一入到茶餐廳坐低，侍應就會放低杯茶響你位hold住你先，
等你睇完餐牌唔多o岩食都唔好意思走(不過都係可以走o既)
叫個晚餐通常都跟例湯同飲品，凍飲加兩蚊，
齊晒野時你檯面除左食物之外就有三樣飲品，
一杯茶、一杯檸樂、一碗例湯，有無諗過D客點飲得晒架？
一入黎果杯茶通常D客愛黎洗筷子刀叉，仲有兩樣呢？
唔飲又可惜(錢黎架)，但飲晒都勁多尿啦？
可唔可以唔好為左set貴個價位就質多樣飲品呀？
D客飲唔晒都係浪費。

新居遲早都要買個mon，所以衣家買定無壞o既，
暫時用黎駁macbook air，長期睇11寸畫面堅辛苦架。
係咁耳打探d mon o既行程，都諗過買番viewsonic架，
所謂做生不如做熟丫嘛，舊居用開呢隻都兩年好地地，
只係略嫌內置喇叭唔夠力，你知啦夏天長開風扇、冷氣，
好嘈架嘛，viewsonic開到最大聲都聽唔清楚。
想要o既心水規格要有1個VGA、2個HDMI、內置喇叭，
係就係可以買外置喇叭、HDMI都可以買分插，
唔好忘記電腦已經好多線，仲多幾條線睇到都痴線。
見有隻飛利蒲符合我規格，而且仲強調內置5v喇叭，
viewsonic只係3v，咁有過之而無不及何解唔試下？
不過無DVI頭都係輸蝕，驚第時買到部野插DVI...
個職員解釋番DVI頭可以用轉換頭插落HDMI，
咁都好d，一於就拍版啦。

好心d乜野申請上網、信用卡送coupon，
就直接比啦頂你！得咁細張紙仔都要寄信，
寄都算啦，封信只係用黎換領coupon？！
喂家陣只係coupon炸！唔係現金呀大佬！
要我山長水遠去換領中心換幾張紙無病呀嘛？
換領中心仲要收7點半即係我放工佢都收工，
只好犧牲寶貴o既禮拜六假期前往，
我幫家人領取，點知話要身份證影印本！
痴線架？做乜要比身份證？呢d私隱黎架！
換領紙都拎埋上黎你就換啦！當我好得閒牙？
唔通懷疑張紙係new人地信箱偷番黎咩？

o岩o岩入手近期好hit o既網絡播放器，
貪佢可直駁落幾十寸大電視夠方便嘛，
其實以前呢D野都可以用電腦睇，
不過近年都block晒香港ip無乜新戲睇，
聽講個小米就係識得翻牆，睇到最新電影，
我買o既係小米2代4百幾蚊，目前出到3代7百幾蚊，
聽講第3代係支援o既頻寬快d，又話可插SD卡，
心諗如果我屋企網絡得100M你比我300M都用唔著，
咁就買2代試下先啦慳番兩舊水。
我唔煲劇o既，個盒主要買比亞媽用。
咁試下個盒啦，可能坊間都唔少文介紹小米，
不過通常D人用黎唔係睇戲就係睇波，
我媽係鐘意睇大陸電視台果D好土氣劇集，
(你米理，人地就係鐘意睇埋晒呢D style)
或者我媽呢D特殊要求出面比較少人寫，
新居呢邊個大廈接收天線係無乜大陸台，
咁就想靠小米黎睇大陸台啦，試左好多apps，
好似只得個泰捷視頻可以睇到大陸電視台，
暫時全部頻度有8百幾個台，一日睇一個，
睇兩年幾都睇唔晒，不過可惜好唔穩定，
總之播唔夠15分鐘又彈番出去menu畫面。
然後再試用泰捷apps黎睇電視劇，
就試睇亞媽想睇o既幸福戀人，
試晒幾個視頻供應源load極都load唔到，
之後試睇電影，就求其揀劉德華果套盲探啦，
咦又OK喎，由頭睇到尾升字幕都無窒過，
再睇其他電視劇都OK，即係睇電視台唔得。

唔經唔覺呢個網誌都開左6年，開頭只係週記或月經，
2010年起寫得頻密，每個月都有固定出貨量，
呢度都算係記低左我呢幾年黎o既點點滴滴，
對我而言係相當珍貴o既記憶，我會一直寫落去。
感慨o既野講完，入正題，好奇究竟乜人會睇我日記？
老實講，雖然呢度係自用，但擺得上網就唔怕比人睇，
唔方便比人睇o既就唔會擺上黎，所以歡迎大家收/偷睇~ XD
間中有人路過入黎正常丫，奇就奇在有部份人長期keep住睇，
(多謝你地o既支持啦，小弟無以為報~ XD)
只係好奇我D文有乜吸引力導致有人keep住睇呢？
我又唔係乜名人藝人，我d野對其他人黎講應該無乜營養，
可以o既話留個言講下點解會睇，小弟都好想知~ XD
呢個網誌勝在有詳細訪客記錄，睇到有乜人入過黎，
最好玩係部份來賓由咩渠道走入黎都睇得出~ XD
經長時間觀察，大部份有來歷入黎o既都係透過新日誌果度，
(凡有用戶寫左新日誌就會響qooza個最新日誌文章出現)
而有部份來客係響google search相關題目走入黎，
曾被search過：合味道杯飯、蛸壼屋、beat耳機分真偽等，
我網誌o既題材包羅萬有，總有一款o岩你胃口(?)
估唔到咁冷門o既蛸壼屋都比人search到 XD
可以睇到D人係因乜野題材而走入黎睇都幾過癮~