5點鐘打8號，地鐵站就迫爆晒人，
真係寧願佢唔掛啦，反正就算比佢打得幾勁，
聽朝都落波啦，咪又係要番工。

結果唔夠5個鐘又改掛3號，
而且只有微到唔洗擔遮o既細雨，
呢個時侯黃子華o既金句又比人搬出黎：
「呀蓮花你應該覺得好慚愧？
人又打風你又打風你打得果幾粒鐘，
我打邊爐都打得耐過你。」 XD

不過...關我乜事？
佢掛唔掛8號我都唔洗番工架啦 XD

新居都要掉緊d野(其實咪又係舊居搬黎緩衝o既)
今次搵point相機背囊黎開刀，其實個背囊都幾pro下，
入面有幾層防震物料、有魔術貼可自由組裝隔層、
外面又有彈弓繩可以插腳架、側面又可插水樽、
如遇狂風暴雨仲有得拉個防水套出黎包實全個背囊，
不過諗落自己都唔太想再咩咁大個袋周圍去影相，
衣家都係輕便先缺，真係影相都係帶細相機袋算，
心態唔同左，影相對我黎講真係無乜作品認受感，
同1環境下，我影o既相同亞k影o既相分別或者只係，
個快門掣係邊個o禁，然後後製加番photo by邊個。
只要同1場地或model，人人都影到差唔多o既相，
除左自拍有自己樣果d外，不過果d就用iphone啦。

另外背囊入面o既野亦難免被列為清除雜物名單之1，
有杯麵罩(柔光罩)、舊鬚刨、san-x電話毛公仔，
仲有樽純惡搞o既安樂死藥丸到掉果陣都未開過，
睇見個名就唔敢食啦，而且都過晒期... XD
入面仲有有線電話、上軟硬體電腦堂d筆記、filter、
1堆火牛、A星F氣噴、潮語學習卡呢d暫幸免於難，
不過d潮語都唔潮啦out晒啦變爛gap(本來就係？XD)
以前拎出黎曾經幾引到人笑o既，家下個個都睇過啦。

下晝5點半行到垃圾房掉垃圾果陣居然滿晒，下？
乜d人唔係食完晚飯先包袋垃圾(連埋d魚骨)出去咩？
點解5點幾就爆滿架？

以前讀書就有默書、測驗呢d野，迫自己記，
衣家學日文就好自由(暫時)，無話要記d乜，
記唔到亦唔會有人要你罰抄罰留堂，
無人再監督o既情況之下就要靠自己考自己，
我就試下可以數到幾多動詞，唔計抽像名詞，
即係勉強呀、結婚呀或者外來語果d唔計，
仲有唔計新學識果d，只數以前學過o既。

開頭數十幾個都好快，之後就越來越慢，
然後要用情景聯想先數得出d動詞出黎，
即係諗1個情況，例如諗起戰爭，有乜動作？
有戰鬥(tatakau)啦、有殺(korosu)啦...
就係咁數左差唔多十幾分鐘就數到82個出黎，
講得出大約發音但唔記得正確串法果d唔計在內，
當然亦有唔少學過又數唔出o既之後睇番先知，
明明個字好熟但無數到，所以保守估計o既話，
唔計新學果d我大約已識得超過100個動詞。

小心得：記動詞唔好齋記個字，要連埋情況、
相關物1齊記，例如記個食字要連個飯1齊記，
記個著字要連埋衣服1齊記，咁先會有效記到。

其實唔好話日文，就算用番最熟o既中文，
要1時間就咁數100個動詞出黎都有難度，
試過數到30幾個開始就會慢左落黎，中文喎，
肯定識得超過500個動詞都有啦！
都係1樣要靠情景聯想法去諗d動詞出黎。
你又試下數d動詞出黎睇下可以數到幾多個？

不過到實際要用果陣，因為情景o既出現，
都會即刻諗到個動詞出黎，諗唔到就真係唔識啦。
 

係，我知衣家放暑假，再加上禮拜6，
唔計學生上班族都放假，絕對最最最多人o既時間，
就係要睇下遊唔遊到水嘛，唔係點叫壓力測試？

結果呢？未到入閘機前就排晒長龍，
心諗其實d人排黎做乜姐？咁個勢入到去都無得遊架啦，
香港人真係咁鐘意同人迫咩？上星期宜家家私1折，
又係迫爆場，咁我呢？仲唔折返？就係要睇有幾迫嘛！

入到去啦原來都係兒童遊樂場，好多色彩繽紛o既sir滑梯，
池邊仲有可以比你對住人顏射o既水槍發射台，
水深最高都只係1.4米，而且呢個池仲係由1米漸變上去，
目測全個場超過70%範圍水深只去到我失頭哥，
當然入到去都係浸水居多啦，想暢泳呀？米洗旨意！
其實d水深d都好，起碼個場無咁多小朋友先啦。

暫時都係無1個泳池可以好似柴灣咁公眾假期都可以暢遊，
壓力測試鉛筆。

星爺o既電影食神裡面話過，炒飯係要用隔夜飯黎炒，
咁唔通出面d茶記全部都用隔夜飯？邊預到咁多隔夜飯呀？
專登煮多d飯留定比聽日用黎炒飯用？
我1直都想知道如果炒飯唔用隔夜飯黎炒有咩效果，
今日就試，就咁拎電飯煲o岩o岩煮熟o既新鮮飯黎炒，
就咁用蛋炒，份量係兩殼米，兩隻雞蛋，兩根雞精，
炒完出黎飯呈金黃色，好靚丫，食落亦好好味丫，
有乜問題呢？下次要炒飯都係就咁用新鮮飯炒lu~

今次只係落左雞精o既蛋炒飯雖然有d dry，
不過就咁食都OK架，之後再落埋花生送飯更OK。

另外呢次整o既味道同賣相就係大家樂所謂炒底o既飯啦，
1哥局豬扒飯入面果d就係呢d炒底。