老細個寶貝女就讀小學二年級，
早排幫老細整左個家長教師會o既中秋活動海報，
今次就係幫佢個女做個project，
小學雞d作業居然出動到designer？(汗
正常唔係應該用蠟筆畫到東歪西倒咩？
難道果d老師睇唔出一個小朋友係做唔出呢d功課？
其實上年都有幫佢個女做d入學介紹，
介紹個女多才多藝學畫畫、彈琴、芭雷舞、演話劇，
見多識廣有去澳洲睇動物園、坐過直升機、養鸚鵡(?)
平時家庭活動係一家大細坐遊艇等，
有錢人真係唔同d...

若然無記錯呢個產品應該從我小學果陣就已經存在，
不過我無食過，咁總唔係所有零食都食過掛？
本身對蝦條無乜興趣，不過以前公司發生過一段小插曲：
同事A：「請你食蝦條。」
同事B：「我唔要人請，我要呃蝦條！」
然後同事B手指向同事A身後講：「你望下後面！」
同事A望向身後，同事B趁機拎左幾條蝦條食...
「呃蝦條」其實係高登潮語之一，
取其諧音意思係欺騙女性發生性行為，
er...明就明唔明就...都係唔好明啦~ XD
就係咁開始對呢個食品有d興趣，
如果有機會都想玩下呢個爛梗 XD
(所以話成功o既廣告係幾重要！)
而我媽居然買左卡樂B蝦條番來(唔知係咪大減價)
就試下啦，味道介乎印尼蝦片同卡樂B雜菜薯條之間，
不過卡樂B雜菜薯條好食D，整體黎講麻麻...

部N3DS由首發果陣入手，唔經唔覺兩年幾，
內置有個使用統計，今日無聊o禁入去睇睇，
原來部機玩過15隻Game(唔計內置果d)
有D純粹朋友借黎插一插玩兩野就比番佢，
例如Winning Eleven、Asphalt 3D(賽車)
以下就目前為止做個頒獎典禮(?)
總遊玩時間最長獎：
冠軍：Monster Hunter3G[156小時15分]
亞軍：Street Fighter IV[51小時30分]
季軍：Tales of Abyss[51小時05分]
遊玩次數最多獎：
冠軍：擦身傳說(內置Game)[106回]
亞軍：Monster Hunter3G[72回]
季軍：相機(內置軟件)[59回]
單次遊玩時間最長獎：
冠軍：Monster Hunter4[2小時23分]
亞軍：鐵拳3D Prime Edition[2小時15分]
季軍：Monster Hunter3G[2小時10分]
單係MH3G已分別囊括總遊玩時間、遊玩次數、
以及單次遊玩時間o既冠亞季軍，不過並唔意外，
而單次時間冠軍居然比新鮮出爐o既MH4奪得，
總時間季軍o既TOA其實係借左比朋友玩...
鐵拳竟然係單次時間亞軍，買左咁耐開得一次，
相信係拜佢隨帶附送3D電影o既功勞...
其他不獲獎名單包括Ridge Racer[12小時]、
Bio Hazard Revolution[14小時]、動物之森[14小時]、
孖車7[5小時]、初音[2小時]等，話長唔長話短唔短，
買左咁耐玩左超過250小時(換算日數超過10日)
算係對得住丫~

放工番屋企食完飯訓左陣，11點幾上蔡記屋企屠龍，
(話說佢搬左去麗廣城新居咁耐我都係第一次上去)
帶埋火牛打通宵，由於新game仲未有攻略等資料，
全部野都慢慢摸索，走左D冤枉路在所難免，
例如打左幾次徹甲蟲只係整到條腰，
其他部位一直未有key item開唔到，
D怪未知佢D套路用多左時間打，又未知key quest，
開波前仲係咁offline大法洗回復藥、蜂蜜等，
打到第二朝七點都只係o岩o岩上到HR2...

自上一代MH3G就無得用C字手玩，
我一直希望有得響option較下面十字掣移動，
上面粒菇轉視點，可惜今集繼續失望。
老任私心想令人習慣左任記操控返唔到去PS系列，
(不過都要capcom配合先令佢得呈)
我敢寫包單假使有一日MH系列從返PSV手中，
D人好快就適應番C字手，呢種玩法先最附合人體工學。
眾所_知，自古至今o既遊戲機手掣，
左邊手指公都係負責控掣角色移動呢個重要使命，
手指公控掣視點食指移動係dame！(個腦實打kick
但手指公控掣粒菇食指亦無辦法屈入去o禁十字掣，
所以任記好反智到出個slide pad令部機變巨無霸...
而個slide pad只係響右邊加多粒菇控掣視點，
大佬呀，咁右手點能夠同時o禁R跑同斬同轉視點呀？
所以好多人都話PSV先係MH最好o既平台，
如果MH出響PSV，3DS一早就玩完。

睇forum見人貼圖日本MH4首賣狀況，
每個賣game o既地方都好似CW咁排晒長龍，
D人拎住個籌係No.586，超級誇張！
部機無Game唔緊要，出一隻MH好過人地出100隻Game。

講堅，今集畫面方面唔覺有咩進步(直情係無...)
尤其是D蜘蛛網位鋸齒粗到呢...簡直自暴其短！
可能capcom唔出響PSV其中一個原因就係可以hea出，
出落3DS畫面衰可以賴機能差，出落PSV畫質要交差有壓力。
行落蜘蛛網好似行平地咁，無D彈下彈下o既感覺，
個人甚至可以好穩陣咁凌空企響D蜘蛛網隆位上面，
可見唔止畫面hea連物理演算亦馬虎...

抵讚o既係今集新加入地型系統令遊戲打法更豐富，
相信習慣左MH4系統玩番舊作會覺得舊作好死版 XD

老實講，MH4難度依然會令未接觸過o既新手卻步，
所以如果呢班舊有支持者唔玩市場只會慢慢流失，
現今新一代o既玩家好多都係休閒遊戲o既輕玩家，
唔鐘意玩D具挑戰性o既遊戲，所以MH難以有新血，
慶幸o既係呢班舊有支持者數量都極為龐大，
MH系列絕對可再出幾代仍有市場保證。

行觀塘廣場，賣game o既舖頭企滿人，
唔係買game就係出機，呢度只係觀塘都咁，
響灣仔188或旺角信和真係難以想像。
行過一樓間藍店見到有女仔問有無MH4，
唔知係女獵人呢定廿四孝女友。
睇forum有人話ktgh派籌佢拎到180...
如果間舖o既籌真係由1開始派起都米話唔誇張，
單單係一間舖一日內就已經賣180隻以上，
兩點廿幾人排住隊買game拎game，
今日星期五炸喎點解兩點都咁多人咁得閒？
對上diablo3之後game場好耐都無咁熱鬧啦~
行過大快活，都見到有零碎o既獵人開緊波，
仲睇住個肥仔教個女仔(OK靚o既)玩...
聽日先係正日出game，香港呢批只係偷跑。
(我尋日就響觀廣頂樓$599入手仲送海報添)