一直想搵一隻又打得又可以周圍走o既職業，
相信只有修羅，打得勁又有瞬移同傳陣，
去邊都方便，可惜男修羅造型肉酸(露體狂？
呢次轉武僧都唔係有心發展落去o既，
純粹係妖術遠征可以set定隻野傳番村，
又想隻野有能力應付到一般怪，
第時有金鋼都可以擋下王，廢話少講入正題，
呢度唔講任務流程，網上都搵到，
呢度講下D一般流程教學唔多講o既野。
一開始叫你收集物品果度，原來係唔會沒收，
帶夠數就當你pass，唔怕浪費某D材料。
個考試我揀左採菇，做呢個攻速越高越有利，
反正你幾高攻擊力打菇都係扣1，
所以為求高aspd拆武器同盾打最好。
未做過點知採菇係用打，
唔比係埋去click一下揀「採集」之類？
(或者好似掘奇異礦石果D咁)
早知係打就帶埋+aspd裝備啦。
基本上呢個test只係晒下你時間無乜難度，
黎到下一個最克人憎，隱形迷宮，
盲目咁亂摸都唔知幾時先摸到去終點。
未入之前有3條路比你揀，我揀左右邊個修女，
入面D怪應該係最弱o既紫色腐屍(裴洞1F果D)
另外兩條路唔知，聽講有D有木乃衣，
對自己戰鬥力無乜信心就揀左邊啦。
(如果係random次次唔同唔好怪我 XD)
行完就送你綠水，我諗假如一早飲左或掉左，
之後去到個神父NPC會唔會卡住左？ XD
又假如身上有10枝綠水會唔會叫你飲晒佢？XD
視乎佢設定你身上無綠水呢個item先比你過骨，
定亦或頭先比你枝綠水其實編碼唔同o既任務物？
跟住做埋問答就搞掂(有D問題同轉祭司一樣)
依稀記得好多年前ISA伺服器我都有隻武僧，
but無晒印象，係咪R版後D任務改過黎？

7月19日係你生日，所以就揀呢日寫呢篇blog。
雖然已經無同你聯絡多年，但我依然無忘記過你。
想當初我地響RO第一次見面，當時你o岩o岩玩，
我用祭司帶你，對我黎講呢個係好好o既開始，
果陣我地約定練功，突然上唔到網，為左守約，
我走落網吧玩，就係咁拎左你電話，
以免下次又上唔到網無辦法聯絡你。
然後我地一齊左，響RO結婚，每日都出相入對，
我地節奏一致合作得天衣無縫，我天怒你二連，
有乜野浪漫過響童話世界一齊冒險並肩作戰同生共死？
後來我地一齊用自己o既真名創角色，感覺更投入，
我地仲一齊玩過月光LuLu、FlyFF等幾隻網遊。
不過你係傲嬌，當年我唔識同你相處，經常嘈交，
當時好氣憤，衣家諗番起嘈過D乜都唔記得晒，
只係記得同你開心過o既回憶。
你係個好出息o既生意人，響RO可以白手起家致富，
唔知衣家你點樣呢？係咪做生意賺左大錢呢？ XD

前陣子負責整本繪本趕書展出，
睇番之前負責佢繪本d designer都精美，
頁簽又整D花花素材有D華麗，
我根據該繪師o既狂野粗獷畫風，
用左不規則o既粗線筆觸做版心，
編輯同我講番個繪師話最滿意今次個design，
仲話之前果D太精美唔襯佢o既style~ XD
呵呵，得到認同原來真係會心微笑。

咁又無咁癲尋日游完今日又游，應該過左暑假游比較好，
D細路第2日要番學要做功課唔會游咁夜，個場都鬆散D。
講開游水，以前去過唔少公眾泳池，西灣河泳池啦、
柴灣泳池、尖咀九龍公園泳池、灣仔摩利臣山泳池、
維園隔離個泳池、馬安山泳池等，真係周圍都去下，
西灣河泳池係去得最多，有D兒童設施，不過池水唔深，
柴灣係露天泳池，不過池面好多落葉，甚至蜻蜓屍體，
D工作人員仲要不時拎個網撈走D野，如果係游蛙式，
個頭上水面掰大口吸氣果下都唔知食左幾多蟲......
九龍公園泳池都係露天池但無呢個情況，
不過有個行人天橋，路人可以欣賞泳客暢泳，
或者有唔少痴漢響果度偷影泳裝少女(?)
摩利臣山係室內暖水池，冬天都可以去游水(米搞我)
最特別係馬安山個泳池，有條6米高迴旋形sir滑梯，
我滑過，好刺激，有D水扇住落停唔到，直插落水。
果陣係搵埋王元海去游，唔係點會山長水遠去馬安山。
亦有同呂少+Mandy游過水，又同過蔡pen去尖咀游過，
蔡pen仲表演扮死，記得仲有個5米深o既跳水池，
但唔記得係邊度(一定唔係西灣河)唔知柴灣定尖咀。
講講下，以前都響唔少泳池留下過咁多足績同回憶。

好耐無游水啦，今年下定目標一定要游番水，
今日出門袋定泳鏡、泳帽、泳褲、毛巾，
然後5點幾食個麥爆雞餐咁就唔驚游游下肚餓，
放工7點零直接到觀塘泳池，Yeah！目標達成！
地段好近，由公司出發只係過一條馬路，
再行一條天橋即抵達，入場費十九蚊，
呢個觀塘泳池有兩個室內池(應該係暖水好舒服)
水深由1.4米、1.67米到最深1.9米，
平時答車仲見到有露天泳池不過未搵到點入，
夜晚7點到8點都勁多人，以其話游水，
不如話浸水比較貼切，根本多人到游唔到，
你游多兩野又打到人，有傳國內報章大力推廣，
香港泳池又平又靚變成內地人其中一個來港理由，
再加上暑假，亦多左細路哥個場更full，
到到9點半先開始多番D空位可以游多兩野，
可惜個池收10點，今日差唔多玩左3個鐘水 XD
游完水行番出去，有間日本料理(應該未收工)
如果同條女游完再整番個定食真係連combo，
不過自己一個緊係隨隨便便醫飽個肚算啦。 XD