踢拖呢個topic唔係第1次講，可番查2011年＜點解人人都開拖？＞，
除左響屋企著之外，我一向都唔會踢拖出街(就算落樓下買野都唔會)
不過去游水例外，1黎泳池範圍只准著拖鞋或赤腳行，唔慣赤腳行路，
響果度行其實好唔舒服亦唔乾淨，露天池個地仲有機會熱辣辣添，
2黎locker窄擺小對鞋煩小樣野，3黎除褲著褲方便D(唔想踩地下黎講)

所以威迫利誘(?)下局住踢拖行去泳池，發現一路行一路有沙石攝入鞋，
仲試過有樹葉攝入去添，搞到邊行邊un到D不明物質好唔舒暢，
只係行去遊泳o既途中就咁多問題，堅唔明點解D人可以全日著住行街？

PS:家陣都冬天啦仲邊會想遊水丫？其實呢篇野係早兩個月前想打，
一直唔記得搞到衣家先黎打番 XD

買開米都應該知道真空處理o既米係好拎好多，
去親超市買米有得揀我都實揀真空米，
奈何好多時包包都漏氣一包真空o既都無，
通常就唔想買，大減價都係咁話！
但有時屋企D米就快食晒迫住要買無辦法，
頂丫！賣94蚊8公斤咁貴都係全部漏氣？
都係要買，拎去收銀比錢果陣已經越拎越重，
地心吸力令D米聚晒落底度力好唔平均，
拎番屋企過程中就好似同包米玩巴柔咁，
我又試將佢托響膊頭又重，抱腰間又重，
好似抱蘇哈咁抱先至比較舒服D，
我諗真o既BB仔都唔會有包米咁重掛？
好心果D漏氣o既就回收番去做真空處理啦！
唔係迫不得意邊個會想買袋漏氣米？

點解都11月尾但係仲係好似夏天咁熱架？
出街只係著件短袖衫都一身汗。

點解冬天明明唔係雨季都仲咁多雨落架？
前日落完今日又落，出門都要帶定把遮。

點解冬天都仲有蚊架？D蟲唔洗冬眠咩？
點解D蚊咁響但係平時周圍飛會無聲？
D蚊係咪專登揀飛近耳邊先至識叫？
夜晚訓緊教都會突然比D蚊嘈醒！
直頭好似有架戰機響我耳邊飛過咁嘈！
已經響間房範圍噴過殺蟲水都係無效，
真係要對正隻野噴先得？

專家指出避孕藥將會響2050年被淘汰，
咁究竟係咩野取代左避孕丸呢？
就係人工受孕，須知道女性唔係想生仔時，
排卵響大部份時間都係多餘o既行為，
未來女性細個就抽起佢約20粒卵子雪藏，
20粒夠啦，佢唔會打算生超過20個丫嘛，
然後扎左佢，佢要生BB果陣拎番D卵出黎。
專家又指，呢個技術造出黎o既試管嬰兒，
係可以選擇佢o既性別、高矮肥瘦、膚色，
而且將所有遺傳病剔除晒，造個完美o既人，
乜好似玩online game創造角色咁？
哇第時個世界咪個個都型英帥靚正？
不過中國傳統思想都要仔唔要女，
如果有得揀，男女比例一定會嚴重失衡喎。
日後性愛同生育可以完全劃分開啦，
性愛純粹係娛樂，唔再怕搞出人命，
避孕套唔會被取替，唔生仔都要防性病嘛。
其實我唔係太接受到呢個概念，
感覺上傳宗接代自古以來都係神聖o既，
變左試管嬰仲要有得自己設定怪怪地咁。

執左好多野過新居，終於清空左舊居個膠櫃，
亞媽話個櫃係黎自一個討厭o既親戚，
一直都好想掉左佢，所以今日就掉左佢，
個櫃存放D唔算常用o既野，近年都好少掂，
(以下內容涉及昆蟲可能會引起情緒不安)
最底果層原來佈滿唔知咩野黑色一粒粒，
開頭都以為係D塑膠物擺太耐龜裂出來，
唔對路喎，係D蟲黎！蟲屎丫？定蟲卵丫？
一拎起個櫃，下面更加係有過千粒呢D野！
哇痴線架！好在唔識旭，真係唔知咩黎，
第四格櫃唔少野亦糟映，痴左唔少呢D野，
係痴呀，吹氣都未必吹甩要用抹先抹得甩，
有D野痴得太污糟救唔番都要掉，
點解會有D咁o既野架？掉左個膠櫃後，
間房又多左小小空間，舒服左DD。