唔止星期日，星期六都有係屋企砌公司D稿，
今日兩點半番到公司十點半先走人，
即係又番多日工，仲諗住處理埋小小野7點走得，
但結果只係改左一半print out(好似都唔夠一半，
7點個編輯要趕過去中川翔子演唱會，
然後只係轉pdf轉下轉下就十點啦...
個編輯仲話不如星期一改晒先掟file，
我話梗係唔好啦，一陣遲出街印廠又賴，
雖然禮拜日先掟都係遲架啦，
不過遲一日好過遲兩日丫，一於掟左先，
萬一要問責講星期日掟點都好聽過星期一先掟。
 

我係一個盡量唔會比自己諗D唔開心野o既人，
雖然有D時候都好難避免，越係唔想諗就越係要諗，
不過近期都無乜呢種心病(係咪叫抑鬱？)
平時得閒都會諗一D令自己開心o既野，
當然諗D咩令自己開心就每個人定義都唔同，
可以係諗打機o既野，可以係諗D戀愛o既野，
不過人就應該係咁，心理狀態良好，
自然人都精神爽朗D，散發出正能量，
好似我媽咁就唔好啦，佢日日都擔憂呢樣擔憂果樣，
有好多野擔憂左都係解決唔到，唔諗佢就最好。
 

一隻連上網o既手機apps要更新在所難免，
但係都唔洗咁假？！隔兩日唔夠又更新，
最大問題係我只係會用答車果小小時間黎玩，
佢個更新就更新左我成個車程，唔好再耐D？
好啦，更新都唔緊要，我出番去玩第隻apps囉，
點知第二日開番之前更左幾多就幾多，
局住你要開住個apps硬食更新無背景作業，
要玩果陣玩唔到真係幾火滾！
然後行地圖唔小心拎到D因子又唔比人刪除，
變相要比人search到然後餵飽人地，
我好弱架炸，唔想比人挑，幫佢增添勝利數。

做左一排日式咖哩，終於等到佢個芝士返來啦，
講堅芝士呢個配答真係夾過夾band，
好心就米期間限定變做長期供應啦！
不過最想佢出番果隻三文魚碎芝士，仲正！

話時話睇地鐵廣告有黃金海老飯食，
即係咖喱天婦羅蝦，睇到都超想食，
但從來唔見東廣場間吉野家有show出黎，
唔通有分地區？

之前同3台傾好左續約月費$88，
點知連續收到帳單都係$188，
開頭仲以為係d咩行政費不意為然，
定亦或係我聽錯其實係$188定佢講錯？
今日問個究竟，頂佢個肺聽到真係扯晒火！
原來莫名其妙同我開左好多唔知乜野増值服務！
我係唔會申請果d野，連開左d乜我都唔知！
用都無用過，d雜項加埋仲貴過原本o既月費！
我話點解會有呢d服務，個職員話唔知check唔到，
你唔知唔通我會知？我話即刻取消佢，
佢話佢取消唔到要我另外打去第個部門要求取消，
哇咁麻煩？開服務你就識取消服務你就唔識！
仲有個隧道通話費$20，實數都一定唔係$88啦！
你$108咪$108囉，講乜野$88？最憎人遊花園！
唔好同我講話呢d係政府收唔關佢事，
家陣你講$88我都係要交$108架啦！
理得你係唔係政府收，你講$88就覺得你平d咩？
續約就諸多隱瞞，收到張單就勁大出入！
唔火滾就假！