揭開今期(412期)GZ，佔半版o既員工聲明，
話前總編輯C君爭公司數，要搞社內聽證會，
要求C君出席向其他員工交待......
睇完，我第一個反應就係「哇玩到咁大？」
番到公司，連我地公司總編都走黎問我呢單野，
仲話「真係好難睇囉」我都係咁話，
呢D內部糾紛所謂家醜不外揚做乜攤晒出黎呢？
作為GZ前員工+長期讀者，涉事人我都叫做認識，
所以對我黎講呢單野好睇過半澤直樹 XD
比著其他未見過GZ編輯部真人o既讀者，
或許唔大興趣收睇呢場鬧劇，老老實實，
我完全中立，既睇開GZ亦聽開C君個網台節目，
分柝番單野，C君對ACG鬆o既指控的確過火左D，
(指封面寫「送惡魔繞美焰海報」有劇透)
如果封面係惡魔homu造型再加埋呢幾隻大字，
為谷銷量咁就幾唔要得，衣家只係細細幾隻字，
咁佢寫「小圓高達」都可以係惡搞姐，
未溝成劇透威脅，諗多左，比較雞蛋挑骨頭，
不過作為編輯都應該謹慎避嫌提都唔提就最好。
而GZ就話C君走數，正如GZ fb群組d人留言都話，
欠數無理由隔左半年先黎追假？這不科學，
而C君亦講只係一個編輯點樣爭公司數呢？
CEO就有機會私吞公款或開公數做自己野姐，
而且真係爭錢，報警啦，搞乜聽證會？
豬肚都反左啦仲洗比面？當然其實佢地有乜恩怨，
要搞到咁大，作為局外花生友o既我唔會摸得透，
以上純粹就擺響檯面o既事件分析。

如果問我最鐘意邊個節日，唔洗諗就會答聖誕節，
不過我又唔係基督教或天主教徒，聖誕有乜意義？
再者咁多年黎聖誕咪又係咁過，都無乜特別經歷，
純粹係洋溢響果種浪漫o既節日氣氛令我感覺良好，
天氣凍凍地，周圍都掛滿聖誕o既裝飾品同燈飾，
電視、收音機隨時都聽到聖誕歌，好愉悅~ >v<
香港無落雪，如果唔係節日色彩會更加濃厚。
追溯番最早期o既聖誕印象，都係幼稚園果陣，
學校搞抽禮物，依希記得我抽到架TOMY模型車仔，
小學果陣同學間仲會亙送聖誕卡(中學好似已經唔興)
可能就係呢份收到禮物o既喜悅深深咁烙印響意識中，
仲有伴隨而黎o既假期呢(仲要痴埋新年放)
呢D美好陰影(?)令我打從心底鐘意呢個節日。
出左黎做野，節日帶比我o既好處逐漸蕩然無存，
好似今年個聖誕咁都係響工作壓力中渡過，
加上單身o既妒忌怨念促使我唔希望呢個節日來臨，
聖誕比到我o既只有潛意識o既好感。
 

上年有送聖誕卡，今年無理由唔送假，1不做2不休，
不過一番到公司就先收到老細o既聖誕禮物，
係一個類似金字塔o既agnes b朱古力，人人有份。
今年送我話好靚o既流動咖啡車聖誕卡比亞頭同拳，
不過架車設計有D煩要有小小技巧先摺到出黎，
老細同秘書就送D一攤開就立體o既聖誕卡，望望檯頭，
上年聖誕老細回禮(?)o既聖誕樹朱古力盒仲響度，
斬下眼又一年，上年我送過D咩聖誕卡仲記得好清楚，
送左立體船聖誕卡比亞頭，送左聖誕樹型聖誕卡比拳，
送左屋型聖誕卡比suki，送左透明聖誕卡比秘書，
仲有送過張音樂聖誕卡比Mattew，打開櫃桶，
其實上年D聖誕卡o既包裝袋都仲響度 XD
 

雖然放假，但工作纏身，放得唔盡興，
本來RO加倍週，都無心情練功，
類似咁o既情況已經好多次，
上期埋版果個禮拜D星期六日又係咁，
黎緊25號又有假放，唉，
咪又係要比工作毀左我o既假期，
睇番日歷，農歷初一係1月31號，
31號無可能仲搞本野(實脫期啦)
所以如無意外應該可盡情放新年假。

王維機又再創奇績，雖然不獲發電視牌照，
突然出一招用流動接收器接收電視，
令HKTV番生，仲贏得普羅大眾熱烈掌聲，
並封為港版喬布斯(乜唔係半澤直樹咩？)
其實之前王維機已經創造左神話，
試問當今有幾多打工仔唔係背後講老細壞話？
王維機被喻為良心企業，D員工係支持老細，
唔係拉大隊罷工追討欠薪，係載歌載舞聲援老細，
導演話劇組要解散，不過如果想拍落去都可以，
D員工話就算無糧出都拍埋去為左尋夢，勁感動，
討論區有人留言自願做無薪工人(當然無請到啦)
雖然輸左間公司但贏盡民心，贏得勁靚！
呢D仲唔係神話？其實響呢個位畫上句號，
呢件事績可以完滿結束受後人歌頌留芳百世，
但事件延續落去，究竟呢個神話可以維持幾耐？
一間大企業只要營運得耐實有問題，
一定會有做得唔好o既地方甚至比行家抺黑，
例如投訴D節目唔好睇、無新意、政治唔正確等，
但呢D係在所難免，總無可能符合到7百萬人口味，
又或者有員工出黎話人工低、顧主無良假仁義等，
真係唔希望見到有朝一日有鬧HKTV o既聲音，
亦令當初支持者大跌眼鏡，神話幻滅，
以其咁樣，不如比香港人留個美好o既回憶仲好，
衣家只好拭目睇下呢個良心形象可以經營幾耐？