mos buger出左隻鰻魚珍珠堡，睇圖賣相好似幾吸引，
用飯取代漢堡包果兩塊麵包，D飯算實淨唔會一拎起就散，
入面有菜絲有蛋有鰻魚有塊紙菜，呢個配答味道真係無得輸！
有D似熱o既鰻魚壽司，但咬落去個口感好正，超好食！
只係擺位擺得唔好(唔知係呢間分店問題定規定係咁樣擺)
D餡全部質晒響對住你果面，另一邊就無乜野，好唔平均，
要掰到個口好大先可以一啖咬落去感受呢份層次感o既配答，
睇番官方張圖又真係整到咁厚咁難入口，好心擺得平均D啦！
又係果句mos burger入於土豪級餐廳(相比起M記同KFC)
比正餐更貴o既價錢只係少過下午茶o既份量。

朝早去睇樓，裝修工人已經動緊工，
無機會見識未裝修前o既樣貌有d可惜，
我地係用果d裝修套餐，兩萬幾包所有野，
包括擇房、舖地版牆腳線、油漆油等，
我以身為設計師o既專業觸覺思考，
揀邊隻拋光磚做地版、漆油顏色、
廚櫃顏色、窗台雲石同埋房門款式，
牆身用白色，不嬲黑、白tone係百搭色，
最易襯托唔洗煩，地版用純色怕太dry，
我比較buy木紋色，但亞媽話似隔熱版，
正想深思熟慮揀邊隻好時係咁催我快d，
喂家下唔係買棵菜，漆油唔o岩可再油過，
地版唔o岩好難拆番再舖過架！
結果揀隻雲石花紋，再額外加雲石門檻。
睇完單位再去鄰近商場食lunch，
呢區好多單位都未入伙但食市都好多人，
接駁巴士(要3蚊)來回都係無位坐要企，
遲d入滿伙仲得了o既？

打機對我黎講係一份情義結(較早前blog都有講過)
而格鬥Game更加係情義結之中o既情義結，
自細迷上街霸到拳皇，戰鬥稱得上係男人o既浪漫。
但一直以黎都對格鬥Game呢個設定感到迷思，
尤以鐵拳系列最甚，就係當角色壓住對手施暴，
點解打幾下會自己起番身或行開放對方水？
例如鐵拳將對手推倒然後左右拳咁打落去，
應該打到對手至死方休，可以打仲唔起勢打落去？
除非有個裁判分開雙方，或者被壓果一方掙脫，
咁樣無辦法繼續施暴先係合情合理，
但鐵拳d人就好似放低件貨落地咁斯斯然起身，
真係人不可貌相，個樣大奸大惡原來咁有風度。
blue mary出arm bar又係點到即止，
不愧為崇尚武士道精神o既大和民族出品。

又話全球暖化，突然跌到8度(新界區得6度)
日本東京仲落埋雪(好似話十幾年黎無落過)
全球冷化就真，正所謂睇相佬o厄你十年八年，
天文台o厄你一世！星期一已開始氣溫急降，
最慘加埋霧霾陰陰沉沉，間中落埋雨，
如果有太陽照熱下塊地版都唔會咁凍丫。
我都不以為然，只係著番果件黑色有帽衛衣，
夜晚同呂少響銅鑼灣食完韓燒出黎都凍到震，
發現原來用有帽衛衣頂帽粒頭係暖番d，
所以果頂帽唔係裝飾咁簡單，真係有用架！
諗住星期二唔洗點行d咩食風位照著番果件，
都係唔多頂得順，星期三都要出動絕招，
Levis軍褸！平時唔多想著因為重同行動不便，
呢d日子唔著仲等幾時著？的確係暖好多，
不過室內外溫差太遠，落到地鐵站又熱好多，
番到公司都係長期將件軍褸放置play。

MSN比Skype食左已經有一段唔短o既日子，
用PC版MSN會唔比你上強制迫你轉Skype，
估唔到用mac版MSN開番依然運作正常，
但在線o既人10隻手指數晒(我個list約100人)
轉轉轉轉乜丫？d人嫌麻煩咪唔再開囉，
明明技術上可以用番MSN硬係要搞咁多野，
好啦，d人流失啦，開心啦？