幾經艱辛，終於可以用到穿龍棍啦，
歌姬任都解左幾日，又要打勁怪又要掘野。

都有諗過呢把武器未必係我杯茶，
點知1試之下，哇！簡直係芒亨出過咁多種武器以黎，
最接近完美o既操作模式，可檔可前後左右閃，
可跳可空中step、滯空攻擊，持棍狀態下仲可以跑！
而且呢個跑響打王果陣耐力值居然等同平時跑步咁扣。
就算唔跑本身持棍果陣移動都正常速度，靈活性1流，
被擊飛果陣仲有得空中受身(玩格鬥game咩？ XD
佢個跳可以直接跳上高低地型，從高地型跳落黎，
無著地術亦唔會出現硬直，係爭在要收棍先用到道具炸，
如果唔係真係無得彈(咁打足全場都唔洗收棍 XD
打方面，可暈可斷尾可輔助隊友(回斬味)
又有長棍短棍mode，短棍將硬肉盾變軟肉盾咁打，
非常全面，並唔係換個動作模組就叫新武器咁簡單。

其實玩芒亨咁耐好多時都唔能夠隨心所慾行動，
即係渣太刀果陣想檔，渣長槍、統槍果陣想碌，
渣長槍、統槍、大劍、重弩果陣好想有正常o既移動速度，
只係受遊戲系統所限，久而久之仲覺得呢D叫正常？
其實根本就有病，點解要行咁慢？點解唔可以正常碌？
諗深層穿龍棍o既操作模式唔係特別好，只係最正常！
唔係佢有獨特o既移動，而係佢解晒其他武器o既枷鎖。

諗起打D煩膠怪係咁走黎走去，幾經辛苦埋到去劈1野，
佢又走到老遠，然後又要收刀追過去，個收刀動作又慢，
真係好Q煩，用棍就可以1路打1路追，順晒。

如果持太刀狀態都可以跑，持槍系列可以正常移動，
咁先叫做可以同穿龍棍扯番個和。

亦明白點解枝棍要上到G位仲要解1堆煩膠任先比用，
因為太靈活自如，如果D人1開始就有得用棍，
相信其他武器會覺得搵笨唔會再有人想用 XDD

又到維護時間寫狩獵文o既時候啦，果然不出上回所料，
唔洗兩個禮拜就衝到HR999，當年玩大半年只係HR幾百，
不過距離要渣棍仲有1大步，要解歌姬任務到第8章，
家下先整套入門G裝先，衝上G之前D裝都無乜升過得4百幾防，
去打G位怪就算開VIP(有長期元氣)被車1下扣1大截都好傷下，
求其整套G裝(升得7788)防已經過千，高之前套野兩倍有凸，
打5星以下o既G位怪come頂好多(都係有元氣)叫做可以玩到。
仲諗住可以好快上軌道放緩腳步，點知整套G裝都曬唔少時間，
雖然唔多洗打D洪水猛獸但要周圍採草掘石，好Q煩，
再黎就係整獵人導引果10粒蠻龍GF珠，磨左大半日都未解決，
衣家仲卡住響古龍硬幣度，頂佢！要打鬥技場先拎到！
機率10%，刷左十幾廿場鐮蟹都拎唔到，真係唔知要刷幾耐，
搞左歌姬任先啦，齋打怪都仲好丫，間唔中又要去掘石，頂！
上巴哈睇下全個流程，大獲！原來後面指定要伙伴1齊打任，
仲話伙伴要PR51先得，我打到上G都未搞過伙伴，
拿拿林開個伙伴先啦，關於伙伴系統又去爬左陣文，
就係咁，到今日都仲未達標，而開左伙伴後又發現多樣野，
原來打完任之後有伙伴係會再多次報酬架！又蠢左！
仲要伙伴無跟身(part街團)都照樣獎！(亦照升PR)
玩到上G打左過千舖(有掛？)就少過千次報酬機會啦！
平時單練除左傳賴之外仲part住兩個唔3唔4o既NPC，
如果HR11果陣就開伙伴，相信衣家隻伙伴都PR999左啦，
再加埋響廣場求其搵D深藍字人做臨時賴狩人，
單刷有1傳賴1伙伴1深藍字臨時賴狩人就順好多啦，
有咁方便o既途徑居然上到G先知道，又走多條冤枉路啦。

丫，D好o既野總係無乜貨，
買碧柔潔面乳，最正常果隻得番1枝，
其他唔3唔4 o既ver就擺滿貨架。
買品客薯片，綠色果隻得番兩罐，
其他顏色果D又係堆積如山。
我媽早排買出前1丁香辣味又係賣晒，
其他味o既就貨源充足。

好心你地D Marketing醒目D啦，
明知果隻味好食、多人用就入多D貨啦，
你地唔會無統計過邊隻賣得多掛？
無乜人買果D係咁耳入兩3罐米夠囉。

如常答巴士諗住聽下歌或電台，隊個耳機插頭落去，
咦？點解吉極都吉唔入o既，裡面好似有D野塞住咁，
吉入去又推番出黎，初步估計有D衣物纖維入左去，
但好地地點會入到去架？呢個機會似好微，
再唔係就有D蟲爬左入去，但入面舊野有D彈性架喎，
如果係蟲(屍)應該唔會將個插頭推番出黎，
anyway啦，睇黎又多個理由非換iphone6不可啦。

幾年前港台玩家玩新_線o既MHFO果陣國內玩家玩獵刃Online，
今時今日港台玩家玩MHFG時，國內玩家玩緊怪物獵人Online，
呢隻係由capcom同騰訊共同開發o既國內獨家版芒亨，
上youtube睇過D片，哇！D畫面迫真到呢，D怪好似真實生物咁，
再望下我地玩緊果隻MHF，對比之下D怪簡直就係吹氣公仔，
鬼咩？MHF係2007年o既產物，仲用緊playstation2年代o既引擎，
衣家playstation4都出左1段日子啦，仲玩PS2質素o既game？
呢隻大6版認真威囉，連日本仔都玩唔到，2Ch果邊都嘈左排，
真係唔明點解capcom要咁做？大6唔係好憎日本咩？
響果邊賣game都算啦，無理由比佢地獨家架？
人地之前仲盛行獵刃，擺明唔比面capcom啦，
果頭打完你兩巴轉頭你仲走去幫佢挽鞋？係咪咁犯賤？
話唔定capcom見到獵刃好收得先出隻正牌芒亨吸金。
芒亨貴為皇牌大作，當年PSP年代紅過半邊天，
但衣家D正章(MH4)畫面質素都仲係停留響MH2年代，
如果佢肯出落PS3度，畫面咪有大躍進o既空間囉，
可惜又比老任獨佔，可能就係貪佢可以慳開發時間hea出，
用番以前o既技術hea放落3DS，所以capcom先咁順灘答應，
搞到1代巨著仲係原地踏步，眼見大6版芒亨畫面與時並進，
心諗呢D先係今時今日芒亨應有o既表現丫嘛！
遺憾係國內限定，唔通芒亨呢個金漆招牌就無得正面發展？