上星期去銅鑼灣通利諗住買結他CX40，
(當日間野無新貨買唔到)行經銅金，
一個係中學時期經常留連o既地方，
如今已經唔存在，我都係上個禮拜先知。
機舖算係夕陽工業，只見一間又一間摺，
已經唔見有新機舖誕生。
(呢個已經唔止香港面臨o既問題，
日本都息微緊，遲d可能再開blog講下)
尋日行過德福又係為買結他，
巡例都要探一探viture zone啦，
呢個大場想當年都搞過唔少大型kof網聚，
慶幸今時今日都仲保留住機舖應有面貌，
仲入左好多音Game可謂反市道而行，
dmXG、DEA、maimai、jb、rb樣樣齊，
連古董級跳舞機、bmIIDX同popn都有，
DEA又見到靚女跳(玩呢隻Game要好大勇氣)
今次係個爽朗男仔頭打扮o既女仔跳，好有型！
跳得又要好睇，印象加爆分呀！(諗起96貓)
仲有部konami出o既soundvoltex，
玩法又係難以理解，左右兩邊有個扭掣，
一扭畫面入面個界面就會跟住打斜...
題外話，其實konami出新game唔係壞事，
但d game要跟埋部雪櫃咁大部o既專用機，
以衣家機舖越黎越難做，你仲加重佢地負擔？
盞玩死機舖炸喎，機舖都摺埋邊個買呢d機？
都係以前SEGA Astro city(白機)年代好d，
一部機換塊底版又有新game玩，
個個場都買得起d game又易普及，
game普及多人玩多人交流先會多人入錢，
(自己一個玩到無敵無對手打電腦有乜謂？)
可惜衣家d廠唔多出呢d底版式o既game。

第五枝結他入手，今次係一枝classic，
玩開finger style都係用番古典比較就手，
之所以買呢隻型號係貪佢可以插音箱，
850蚊，唔買貴野住，反正屋企又潮濕，
枝Taylor就係咁潮到琴頸同弦線距離好遠，
廢左武功，買平野真係壞左都無咁心痛，
等有朝一日我結他功力去到另一層次，
必定會再買番枝貴野 XD

幸好叫做脫離服務行業o既魔爪，
可以選擇比較理想o既工作，
響RC有個網友做7仔，又傾下呢一行，
聽聞守夜更如果守正果間舖比較偏僻，
晚晚都有人入黎偷野，仲要隻眼開隻眼閉，
點知果D友仔係咪食開白粉定K仔？
癲起上黎拎枝士巴拿桶你兩野就係咁先啦，
打份工姐，唔通搵條命去搏咩？
而且夜更7仔好多時得一個人看舖，
有起事上黎無照應，就算去追個賊，
咁邊個看舖？邊個想做份工日日比人偷野？
當過左個撇帳額仲要自己um何包補番條數，
分分鐘賺埋都唔夠蝕，所以D店長想炒人好簡單，
將個員工調去呢D死位，不出3日都收到辭職信。
傾開果位網友就話佢睇果間舖都叫響大街，
無咁雜，但都知新界區果邊好多有以上情況。

眼見繼絡界大哥Yahoo!都要停止營運Blog，
呢種網誌文化會唔會繼個人homepage之後塵呢？
開個題講下我對網誌o既睇法：

1.記錄生活o既點滴
其實好多日常鎖碎事唔會刻意去記錄，
你唔會有本簿仔寫低幾時換左個mouse，
幾時剪過髮、幾時換沐浴露、對鞋幾時買等，
有時想追尋番對鞋著左幾耐先爛都無從溪考。
日誌就提供一個可以記錄呢d無聊野o既平台，
亦唔會有開一版紙只係為左寫呢d野o既浪費感。

2.方便管理
或者有人有響本簿仔寫日記o既傳統習慣，
寫得多果陣，要追塑番某件事並唔容易。
網誌正正具有好好o既管理系統，
例如題材分類同埋時間分類，
我亦有諗過響自己部電腦開個日誌floder，
將每篇日誌以txt檔儲存，
發覺要分類搜尋想睇o既題材都幾唔方便。
另外傳統日記取代唔到網誌o既就係流動性，
我可以響公司趁上司唔響度果陣，
利用呢D時間打網誌。 XD

3.罐裝材料
我比較習慣袋定D話題，有時同朋友傾計無野講，
就拎呢D出黎燒，所以都要搜集定一堆罐裝材料，
就算聽完收音機，想講番個主持講過o既話題，
總係演譯到甩甩咳咳，因為果D材料唔夠深刻。
查實打開日誌就係一堆好好o既題材，
係自己親身體會到o既野講出黎唔會生硬。
而要達到呢個目的亦多得上一個point o既support，
唔係搵到天光都未搵到合適o既題材。

4.亙動
呢個point對我黎講比較薄弱，不過都講下，
有D人add好多blog友同好多訂閱者/粉絲，
每篇網誌都有唔少留言同樓主回應，
令呢篇日誌更有意義同價值。我網誌係比自己睇，
亦無乜唔見得光o既野唔介意有人睇，
(真係有唔見得光o既都唔會開放出黎啦 XD)
有人睇就睇無人睇亦無所謂，自我感覺良好就夠。

5.提升寫作能力
脫離求學期出左社會做野，除左做文職之外，
相信唔少人可能幾個月甚至一年都無寫過野，
日誌就係比自己一個寫作o既機會。 XD

6.存在感
網誌就係存在o既其中一個證明，
唔好比呢樣野流失響時間o既巨輪入面，
當你睇番自己寫過o既日誌，反問番自己：
「下？乜原來有D咁o既事？」
咁你就明白到呢個point o既意義。
(呢個point唔單指網誌o既，傳統日記都得)

網誌係有其他網絡社交平台取代唔到o既特質，
好似facebook、plurk果D咁好難搜尋番出過o既帖，
亦唔方便寫得多字，所以唔多希望blog會沒落。

放工又係買個蛋糕，今年再貴D，
響龍島買個$179 o既迷你朱古力芝士蛋糕，
本來想買三百蚊o既同款正常size架，
心諗都係唔好加多個令自己增肥o既機會啦...
有諗過買埋pizza，但知媽媽食左飯又煮左蒸肉餅，
咁即係又製造多碟過夜餸啦，又打消左呢個念頭。
店員問洗唔洗加生日牌，就算無人生日都加啦！
多塊朱古力喎點都抵D，附送好特別o既螢光蠟燭，
開頭仲以為中秋節果D啪會發光o既幼身螢光條...
今年唱中式生日歌「恭祝你福壽與天齊」果隻 XD
講下個蛋糕，表層係密度濃厚o既朱古力醬，
就咁睇落以為係硬o既但蠟燭可以輕易插入，
裡面係朱古力慕絲，芝士就唔多覺啦，
感覺係份量絕不戲場，不愧一分錢一分貨。
雖然迷你個蛋糕咪又食左一半擺雪櫃留聽日食，
所以係無買正常size o既必要 XD