老老實實，你問我洗衣機、抽油煙機之類買邊隻好我答你唔到，
電視都仲有D概念，例如睇佢可視角度、幾多fps、幾多條HDMI，
買呢D煤氣爐、雪櫃等家電都求其只要唔係太貴就拍版，
本來冷氣就打算買日立或樂聲牌，話晒都聽過呢D牌子丫嘛，
個售貨員話日立無不銹鋼膽，會生銹唔come用，耗電量又大，
又嘈，真係比佢拋到一頭霧水，不過冷氣呢家野最緊要慳電，
其他我無乜要求，所以聽佢講買隻唔知咩牌子比佢得逞一次啦。
跟住買左一系列套餐包括煮食爐、煤氣熱水爐、抽油煙機等，
反正遲早都要買，以其對住一堆陌生牌子左度右度又格價，
都唔知有乜分別架啦，不如一次過買晒唔好煩啦，
今日買居然即日送貨兼安裝，快快脆搞掂佢，仲有大把野搞，
所以一個鐘內睇住三個師傅安裝幾樣家電，好熟手，
三兩下手勢就將條金屬喉管齊口鋸開，好快手就界開玻璃窗，
呢D野要我整睇怕大半日都搞唔掂，不過米以為頭先埋左張單，
就唔洗再煩，原來整緊途中好多位都要額外加錢，
例如要換獨立插蘇要加100蚊，比個廚櫃頂住要拆又收100蚊，
佢話你可以唔即刻拆搵番整廚櫃果D裝修佬拆o既，擇日再裝，
米煩啦，幾舊水豪比你囉，就算叫番果條友拆佢會唔收錢咩？
同日換埋鎖，因為之前班裝修工人有我地屋企鎖匙，
本來諗住親力親為自己換門鎖，不過裡面個結構真係估佢唔到，
唉，又輸比佢啦，咁又搵人搞，搵人o既話只可以是但換一樣，
唔係o既話佢咪又係同時有齊門同閘鎖匙可以自出自入？
|
