行行下街見到張十蚊紙響地下飄過，無人認頭，
咁我就本住路得拾遺(?)o既心態袋左佢啦~ XD
然後又去視察新居環境，買左張新SD card，
帶D80係咁影相，趁衣家乜都新淨緊係要影低，
十年八載後睇番可能「哇原來呢度咁乾淨過」
「原來呢個位以前係咁」影左百幾張相，
but諗起好似無讀卡器(之前果舊帶番公司失縱左)
見樓下商場賣49蚊個平平地豪比佢啦，
而張十蚊算係不義之財都拿拿聲用左佢黎比錢，
點知番去過資料過過下斷線重連，重覆幾次後，
過唔到資料不凸止，響張卡入面百幾張相，
變左做一個3Gb大o既不明file，哇靠！！
你個讀卡器爛，過唔到相咪算囉，
點解連影左o既相都唔見晒？！點解？
過相姐，唔洗整唔見晒我D相假？頂你！
家陣唔止蝕49蚊讀卡器，仲整壞埋張SD卡，
同埋辛辛苦苦(又唔算o既)影o既百幾張相！
呢個糟遇教訓我地做人唔好貪心...

一入非是卜又轉左界面，心諗...搞錯呀？
再問問同事係咪轉左界面，點知得我一個轉，
之後開埋其他分身acc都未有轉界面，
點解？點解係我？咁多人唔揀偏偏揀我？
上次轉界面都仲有得比你揀唔轉住，
然後又話你好多朋友都轉左，利誘你轉，
不過最尾咪又係全部都要轉，今次問都唔問，
亦無適應期，話轉就轉，有無諗過用家感受？
做乜係要迫人用新野？硬係要人用得唔習慣？
呢種行為好似強姦咁，好唔gur囉！

今時今日玩網遊，第一個難關唔係新手村任務，
而係注冊帳密登入，話說想玩下個瑪奇英雄傳，
首先響香港beanfun注冊，之後login唔知點解，
猛話個pw錯(申請果陣明明重覆打兩次點會錯？)
無計啦唯有重設密碼，重設完又話個帳號格式錯，
玩野呀？格式錯又比我注冊到？算啦轉台灣官網，
搞完一大輪由注冊到登入beanfun一切順利，
到開game時先黎話咩進階認證，要打台灣電話，
大佬呀你又唔早響？我用左兩個email黎注冊，
心諗都要番香港官網注冊，睇下第三個email，
佢話太耐無用所以鎖左又話要安全問題，
我都唔記得左答案係乜錯左3次12個鐘無得試，
mail到用時方恨少，申請個帳號都可能要幾個，
輾轉之下終於入到Game睇到個標題畫面啦，
點知o禁開始遊戲又話認證失敗，想點呀？
重開機再入過都係登入唔到，痴孖根！

好久也沒試過這種感覺，彷如世界也突然改變了，
不過心情沒意料的愉悅，反之是煩燥，因為害怕失去，
可能高登名句「這些機會不是屬於...」太根深蒂固，
居然能跟這樣完美的女生加上一個情侶的關係，
所以也難以置信，有點來得不真實，像夢，怕夢醒。

都係果句打機對我黎講係一份情義結，衣家都無乜打家用機，
部PS3都幾個月無著過，我諗下次開機又要我入年份時間果隻，
手掣都舖晒塵，雖則咁樣但依然都keep住睇開game書，
自問真係比唔到理由再睇落去，純粹只係出於一份原始o既愉悅感，
就好似細路仔企響玩具舖出面比廚窗五光十色o既擺設吸引咁，
單純o既感覺良好，再講我對八掛或潮流雜誌興趣唔大，
要睇face或milk我寧願睇番Game書，而本地Game書界龍頭，
非G鬆莫屬，GameNext收左皮，GameWave又半本講電腦Game，
(我係純純對console有情義，電腦Game手機Game都無乜feel)
個人認為論製作同美工能夠同G鬆平分秋色o既得GameWeekly，
好可惜唔知係揀錯發行商定係無錢比上架費問題，
GameWeekly係可遇不可求，經常唔見有賣，就算唔計呢樣，
依然略嫌GameWeekly比G鬆失色，原因就係AC野唔夠，
無錯，G鬆連埋本AC別冊一向準確捕捉到宅玩家o既需求！
不得不讚買一本野睇齊ACG三樣野確實一步到位，恰到好處，
可惜由上期起G鬆將AC野完全抽起，別冊變手機Game，
相信係G鬆為ACG鬆護航兩年，終於要脫離母艦獨立運作，
不過咁樣G鬆亦失去佢最大優勢，亦擺明迫你買多本ACG鬆，
哇，每個禮拜買多本野感覺好肉赤，亦唔想買兩本雜誌咁累贅，
可惜池中無魚，本地都無乜Game書選擇，你又奈得佢乜何丫？
睇讀者群有無guts，若然鎖量大跌，証明市場策略錯誤，
望G鬆能有機會打回原形，更期望再有新Game書誕生，
消費者有更多選擇，當然呢個可能性係近乎零啦，
近年雜誌界係一淡死水，黃咩達傳肥佬黎意興闌珊想放盤，
做左咁多年o既Yes!都傳出要摺，唉，又一門夕陽工業。