上文提及我鐘意一路行一路思考，行緊果陣思路暢通d，
查實呢個原理好多動漫、電影都有類似o既描述，
尤其刻畫一d靠食腦o既聰明角色，多同查案有關，
不過佢地激活思維o既方法就唔係行路，
例如Death Note入面o既Near諗野果陣會搞頭髮，
L係坐響度諗野，都係佢地令頭腦靈活d o既方法。
蒲澤直樹(唔係半澤直樹(妖好爛呀))o既Monster，
裡面有一個探長當記番一d數據o既時侯，
垂低o既手會做出好似響空氣打字o既動作，
可能籍住呢個動作再回憶番佢曾經輸入過o既數據。
天眼追踪入面韓孝珠飾演o既刑警亦靠手指拍打物件，
可以將見過o既事物鉅細靡遺咁講番出黎。
「下晝四點半你o既八點鐘方向見到d乜？」
近排有個rejoice廣告都抄呢個梗，但有幾多人睇得明？
無睇天眼追踪就唔知佢玩乜，好心玩都玩d大路野啦。
由此可見透過特定o既動作係可以令頭腦更清晰，
亦有學說指左手活動可以有助右腦轉快d等等，
你又搵到激活思考o既方法未呢？(睇緊呢篇野o既你呀

既然我係一個思考型o既人，思考係一種樂趣，
諗一d快樂o既野、創作故事、檢討生活點滴等等，
而我更鐘意一路行一路諗野，思路會暢通好多，
呢個原理應該係行路果陣有助大腦轉動，
(好多動漫電影都有提及類似原理，遲d再講)
所以屋企有一個可以比我行o既空間優先考慮，
而香港寸金尺土，家居空間盡量慳得就慳，
新居自己間房專登買直立式企扇最慳訂，
不過有d後悔買左4尺闊o既床搞到空間更唔見洗，
果陣諗住訓大床可以自由自在d丫嘛...

雖然屋企附近間爭鮮開左一段日子，
不過今日先正式幫襯，就試下啦，
買左盒14蚊12舊鰻魚卷，即係紫菜包住d飯，
正中間係鰻魚果隻，番去打開一睇，
有幾舊d鰻魚只係一細忽做裝飾？
即係鰻魚唔係貫通成舊壽司，
大部份都只係得飯，咁偷工減料？
惠康三文魚卷中間舊魚都貫通成舊壽司丫，
你作為一間壽司連鎖專門店連惠康都不如？
喂生意唔係咁做架。
 

一日24小時可能有10個鐘係訓響間床上面，
人o既一生可能有3份1時間響間床上面渡過，
所以床係好重要，買床單當然要買舒服D啦，
今日為新居果張4尺X6尺o既新床買床單，
個人而言床單唔好太滑，唔好太鞋，
唔鐘意果D拋光布料睇落去怜蠟蠟，
印得越多野越花呢look都係散(第3音)，
絲質果D更加唔舒服，所以都幾難揀。
吉之島(衣家叫AEON?)個sales好多形容詞，
好多未聽過o既字眼(定係佢自己自創？)
所以話粵語真係博大精深，例如：
散(第3音)啦、鞋啦、啜啦、粒(第3音)啦...
剩係形容質感炸，轉做國語真係唔知點講。
卒之揀左680針簡潔圖案，越無野印越舒服。

面相有分思想形、運動形、享受形，大部份人都兼具兩種形態，
咁我一定係思想形+享受形，從食一個早餐可以分析出黎。
響M記叫左個3號早餐，係煎蛋、麵包、漢堡扒、薯餅加杯野飲，
點樣將一個平凡o既早餐食到有如宮廷御用九大簋咁豐富？
就係靠思想形o既特質~腦補，拎起個膠刀切一忽蛋擺落口，
再切一忽漢堡扒放入口，即時諗到可以試下蛋+漢堡扒一齊食，
然後就蛋+麵包一齊食、薯餅+漢堡扒一齊食、薯餅+麵包等等...
心水清o既都睇得出呢個早餐只係將一個豬柳蛋漢堡拆散黎擺，
即係將蛋同豬柳夾番入個麵包入面就可組裝一個豬柳蛋漢堡，
不過將佢分開黎細味品嘗，又可以食到唔同o既味道，
再加上隨餐附送o既黑椒粉同埋幼鹽，點鹽同唔點鹽已經唔同味，
一個唔洗30蚊o既餐估唔到有唔止30種食法，勁過錦繡多味魚。
當然，仲要有享受形o既思維先可以享受到呢個食法，
同一個餐，有D人只係用黎充飢，有D人食出趣味，睇你點睇。