小弟一向唔賭博，最近學開掌相，
話說太陽指下面有星紋就有中獎運，
(只係抽獎容易中，同賭博無關)
易D中炸唔係實中，有得中總好過無，
睇睇我掌，咦！都勉強有個星紋喎！
雖然個星紋缺左一橫同埋好淺色...
話唔定呢個偽星紋(?)都有D中獎運呢，
據講個紋會消失o既，趁仲有呢個紋，
好！從上星期開始每期都買六合彩，
六合彩應該唔算賭博算抽獎掛？
唔理啦，好地地有乜獎比我抽姐？
打算拎2000蚊買100期電腦飛，
100期內睇下中唔中到幾次安慰獎，
1次都中唔到o既話証明呢個紋無效啦。
點解唔自己畫number？懶得諗啦，
假如個天要比你中，電腦飛都中到。
無諗過中頭獎2獎，如果中個3獎都好丫。
買左幾期先知道個系統都幾無彈性下，
唔可以買兩期飛，最少要買5期，
仲要係同number連買5期果隻。
諗住有時多人唔想排隊用機器買，
點知部機唔支援8達通亦無得攝銀紙，
用提款卡買之前仲要向銀行申請，
搞到下下都要去櫃位買(都係無8達通)
喂買廿蚊野炸喎洗唔洗咁麻煩呀你？

電擊文庫隻fighting climax就出左無耐，
呢隻係集多套人氣動漫主角o既大亂鬥，
就籍住呢個機會借題探討下主角類型啦。
(其實以下內容同隻fighting climax無關)
留唔留意到D主角黎黎去去走唔出幾類：

智慧犯罪型
呢D主角邪氣、聰明、冷靜、臨危不亂，
多數都做出一D有違普世價值o既罪行，
響佢地心目中呢D先係正義。
例子：魯魯修、夜神月、兵部京介

內向型
呢D主角怕事、不擅社交、甚至比女仔洽，
或者經常出現內心爭扎，可以話係抖M，
但係暴走起上黎威力可以好驚人。
例子：金木研、碇真嗣

木口木面型
呢D主角唔多出聲、吱都唔笑。
如果佢唔係有鏡頭優先權o既主角，
佢身邊o既人一定比佢更耀眼。
同內向型唔同，呢類型往往出奇鎮定，
對女仔唔會面紅，乜野事都嚇唔到佢，
甚至拎枝槍指住佢都唔會向你求饒。
例子：黑子哲也、Gundam00剎那

金手指型
呢D主角係天才、任何事都從善如流，
形象正直、斯文、簡直係模範生。
對住女仔表現淡定，亦不乏女友，
經常開掛/老金發揮主角威能o既光環。
例子：桐谷和人、基拉大和

熱血白痴型
呢D主角平庸，醞含唔少正常人o既劣根，
懶惰啦、細膽啦、咸濕啦、白痴論盡啦，
理論上係溝唔到女，但唔知點解開到後宮，
而且往往係危急關頭都會突然變醒目，
明明唔夠打都食腦贏，呢類主角亦最典型，
例子多不勝數，主角印象唔深刻記唔到名，
出場作品有極黑的布倫希爾特、斬赤紅之瞳、
魔法戰爭、strike the blood、golden time等。
呢類作品主要係比觀眾有代入感，
現實社會無出色混混噩噩o既人佔大多數，
呢D人睇魯魯修、桐人應該都事不關己咁，
睇平庸o既主角就好似睇自己o既故事咁，
故事發展往往係呢D人無可能經歷到o既事，
例如好多可愛o既女仔唔知點解愛上自己，
明明做野打爛野但係又比你拯救到世界咁，
係咪睇起上黎都會心微笑呢？不過記住！
呢D事只會響二次元先會發生到。

自從whatapps推出雙藍剔新系統後，
呢個apps從我iphone個介面果斷移除。
雙藍剔代表收訊息者已閱讀訊息，
唔回覆個message唔可以再講「未睇到」
我就係唔鐘意第一時間回覆果種人，
呢個系統極之討厭，寧願唔再用個apps。

