認識一位女舊同事，真人見面對佢無乜feel，
因為佢個樣真係無乜吸引力，略胖果隻。
不過佢facebook d頭像就真係塑造到好有氣質，
唔知佢搵影樓定係佢D龍友幫佢影沙龍，
佢仲要好識擺D憂鬱、悽美pose，
例如望天、合眼微笑、咬蘋果等等，
再加上獨特o既構圖，例如只係影半邊面果D，
同埋特別o既色tone，專登錯白平衡果D，
然後間中又貼一兩句好有詩意o既文，
令人覺得佢好有意思，即刻加左唔少分。
所以話~型像係可以雕琢架~
唔好影埋d V字手yeah自拍(除非本身好靚女)

食完野口腔內o既酸性就會侵害牙齒...
呢句野經常響電視廣告聽到，
不過番緊工又真係無乜可能刷牙，
但係有個同事幾次響廁所撞到佢，
都係拎漱口水浪口，又用牙線new牙，
真係好健康，唔知幾多人會好似佢咁？

打左電話去叫人再黎搞搞個上網，
之後巡例都旭下插住電腦果條Lan線，
一旭即刻出現果種突然cut線o既程況，
唔通真係條Lan線接觸不良？
即刻換左另外插wifi果條藍色Lan線，
到目前為止暫未再發生過突然cut線程況，
好再觀察多一排先，cancel番個booking，
仲諗會唔會怪錯左之前個NEC型號，
唔係喎，NEC都有發生無cut線但無數據程況喎，
呢種錯誤就唔關條Lan線事，都係有d暗病架啦，
換左佢係正確無誤o既！

再搵職員上門換modem，今次個職員仲換埋D接駁頭，
減少接觸不良o既可能性，整完點知上左唔夠一個鐘，
又斷兩次線，搵人整都夠煩，整完仲係唔work就最驚！
之後都接二連三斷線，半日斷左五六次...
究竟係我手氣差連續換左三個modem都虧o既丫？
定亦或係我部電腦LAN card有問題？
又或係機房出面條線有問題呢？衣家都搵唔出問題所在。
唔好同我講係LAN card有事，部電腦係onbroad LAN，
要換要連塊底版一齊換，真係痴「LAN」線！
 

全新環節，不定期專題《一週熱事回顧》，
將記低一週本人所見o既熱門人氣話題，
通常都我facebook或plurk多人洗版o既野，
(響我眼中好hit響其他人眼中未必hit)
幾多年後再睇番應該又另一番風味。
廢話少講，即刻黎料：

1.書展o靚模孫旗凸點
通常都係蘋果條link，當然好多人鬧爆啦，
又話d家長點帶d小朋友入場呀？
不過某方面黎講佢又成功o既，
如果唔係咁你地又點會forward呢？

2.時代廣場展高達
好多相片影住高過巴士o既零件運過去，
同埋組裝過程，都幾大陣丈下，
呢期乜都進擊，呢個仲唔進擊之高達？
不過我唔係高達迷，無感 XD

3.做完愛回家之後做乜？
呢個梗已經唔係本週，不過照講啦，
早排facebook D人經常問呢個問題，
然後再話邊個好尷尬咁答「沖涼囉...」
其實係問做完TVB套《愛回家》之後播乜。

4.劉子千新MV神炒車
上次果個「我的字典裡沒有放棄(ry」
其古怪控掉+娘爆畫面已經唱到街知巷聞，
今次呢首MV本來好正經，女主角好靚女，
突然黎一個超高難度炒車向後翻騰3週半，
真係更加不科學，玩具車都炒唔到啦。

5.衝上雲霄2墜機feel主題曲
我聽完都真係擺出胡杏兒o既樣囧左，
然後d人話高層send個whatapps比監製，
話搵Cheng Chi Lam(主角)唱主題苗，
點知佢調轉左睇變左Lam Chi Cheng...