我真係好鐘意睇廣告架！不過係日本CM果D，
第一次接觸日本CM應該係細個去唐姐屋企，
睇佢播日文版幽遊白書錄影帶(果陣未有VCD)
果個係直接錄日本電視台，所以夾埋D廣告，
已覺日本廣告特別有味道(明明都唔記得乜廣告)
VCD當道時期，呂少買左隻日本CM大賞，
果陣上佢屋企一齊睇，已經覺得好正，
記得有個CM整到D馬桶好似議員咁宣傳政岡，
之後自己都買番隻，全隻碟只係睇廣告喎，
你話平時有乜理由會想坐定定睇廣告丫？
見到都想轉台啦，都唔睇你點達到宣傳作用？
日本仔就做到廣告都咁精彩唔想錯過！

不過之後又無乜接觸日本CM，闊別咁多年，
今日見有人facebook貼2014年度日本CM，
又令我再上廣告癮，上youtube再睇過百個，
日本廣告比我o既感覺就係賞心悅目，
佢地好識製造爆點令觀眾對佢件產品印象深刻，
而且萬物階可萌，連個車胎都萌得起！

唔似得香港(大6更甚)果D一味自己吹虛有幾好、
有幾勁有幾多人用緊，一堆功能質晒響30秒，
止咳、化痰、慳電、輕巧、防UV、美白......
好似上堂咁灌入觀眾意識，大家覺得上堂係點？
就係訓教想快D落堂，廣告做到咁會掂咩？

從廣告可以睇出當地o既民族品味、觸覺，
日本係有創意、優雅舒適、好玩多姿多彩，
真係最理想o既生活國度。

上星期維護完妖術轉唔到魔咒術打怪有殘像問題多多，
官方無關機搶修都算，今個禮拜維護完問題依然存在！
點解可以由得佢？咁小事一個禮拜時間都解決唔到？
兩個禮拜前明明無問題，又無更新，點解無端端出事？
喂真係解決唔到都出個公告交代聲其實只係顯示問題，
唔影響實質運作叫大家稍安無噪丫？唔好當乜事都無！
官方D處理手法真係令人氣憤，D卡未實裝又要扮裝左，
之後靜雞雞裝番，咁大間公司做野可唔可以透明D呀？
有就有無就無錯就認打就企定，D人咪唔會咁鼓譟囉。
可以咁唔理民怨，一定係好賺到唔怕D人走啦下話？
通常諗「唔鐘意玩就米玩，你唔玩仲有大把人玩！」
唔憂做先至咁大牌hea做。

巴哈RO版存在住兩個熟悉RO公式o既版友，
就係菜花同琉_廣，雖然尊敬佢地o既專業，
但每次佢地回答問題list堆(x+y)/n*2數式出黎，
睇到都暈，我都直接skip左佢唔理 XD
有次又有人問D公式野，琉_廣走出黎回答，
並且話就呢個問題較早前都同菜花討論過...
哇~呢句野有一種高手過招o既情景 www
(播放「論武功~俗世中不知邊個高who哈！」)
感覺世上佢地講o既語言只有佢地先溝通到，
其他凡夫俗子都聽唔明佢地up乜 2333

答應一位台灣朋友亙寄當地零食，到今日先兌現承諾 XD
上星期響百佳執左一堆香港製造香港品牌食品準備寄去，
其實今次算第2次寄大份野到海外，之前都寄過比前女友，
寄果陣仲有關係，寄之後無再聯繫，所以寄唔寄到無下文，
果次係寄幾本我負責o既雜誌、叢書，就咁用個公文袋袋住，
好似平時寄信貼郵票咁寄，後來分手後比較想佢寄失...

今次就正式用郵局賣o既郵寄箱(15蚊個JOYpack)，
其實都矇查查唔知咩程序，去到郵局見步行步啦，
見有得索取寄包果表格(分普通同特快添)，就拎黎填，
個表格1set3份過底紙，原來都要填好多野下，
除左填寄件人(即自己)同收件人個名同地址之外，
仲要詳盡申報包果有乜物品、類別、幾重、價值，
我就寫港式零食：薯片、牛仔片、公仔麵、餅乾、
奶茶、啫喱、咕嚕醬等，價值HKD70(都係大約姐)
填完跟住拎去櫃檯比職員鎊重，我揀特快專遞，
諗住當寄聖誕禮物比佢應下節，咁就150蚊，
寄個費用仲貴過包果入面D野加埋o既總值呀~ XD

表格撕開個底係張貼紙，然後貼響個箱上面，
之前聽過搵順風/黑貓寄包果可能會check你箱野，
所以我都無用膠紙封實個盒拎去郵局，
郵局個職員話佢地就唔會(無權？)check，
不過海關就有可能check，我話要搵膠紙貼番，
(仲響文具舖買左卷細細個12蚊o既膠紙座添)
點知個職員幫我貼埋唔洗煩 XD

補充：液體唔寄得，爭D想擺埋包維他檸檬茶落去。
寫名果陣我都唔知佢真名，就咁用佢facebook個名，
好在佢facebook名都算正常，唔係D咩中二病名，
真係寫唔落去 XDD

亞視連報新聞途中都會叫「無稿呀！稿呀！」
話晒做左幾廿年主流媒體之一咁大間公司丫，
點解可以一直拖欠員工薪金拖到街知巷聞？
又話等續牌乜乜物物，你唔係諗住續唔到牌，
就走佬或者宣佈破產索性唔出糧呀fa？
續唔續到牌都係要出糧架啦，拖乜姐？
我就唔信亞視D老細真係無錢比呀。

近年亞視D節目只有買人地D劇(又唔係hit果D)
靜係識得整埋D唔客觀o既時政評論節目，
觀眾都唔buy啦仲要整，識唔識咩叫市場反應？
試左水溫唔得就收手啦，堅持落去做乜姐？
節目質素仲要低劣到口音唔正o既都做得主播，
唔止atv蕉點呀，仲有好多都係講唔正，
跟住日日播埋D「昏睡百年國民漸已死」，
你真係唔方唔死啦，整個台用黎自high架？
技窮到響黃金時段重播N年前計中計狀元才，
呢個係主台唔係咩野流咩歲月台喎，
重播殭屍約會夠膽搵一班9唔答8o既人宣傳，
響商場搞到新戲上映咁但一個演員都無出席，
你知唔知個醜字點寫架？你都知殭屍掂啦，
咁你就拍多D呢D劇出黎啦，以前咪幾好，
識得緬懷過去點解衣家唔去重新發憤呢？
夠膽公開話唔須要拍劇咁o既野都講得出？
D人真係好鐘意聽你地講廢話？聽電台唔好？
最近又播埋D大6抗日劇連配音都懶得做，
直接講國語，咁不如睇大6台唔好做乜睇你？
衣家D人傳亞視播唔到年尾添呀，
丫你都仲好意思整個廣告咩2015年新生活，
做乜要死撐姐？認衰仔可能駁到D同情分啦。
如果呢D垃圾都續到牌，節目質素只會垃圾化，
香港咁多年黎建立o既電視水準就會崩壞。

大把人想睇o既hktv就一直唔發牌，
大把人想佢摺o既atv就死唔斷氣，
世事就係咁奇怪啦。