目前最多只能寫到5話，6話之後感想都唔知幾時先寫到，
bilibili又唔比睇，連bt都download唔到。

呢套又係2014年10月番，之前睇封面感覺似羅德島戰記咁，
萌唔起，之後作業用BGM無意聽到呢套op時比佢插圖吸引，
然後就搵黎睇，咁o岩見youtube有頭5集(之後就跳到11集)

睇落又真係幾o岩我心水，人設討好，故事背景尚算正經，
以中世紀西方戰爭為主，有7個(好似係)傳說級o既戰姬，
擁有神力，老實講香港人聽到戰姬呢個字眼感覺會好怪，
會聯想到F15果d戰機，以其叫戰姬不如叫女武神貼切d。

1開始女主角就莫名其妙地愛上左男主角，
係，佢有交代原因係欣賞男主o既弓箭術，
but響強大o既戰姬面前男主o既技術應該微不足道，
所以我都係認為莫名其妙，不過唔緊要，
女主係我杯茶，只要有女主出場劇情係點都無所謂 XD

酷汗o既戰爭場面亦係呢套野o既賣點，
不過略嫌兵法戰術o既落墨太詳細(咪又係睇唔明)
不如求其帶過仲好啦，想睇o既只係戰役o既感覺。

1個大bug位，第1集男主射箭擊倒女主身邊o既部下，
唔係想講點解之後個部下乜事都無(呢個固然係bug啦)
而係當時女主可以好淡定咁衝埋男主度，
但第4話7鎖企圖暗殺主角群果陣部下比條蛇咬親，
女主表現慌張，第1話又唔見佢慌o既？

個名叫4月，實際上呢套唔係4月番係上年10月番(好似係)
本來劇名唔會吸引到我，睇過ACG鬆介紹後就好想睇，
男主角有馬公主...唔係，係公生(第1眼睇錯字o既唔止我)
自細係出色o既天才鋼琴家，因某d心理障礙令佢唔再彈琴，
女主宮園薰係小提琴家身患重病命不久矣但瞞住身邊d人，
公生比薰自由奔放o既演奏打動令佢重拾音樂o既路。

可能我藝術家思維亦有玩下樂器(算吧啦)呢個梗令我中槍，
以前都有創作過有關舞台演奏o既故事(未output過出來)
當自己o既能力得到他人o既認同果份滿足感係無野取代到，
或者呢份就係藝術家思想先有o既共鳴感。

睇過後女主響舞台上真係發光發亮，有才o既人就有氣質，
果種美麗唔係靠精美o既人設可以刻畫到出黎，
睇呢套野難免會拎同為青春愛情劇o既golden time比較，
golden time女主加賀香子會比女配角琳達搶到戲，
4月謊言女主薰實在太亮眼，即使全話只刻畫女配角小樁，
都無辦法暫時蓋過薰o既光芒，其實連路人繪見都比樁亮眼，
始終持有相同電波o既人可以響佢地自己o既世界交流，
係外人眼中呢D人講o既語言係黎自另1個次元，
或者唔洗講野，就用音樂去傳達好比千言萬語o既訊息，
知音1見如故更勝幼馴染，唔可以靠相處時間長度黎突破，
所以唔識音樂o既樁根本唔可以同公生有深層次o既交流。

例如薰響台上受熱烈掌聲「我地就係為左呢1刻而生存」
公生響台上演出完，觀眾o既反應麻麻，
心諗「即使其他人唔欣賞唔緊要，只要有薰認同就夠啦」
繪見演奏完去後台1手扯起公生衣領講「我...」慾言又止，
然後諗「算啦，我要表達o既野已經放晒響音樂度」
呢d就係精神交流，超越左講野o既境界。

睇之前早就知宮園薰可能會病死，有心理準備擺明催淚架啦，
好似話原著的確係死硬，動畫版話睇反應可能會有驚喜，
bilibili彈幕唔知出左幾多次寄刀片寄子彈比作者，
其實公生最愛係薰但因朋友(渡)妻不可窺呢個設定都幾虐心，
公生想去探病都因為去到門外聽到薰同男友傾計而卻步。
明明都已經走到醫院但都折返，薰打番電話鬧做乜無探佢，
其實公生可以大聲講「你有渡陪就夠啦！仲要我黎做乜？」
but設定渡都係個花心羅白，可以係薰面前話第個女仔可愛，
而薰又唔會吃醋，可見薰都對渡無乜feel擺明都係坐等公生食，
只係佢都唔知淨番幾耐日子先廢事同公生發展。

頭5話節奏好明快，但第6話開始慢，甚至路人1場演奏拖1集，
第13話後開始更拖戲，加入更多路人，無咁好睇。

塊wacom bamboo畫版用左咁多年都未換過筆心，
筆尖已經由圓形磨到變斜面梯形，今日就換1下，
怕再磨蝕d會拔唔到出來。

塊畫版有附送埋更換配件，1個好似戒指咁o既圈，
係比你用黎夾枝筆心出來，3條備用筆心，
計埋本身插響枝筆果條總共係有4條，
不過心諗如果呢4條筆心都用到蝕晒又搵乜換呢？
查實無記錯用1排就蝕，只係之後就無乜再蝕落去，
畫左咁多年都仲畫得應該都幾come用o既，
我諗到4條都用蝕晒就算塊版仲未壞都換過塊啦。

換筆心後用起上黎感覺順滑左小小(真係好小)
不過話晒都新野，唔多唔少都就住就住黎用，
無未換前畫得咁放。

特此1記，睇下枝新筆心用幾耐先磨蝕。

細個砌模型，大個砌傢具，好多傢私買番黎都要砌，
睇住張說明書，1號插入2號，然後再插入3號上螺絲，
不過完全無細個砌模型過程果種樂趣，只想快d砌完。

諗諗下新居買過好多野要砌，有木櫃啦、膠櫃桶啦、
電風扇啦、衣架式乾衣機啦、今日又多樣，浪衫架。

拆開浪衫架個紙箱，差唔多每件組件都有透明膠袋包裝，
令我好奇係居然係好似包裝薯片果d密封式啤實晒，
心諗，洗唔洗咁精美呀？砌果陣咪又係要暴力拆爆個袋，
通常都係咁耳套住就算，最多貼塊膠紙封口，
好少會有呢個浪衫架咁好心機啤實d開口位。

砌完後發覺調較浪晒杆高低位同DSC果個爭緊d，
DSC果個好似好順暢，都唔知係咪落左潤滑劑。
整體黎講都OK，299蚊。

天氣雖然轉熱，不過尋日傷風左係咁打乞痴，
打到個鼻都紅晒，走過d冷氣位都唔舒服，
個人好疲倦，夜晚訓教衾晒被，
好在今朝起身回復番精神 :)