江山易改本性難移，以前係咁o既衣家都係咁，
睇番2010年blog相同topic佢又做番同樣o既野，
話朝早10點黎等到下晝5點都未黎，
話下晝兩點黎結果全日都無出現，
唔黎就單聲啦唔好要人standby等足大半日丫。
整D野實有D事，然後又要加錢補獲，
呢次拆冷氣又話疑似剪鬼左條電線，
然後話裝冷氣果陣未必有電源要拉條線過黎，
駁線費用當然另計，但如果佢唔係剪左條電線，
又邊洗拉過條線呢？唔好同我講無電源，
咁之前部冷氣又點著？整爛人地D野，
幫人整番好唔係理所當然咩？點解要另收費？
我打爛你個杯買番個新杯比你仲問你拎番錢？
唔怪得平過其他裝修商啦，呢個價唔係實價，
過程中令你整多幾樣野再額外收錢。

今次佢黎唔到o既原因係第個客突發爆水管，
佢幫忙搶修，方唔係又係佢D人整爆人地條喉，
然後又額外收錢整番好咩？好地地點會爆丫？

(後加：之後佢試過又話有電源無再另外拉線)

小學用到衣家o既三洋牌冷氣因為換窗正式退役，
係因為換窗炸，唔係用唔到，呢部野算唔話得，
用左咁多年都無出過毛病，正常運作到最後一刻，
只係當年o既冷氣無慳電能源標籤，耗電量大，
新黎報導o既係冷氣，有1級慳電能源標籤，
等夏天果陣試下喪開睇下果個月電費幾錢啦。

之前新居冷氣比個sales硬推咩野快意寶，
聽到未聽過，舊居個廳果部美的又係咁漏水，
今次點都買番部日立牌冷氣，話晒都名牌啦，
我媽響英昌買呢部野話平其他舖幾百蚊，
以為執到平野，點知部冷氣居然仲用緊圓腳插蘇，
有無搞錯呀？！今時今日仲有人賣圓腳o既電器？
肯定唔合規格啦，水貨黎？真係1分錢1分貨，
如果住新樓，買左番去先知插唔到點呀？
家陣圓腳轉方腳插頭真係買少見少，
仲要唔come用好易壞用一個燒一個，
好在可以叫個裝修佬強行改冷氣做方腳，
整埋個方腳獨立插座，冬天都多個位插下暖爐丫。

2014響新居跨年，就當響渡假屋relax下咁，
只係新居比舊居凍，後悔無買暖爐。
踏入2015果刻響房聽到附近傳黎一陣起哄，
打開窗一望，哇原來可以直接響屋企望到煙花！
我新居個單位望到維港，不過比較遠，
而且個窗口對唔正海，D煙花響右邊側根，
佢應該放5分鐘，趁D煙花未完衝出去樓梯位，
睇下可唔可以望清楚D，可惜果個位更加望唔到。
要響新居睇煙花趁今年啦，應該仲有農曆新年，
同中秋節會有煙花匯演，因為新居前面會再起野，
如果出年起左野就遮住晒唔洗睇lu~
番舊居果陣順便買張2015年第1期o既六合彩，
原來期號真係每年年頭重新計過。

如無記錯年頭就定下今年銀行戶口o既目標金額，
本來都定得好寬鬆，諗住超過左目標更開心，
結果到2014年最後一日o既今日都係達唔到目標，
無計啦人算不如天算唔係辣椒執粒應該輕易達到，
不過只係比目標o既數字少1萬姐，唔係差好遠。

自己一個響新居，又唔多想出門，對自己好D，
就緊係叫外賣pizza啦，話晒都除夕佳節嘛。
上pizza hut個官網，揀好晒乜餐配乜配物，
識得食，一定係食錦繡至尊批，無磨菇，
然後搵自己果區o既外賣熱線，原來區區都一樣，
落完柯打，佢話等50分鐘，不過38分鐘就送到，
錦繡至尊薄批、波菜長通粉、忌廉湯、田園沙律，
total165蚊，食足兩餐算係咁啦，
點解呢篇blog咁似廣告o既？ -.-"