同事離職前送贈一包韓製辣芝士麵，
由於包裝寫韓文所以講唔出牌子或正名，
黃色為主o既封面有鮮紅o既湯麵參考圖片，
呢個配答聽落都好吸引，食落絕不戲場，
麵條相當有彈性，浸耐左亦未見變軟，
濃郁o既芝士味湯底，仲有餐肉碎粒、
粟米(極少量)同埋菜碎，色香味俱全。
應該都要759果D地方先買得到，
咁落足料o既陣容相信價錢唔會平...
 

試過幾次響交易網同海外賣家買野，
專登簡賣家3天內放上去o既野買，
好快完成無問題，今次就試買15天前o既貨品，
出事啦！個賣家根本放置play，
check都無check過有人買左佢件野，
佢只係留低句落左標就打個電話通知佢，
我無申請長途電話架！點打？
以前OK些粉就有放部黃色o既電話，
入錢就可以打長途電，衣家無左呢條歌仔唱，
咁即係要專登去申請漫遊服務？
我用3台，申請打到漫遊要比1000蚊按金，
真係未見官先打八十大版？只好放棄。
好心個交易網，有人投標賣家o既產品，
系統就自動發短訊通知啦！
更加好心D賣家，你放得樣野上去，
就唔該日日都keep住上去check下啦！|

約左個好耐無見o既舊同事食飯，
呢位人兄一向都比身邊o既人話佢吹牛，
無見一排估唔到變本加勵，吹得更大，
佢分享佢d好似科幻動漫故事o既經歴，

例如行行下街全條街d人都怒啤佢，
起初佢以為果日著得seven不以為然，
連個男人抱住個BB都怒啤佢發覺唔對路，
跟住有d白影拍番入果d怒啤佢o既人身上，
然後條街恢復正常...

又有次番工途中突然上左天堂，
去到一個全個空間都係雲o既地方，
見到一個幾層樓咁高o既大門框，
再見到一個同佢一樣樣o既人，
佢叫呢個人信耶穌啦，耶穌幫左佢好多，
(寫出黎都覺得呢個劇本點會接到落去)
然後果個人同佢講「你真係咁信我？」
佢話原來果位就係耶穌？！
(咁佢仲唔係耶穌轉世？！)

佢又有時腦海擁現一個信念，
就係佢要救人！要幫人！
有一股周街捉住人叫佢信耶穌o既衝動...

有次佢話佢o既朋友質疑佢講o既說話，
(佢呢位朋友都係教徒)佢個朋友就對天講：
「如果呢個人講o既野係真o既，就比d表示。」
當時果個人企個位置係天台，好大風，
突然佢身邊d風停止晒，但周圍都仲係好大風，
就好似有一個無形o既罩同佢檔住d風，
然後果個人話：「我信啦...」

佢探一位病重o既老人家，
佢同個老人家溝通，個老人家講鄉下話，
佢講廣東話，佢又聽得明呢種陌生o既語言，
老人家又聽得明佢o既廣東話，
而老人家o既親戚響後面睇住O晒咀，
之後個老人家接受佢o既幫助之後康復左一排，
然後又死左，佢話神唔想佢繼續痛苦，
比佢早一日解脫......

佢其中一個經歴引用埋已故o既舊同事，
不過唔想響度寫，覺得咁樣太過份。

佢經常話上面(指仙界)一直打緊丈，
唔同o既宗教神靈打黎打去，
又話睇電視見到有隊兵馬從個電視走出黎...

以上全部都係呢位人兄o既經歴，與本人無關。
仲有好多不能盡錄，其實一兩單呢d經歴可能會信，
但佢講到好似日日都發生，真係痴線。

近排面書有D人add我，通常o禁確定前都睇下佢乜料，
睇個頭像係個平凡女仔黎，個名仲係好普通o既真名，
例如吳嘉欣、陳詠欣咁樣。一睇個wall乜都無，
亦無共同朋友、組織，再睇個註冊日期係尋日，
咩料呀？3唔識7，謊唔係add完係咁噴廣告果D咩？
米以為求其搵個女仔頭像同女名D男人就容易D上當先得假。
之後第二日又有個類似手法o既人add我，
只係唔用全名改用英文名例如Kitty Choi、Cathy Leung咁，
個wall又係乜都無，然後呢幾日都有類似呢D人add我。

對於點樣有效率賺取卡馬，噗浪無乜詳細指引，
以我所知就係保持一日發一個噗就會加小小卡馬，
不過發多過一個噗都唔會有加更多，
(如果係得o既話D人洗版咁炸河道實升好快啦)
亦有傳聞話一日分6個時段發6個噗可以加6次卡馬，
呢方面未證實，遲D再考究一下。
有人加自己粉絲或朋友都會加卡馬，但呢D好難控制。
講起每日發噗，有時真係諗唔到有營養o既噗好發，
有D人會每日只係打個hi或表情黎呃卡馬，
我又唔想咁做無野寫寧願唔寫，但一日唔出噗係扣卡馬，
加就加0.01，扣就扣0.05真係好傷(即係要5日先補得番)
最近發現一個方法，出完噗再刪噗系統都會當你有發噗，
所以諗唔到出乜噗就可以求其打個hi再刪噗。
另一個呃卡馬o既技巧相信好多人都知，
就係add拜掰、小秒書之類o既bot，
須知道有人回應都會加卡馬(不過多回應唔覺會加多左)
只要你一發噗呢D bot會第一時間搶頭香，
確保每一個噗都必定有回應。
不過呢D小技巧唔響河道分享，
我都唔想從此個河道水靜河飛又或者一堆廢噗 XD