又係台灣食物，貼上噗浪時小鐵回應話呢隻好食，
就知一定唔簡單，一試之下果然好食！係就係好食，
但點解食落同卡樂B個宅卡B薯條無乜分別！XD
(宅卡B係點？似麥記薯條再翻炸，之前blog有講過)
唯一分別係呢隻薯條表面審左d海苔粉，
好似麥記d shake shake薯條同你shake埋咁，
不過宅卡B平均叫價10蚊得幾條都偏貴，
咁呢隻山寨版做到宅卡B o既感覺但平D有得諗喎，
睇番張759單，咩話？原價12.8會員折左先10.2？
台灣山寨人地日本大牌子仲要賣咁貴？
雖然大包d(40g)但同宅卡B一樣好似陣風咁，
食幾野無晒，唔come食，無得諗。

其實我唔睇波，今屆世界盃一場都無睇過 XD
不過話晒都全球盛事點都係咁耳講下，
無線買左世界盃播放權，但將部份賽事放收費台，
搞到亞sa都要公開怒罵鬧到上報章雜誌，
有人話呢d無線唔播o既日子亞視肯播，
咁就即創造奇績收視贏盡無線啦？
計我話亞視播無線一定播硬，唔會比位佢入。
尋晚零晨五點終於踢完Last場，德國隊捧盃。
主場巴西早幾日出局3甲不入，有乜感想？
感想呢......係無o既，講完~ XD

衰開有條路，呢期上網運真係黑過墨斗，
今次輪到新居呢邊上唔到網，
不過好在後來證實係插錯線，
因為搬電視櫃所以先移走d數據機、路由器，
後來插錯左電話掣果條去左分插位，
奇就奇在移走數據機果陣仲保留插住數據機d線，
即係只係拔出插插頭果一邊，
等數據機歸位時只係插番條線落插頭就得，
無理由咁都會出錯架喎？
之後居然(疑似)路由器送果條灰色線插落插頭，
而整寬頻果條友比o既白色線插分插去路由器度，
咁先上得番網，當初究竟係點插架？
條白線係插唔入寬頻個input位架喎？
兩條線都唔同插頭，anyway唔講呢d住，
重點係星期六晚7點打電話去3客服果度話有問題，
佢地話係機房問題派專人去處理，快則當晚搞掂，
最耐24小時內解決到，整完會再打黎跟進番，
點知星期日全日都無晒下文，點做野架？

(註：結果7月14下晝6點先有人打黎跟進)

響759買左幾包台灣食品，先黎講下呢隻小班長青豆脆麵，
係好食過媽咪麵，媽咪麵要落果包粉然後再shake雲佢，
不過都好難shake得雲巡，總係一忽淡戊戊一忽重口味，
而小班長呢隻就等同一早幫你shake好晒，仲好雲巡添。
唔單止咁，麵中仲混入左原隻青豆粒，開頭睇包裝張相，
都估裡面頂多咪d青豆碎，好多食品都圖片與實物不符啦，
但呢隻還完度好高，絕無戲場，最抵讚o既係獨立包裝，
裡面好多細細包，唔怕開左封漏風惹蟻難以保存。
要注意呢隻脆麵仲有分辣同唔辣，包裝都差唔多，
辣版字上面有d紅色texture圖片多左「香辣」兩個字，
開頭都無留意到以為得一隻款，新居果邊買錯隻唔辣版，
都好食o既，但辣版仲會有塊辣椒仔，食落刺激D~ >v<
跟住講中祥隻餅，幾好食啦，要彈o既係無獨立包裝，
隻餅最特別之處係台灣o既朋友話真係見過有賣(?)
而前者同樣台灣出品o既青豆脆麵台灣朋友係未見過 XD
不過好食又點丫？759午時花6時變下個月可能又無賣，
連咁大路o既日版出前一丁同不倒翁芝士麵呢排都可以無，
呢d台灣小品零食可以賣得幾耐丫？

(註：小班長青豆脆麵240g原價$15.8會員8折左$12.6)
(註：中祥自然の顏蘇打餅乾140g原價$11.5折左$9.2)

今個夏天決定要游番水，尤其比Free!動畫感染，
果種透心涼o既質感好有游水o既衝動(只睇左幾集姐XD)
搵番多年前o既游泳工具，泳帽、泳褲、泳鏡，
結果得番泳帽應該仲用得番。泳鏡中間舊膠位龜裂左，
用索帶索番住兩邊都得掛？好樣衰姐，算啦買過佢啦。
響吉之島(衣家叫AEON?)買-5.00度數o既泳鏡$200，
然後泳褲買左$158，OK，萬事俱備。 :D