apple野一向比人高貴、名牌印象，但睇真D，
同同類型產品相比之下一D都唔貴架喎，
以macbook air為例，咁o既價位輕便筆電，
有咁o既效能，都只係七八千蚊左右，
睇番SONY、富士果D閒閒地都要皮幾兩皮野，
當然你可以話缺點係無windows同觸屏啦，
但其實唔係平版電腦就算有觸屏都唔會點用，
觸屏操控係無滑鼠咁就手，公司做數碼產品雜誌，
經常同代理拎到各大品牌筆電番黎試機，
D編輯都係用滑鼠操作，所以我知道。
macbook亦可以裝windows(當然要另購)
食晒兩家茶飯，調番轉其他筆電裝唔到OSX，
當然一般用家或許覺得OSX無用、多餘，
係我從事設計行業先會用OSX架姐，
所以對我而言macbook air係物超所值，
買一部野等於同時帶一部mac一部PC出街。
重點係macbook金屬機身真係無得輸，
果隻金屬銀並唔係一般膠殼油浸灰色可比美，
摸落去冰冷，敲落去清脆，拎上手有質感，
我拎過SONY皮幾果部筆電，膠殼感覺較兒戲，
而且表面仲滿係指毛，論美感macbook贏晒！
再講周邊，其他品牌筆電無專用保護機殼，
梗係啦，部部都唔同款，出得邊隻殼？
macbook就有好多唔同顏色副廠殼任君選擇，
可以每日唔同色襯衫都得(不過我唔會咁做 XD)

人大左，無乜點打機，甚至可以話無乜動力去打，
但都一直有睇開豬鬆同熱衷留意game壇動向，
點解？因為打機對我黎講係一份情義結。
執野時摷到本超任博士3 o既說明書，
憶起細個o既打機史，要數我最早o既遊戲機o既話，
非Game Boy莫屬，其實算遲有啦，
同學仔都有紅白機，然後我先有超任，
一開始得一餅街霸II帶，去王元凱屋企玩北斗之拳，
格鬥game「丫叉叉...牙叉！」好過隱，叫老豆買，
點知佢買左隻RPG北斗，當然係玩兩野放置play啦，
試問細路仔又點會有興趣對住一堆睇唔明o既日文？
然後有超任博士，正式進入細個打機史o既全盛期，
多得呢部野，細路都可以用有限o既零用錢，
玩盡無限o既超任game，不過有印象o既幾隻手指數晒，
大盜伍佑衛2&3、孖寶賽車、炸彈人、街霸II turbo，
呢幾隻game o既旋律到今日我都仲記憶尤新，
小學排隊早會時仲同同學亙亨街霸D BGM，
當年覺得玩街霸係一仲好潮o既行為，
同朋友鬥出波開到好大聲比人地聽到覺得好威水，
只係識chok波升根本唔知格鬥game o既真正玩法。
又摷到張NEO GEO CD機單據，加埋Game要5千蚊，
心諗點解當時點會想買部咁o既冷門野？
記憶中呢部野只係玩過拳皇94同世界英雄JET，
廢機一部load game勁耐，然後賣左換3DO，
當時大部份同學朋友仔都仲係玩緊超任，
我就轉左兩部當年o既次世代機，認真奢侈。
3DO叫做come玩D，主打超級街霸IIX，
仲有好多過隱野包括一隻廣東話o既功夫game，
同埋一隻可以周街車死人o既電單車game，
論瘋狂當然遠不及現今GTA或sleeping dog等，
但當年黎講呢種殺人電單車game算係幾破格。
然後就進入playstation同staurn時期，
超任王朝亦宣告結束，多得翻版盛行，
呢兩部機可以普羅大眾同埋百花齊放，
當年經常放左學去蔡pen屋企打playstation，
玩龍珠扮杜拉格斯講「宜しく」變「your school」
又玩jumping flash、KOF95、96...
大個左真係無乜呢D意境，好難再玩得咁放，
再次落KOF坑之後97仲買埋NEO GEO帶版，
成2千蚊隻Game仲貴過部機衣家諗番都覺得喪，
仲夾埋蔡pen瞞住兆豪響電話比佢聽97 o既聲音，
哈佢好好野單憑一聲雷光拳就認到係97...
不過當年未意識到自己其實係無打格game o既細胞，
就算幾有愛，都係打十舖輸十舖，輸到無晒癮。
98、99都無乜點玩，到2000再次買帶版，
呢餅帶總算係挽回唔少榮耀，雖然都係輸多贏少，
但識用好多冷門striker連技，輸都輸得型過人，
甚至響街對戰比對手賞識，仲識到新o既打機圈子，
唔止打KOF，仲有音樂game，一堆人響新港聚會，
而2000仲係遲遲都無出模擬器，所以賺左。
2000之後SNK就收左皮，比韓國接手，
而蔡pen去到03之後唔知點解完全唔再掂KOF，
轉左去打高達直到今時今日...
我仲keep住KOF，不過睇多玩少，衣家都無掂。
04定05年仲同兆豪晚晚落天威，有一齊煲開鼓機，
之後同兆豪響楚留香一場爭執咁就無再做朋友，
呢場爭執一個月後響RO識到我第一個EX女友，
RO係斷斷續續玩到今時今日都仲有玩o既網遊，
然後做過機舖，機舖過後先開始出現呢個網誌...
近年間芒亨都係一隻我投放唔少時間o既game，
不過網誌有提及所以呢度唔洗講咁多。
打機佔我成長o既歷史中都幾多頁數，
所以話情義結就係咁解。

