留意下，
所以川內神通o既性格純粹個人腦補，
如與公式設定不符我恕不負責 XDDD

ie睇噗浪會hang，用google search圖d一定變低清，
甚至有機會搞到RO個patch無晒反應。
咁索性唔再用ie轉用firefox啦，但firefox又有第d問題，
例如上巴哈會睇唔到頭像o既裝備。
響blog或論壇打打下字D方向掣會失驚無神用唔到，
用safari呢？上youtube就話唔擊援，
開facebook就不斷reload，真係各有長短喎。
chrome比較少用，暫時未發現有乜毛病，
可考慮主力用chrome。

咩時晨八字星座出生o既人就有咩性格、體質、命運，
係受到果期o既星體磁場影響，呢D就比人話迷信丫，
不過邊日出生o既人壽命長短就有小小科學根據喎，
有科學家做左200年統計(世代相傳？)得出一個驚人發現，
有一堆特定時期出生o既人平均壽會都比其他人短5年，
研究點解有呢個現象，發現呢個時期係太陽黑子爆發期，
太陽黑子爆發產生強大o既能量唔單止影響地球o既電腦、
干擾通訊系統運作，仲會損害到果期出生o既BB，
而太陽黑子爆發週期就每11年一次，對上果次就2011年，
再上一次就2000年，再上一次就1989年，再對上1978年，
如此類推，呢D年份出身o既都有機會比其他人短5年命，
當然講緊係自然死而唔係意外死啦。

其實又點計出短5年？A當佢100歲命短5年都95歲，
B得90歲命就算無短5年都係唔夠短5年o既A長命喎。