響外國就因為呢個系統導致一單慘劇(?)
呢件事響香港可能比較難會發生到，
講緊o既係沙地亞拉佰o既一對夫婦，
平時老公whatapps老婆都無即刻回覆，
老公問點解唔回覆，老婆炸炸帝扮唔知，
可能咁o岩沖緊涼聽唔到電話有響掛，
又或者收唔到，之後睇番先知有未讀訊息，
今日老公又如常send message比老婆，
見到雙藍剔喎，但又係遲遲都無答覆，
唔通個老婆出左事？即刻響公司趕番屋企，
一打開門見到個老婆攤響張床度睇電視喎，
即係睇左message唔回覆啦？當場休妻！
法庭又受理因為呢個原因判佢地離婚喎！
響沙地亞拉佰法例，女性無視丈夫係犯法，
作為當地妻子係有義務回應老公o既說話，
佢就無盡到為妻o既義務，可以休得。

繼上星期添置完膠櫃後，經過DSC都問有無果隻款膠櫃，
(上次買果個係last一個)皇天不負有心人，今日又翻翻貨，
不過仍然無3層版，得4層，我驚4層太高會遮左個氣窗，
打電話叫亞媽度過夠位，就買啦，砌完高度真係o岩o岩好，
好在無買3層，唔係就浪費左一格放野o既空間，
可惜砌櫃果陣有個櫃桶爆左小小，果格只好放最頂，
用黎放D輕野，將兩個櫃合體變1個櫃多左最頂塊蓋，
不過可能太高，拉櫃出黎果陣櫃身會有D搖曳。

del左PPS，呢排睇動畫主要都係靠bilibili，
由於呢個網好多想睇o既番一係連結失效，
一係就鎖區，變左無乜野可以睇o既情況下，
接觸左D比較另類o既動畫同泡麵番，
例如：愛天地無用、FRANCESCA、夏戀戰姬

今次破天荒講下非日系作品，先講王牌御史，
起初比個封面take到focus，估唔到係國內泡麵番，
咁又睇下今時今日究竟內地o既動畫去到乜水準，
的確仍然係粗製濫造，充斥住違和感，
論水準相信80年代o既日本動畫都比佢自然流暢，
不過呢套惡搞方面又真係督到我笑點，
尤其個ED，搵個唱歌勁難聽o既人唱，每話唔同，
有條友一路飛一路柯尿柯到落雨咁，
D雨水居然淋落進擊之巨人同free o既真遙度，
真係大6先夠膽咁玩呢D版權物。

然後RWBY，呢套係和風(?)o既歐美3D動畫，
就咁睇根本同MMD整出黎無乜別，點解和風？
因為角色o既樣就TDA式初音果隻模組，
畫面就停留響playstation1果D年代o既水準，
諗下playstation1 D畫面高清化(唔係重製)
用得3D路人居然仲用黑影表現，hea得佢呢，
相信唔少MMD盃作品都比呢套RWBY高質素。
不過無可否認主角群o既人設係極OK架，
齋造型不下於BRS，可惜鬼妹配音格格不入，
完全變得好粗獷狂野，無左日系果份柔和感，
套野亦有出過一兩short手繪插畫，
人樣嚴重崩壞，可比美小學雞果D作畫。
雖然畫質低劣but打鬥動作方面真係做得唔錯，
靜係打鬥炸下，日常動作仍然係生硬。

答單講埋套夏戀戰姬，呢套又係比封面吸引，
有種tales o既感覺，唔怪得啦人設係滕島康介，
可惜睇果陣係無tales感覺，呢套又係3D動畫，
不過唔係MMD質素，背景比RWBY靚幾廿條街，
但3D動畫都係無辦法做到傳統動畫果種自然，
而女主角有種溝片味道唔太討好。