摩星嶺4號近年來最認真聽o既節目，
記得以前一到零晨放低手頭上工件，
準時聽live，一路聽一路食品客薯片，
無畫面都可以好似睇戲咁睇。
可惜呢個節目都摺左半年，
雖然仲有網台神秘之夜、奇奧研究社等，
但前者學術資料過多好似上堂聽書咁偏悶、
後者感覺吹水成份多，功力亦爭D，
不過呢D神秘節目點都會繼續支持~
最近發現d100有個東頭灣道99號，
主持花家姐係以前危險人物班底，
功力應該有番咁上下，尋日果集仲有雲海，
聽落有番D摩星嶺4號feel~
呢個節目講兇殺案為主，都有講靈異野，
聽D血腥獵奇野又幾興奮(變態)

跌到十幾度，開暖爐衾綿被訓教，
風扇可以收起，應該唔會再熱番。
雖然番到屋企個身可以好乾爽，
(平時番到屋企一定出汗)
但伴隨而黎o既仲有傷風同鼻水，
呢樣都係我唔鐘意冬天o既原因。

做到零晨4點放工，響麥記嘆番個3號早餐先番屋企，
用餐刀切割一小片蛋，用叉吉埋落塊豬柳，
刷上黑椒粉同鹽一齊放落口，餓依斯~
正當享用到一半之際，聽到「霹靂霹靂霹靂啪喇...」
仆你個街！係個響垃圾桶摷緊垃圾o既亞伯放屁！
當堂無晒位口，不過都格硬食埋個餐，廢事益佢！
亞伯應該係諗住放個屁趕走食客然後食埋D淨低o既餸。
禍不單行，今日落大快活食個亞活咖喱魚柳飯，
有個光頭o既亞婆坐埋黎，問「你係咪做野呀？」
我心諗關你叉事咩？唔理佢繼續食，亞婆又繼續講，
「睇你D衫應該係啦」我當時係著黑色有帽衛衣，
邊間基構o既制服呀？都唔知佢up乜春繼續無視佢，
個亞婆又繼續講「鐘意我唔好呀，眼角高」
哇九唔答八到痴線！邊Q個鐘意佢？佢自己坐埋黎！
即刻拿拿林食埋幾啖走人！安已不！好想報警！