自上年夏天尾開始養成有買壽司o既習慣，
keep住大約隔兩三日總會買一盒，
只係有時遲放工D想食o既款比人掃晒先無買到，
都經常怪佢點解唔整多D三文魚壽司，
明明呢D最多人食就好心佢整多D啦！
而上星期惠康出面開左間壽司爭鮮，多左選擇，
自然可以一改經常買唔到o岩口味o既縮命！
一開舖果幾日仲搞大特價，兩蚊舊，
惠康都唔執輸睇住你黎打，都即刻做大平賣，
5舊標準size三文魚壽司折左7個9，
哇平均個半1舊，平時特價左都仲貴過佢原價！
不過好景不常，優惠期之後變3蚊舊，
奇在呢幾日睇佢間舖都長期有顧客絕無拍烏蠅。
之所以topic話佢遲來，階因我都就快搬新居，
都唔多機會幫襯佢，早半年開就fit晒。

一直都主力負責幫公司其中一本娛樂誌做設計，
難聽d講句，呢本雜誌響度我就有得做，
呢本誰誌一摺埋我就對公司黎講無乜利用價值，
某程度上呢本野主宰左我響呢間公司o既工作命運。
最近前上司(衣家響第二間出版社做)又另起爐灶，
想搞一個同呢本娛樂誌差唔多屬性o既網站，
高薪掘角想撬走我公司呢本雜誌o既主編，
果邊人工高好多，再比三條o靚under佢，
聽落條件相當優厚，呢個主編都考慮跳糟，
我公司總編亦同佢講對本雜誌有感情咪留低囉，
如果為前途同埋錢途就一定係過去果邊架啦，
佢話同老細再針針睇下點先，睇怕就算R到加人工，
都唔慌會加得多過果邊，我都唔想呢個主編走o既，
不過唔通阻住佢發達咩？再講佢要走我做乜都留佢唔到，
只係最好走前單聲啦，純粹有個心理準備都好過無。
希望過到呢個關口就仲有得響呢間公司慢慢玩落去，
亦睇老細係咪眼白白睇住本野摺埋，
摺多本公司業務就再萎縮，越出越少書...
雖然主編話佢一走無可能搵到人接軌本野一定玩完，
我覺得又未必o既，可能公司兩大總編出手吊住鹽水，
響呢段期間請到個對呢個範疇有認知o既小記頂住先，
(查實熟呢味野o既人唔難搵，只係無編採經驗姐)
佢地掛名總編輯監控本野運作直到上番軌道，
咁仲有一線生機，話晒本野開始收成期，
銷量慢慢up緊，遲唔摺早唔摺呢個位先摺堅唔抵！
仲有前上司就係諗住對舊公司復仇，
佢整到本野收皮即係「計畫通り」，
老細你食鹽多過佢食米唔係咁都唔夠佢玩呀嘛？

復活節假係要番工架，今日觀塘街道冷清，
好多茶餐廳無營業，公司個大堂都落左鐵閘，
要響停車場果邊入，番到office只有幾丁友，
重點係上司都無番工！所以時間過得好快 XD
RC同女友傾到準時收工，呢日放假反而唔抵，
假就當然要揀響無野做要扮做野果d日子放，
知唔知無野做但上司又坐正響後面係幾慘！
又唔好意思上facebook或做自己野，
但又唔知做乜野打發時間等運到，渡日如年，
呢d時侯寧願手頭上勁多野做，充實好多。
而呢種情況亦好容易會口痕搵零食食，
因為唔食野唔知有乜好做，又曬錢又唔健康。
 

準備新居日用品，緊係響新居附近商舖買，
無理由響第二度買完再山長水遠咁拎入去架？
入日本城諗住買d衣架同埋塞住度門o既門頂，
個店員話賣晒，兩樣都係無，唔係呀嘛？
日本城都可以無呢d咁普通o既日用品賣？
響果邊個個都新居入伙，個個都買日用品，
都正常o既，行過去DSC見到有衣架喎，
就買啦，不過個肥婆職員態度極差，
好似我比緊麻煩佢咁，唔想做就米Q做啦！
如果佢係靚女黑面都無咁克人憎！
仲有，DSC收8點半，係咪痴線架？
人地放工你收工？你想做D乜人生意呀？
之前響DSC買野又整埋晒D懶係優惠o既圈套，
買間床送400蚊優惠卷但限定要即日用，
好啦就同你用左佢，條件係滿800蚊先用得，
大部份平野用唔到，然後D特價品又話唔比用，
睇中部LG42"電視機3千幾蚊又話呢件唔用得！
咁你講晒啦？即係D垃圾野想去貨果D先用得？
唔係o既話其他用得o既貨品都set貴幾百蚊啦，
用左張卷等同比佢呃你買多樣野，無抵到。

一般黎講護髮黎黎去去都係果d，早d訓啦、
唔好經常用風筒吹頭啦、食少d辣野同煎炸野、
唔好染髮等，不過今日聽大家真風騷又有新野，
洗頭果陣要用手指肉唔好用指甲卒頭，
因為指甲會刮傷d毛囊細胞，嗯呢個易理解，
要每個星期換一次枕頭袋，唔比d蟲滋生(?!)
佢話枕頭會滋生d蟲，果d蟲會吸走毛囊養份，
哇聽落好恐怖，而屋企d枕頭一兩個月先換...
仲有要好愛錫自己d頭髮(要同d頭髮傾計？
因為唔鐘意自己d頭髮潛意識會控制身體機能，
比小d養份毛囊，咁會生得無咁密...咁都得？