為左幫朋友識多樣攝影技巧，所以借部單反比佢，
攝影最佳o既學習方法就係渣部相機響手親身揣摩，
透過多嘗試，同一環境用唔同o既設定睇出黎o既效果，
當年我都係咁樣由一個唔熟攝影原理o既新手到衣家，
睇同事o既問題相片就講出佢用幾多光圈同埋快門值。
不過學唔學到真係因人而異，唔經唔覺，
借左機比佢都有一年(咁我又無急住用，無特別要佢還)
到今日佢都仲未識影大光圈散景相片，
(好簡單只要長焦距大光圈對焦近物背景夠遠輕易做到)
工具響佢手，就算擺十年，唔去嘗試唔去用都係學唔到，
不過佢都係對攝影無乜興趣架啦，算啦。
另外拎番部機發覺半按快門果下「必必」聲無左，
入menu設定係有開架，睇黎應該係虧左，要拎去整整。
當然唔關佢事，D機器擺耐左就自然有毛病，
佢想專等整虧呢D細微野反而仲高難度。 XD
個lowpro相機袋渣手抦位D膠龜裂晒，一拎上手，
D碎片好似頭皮(?)咁散晒跌落地......

睇住公司業務逐漸萎縮，自己亦覺個位坐唔定，
係呢行頭打滾好一段時間，深明大部份雜誌係靠廣告生存，
做過另一間出版社o既女性雜誌，已經出左十年，
但問任何一位女性朋友都未曾聽過，可想而知根本無人買，
點解出到今日都未摺？揭開本書就晃然大悟，
裡面佔一半都係廣告，其實真係唔明D廣告商，
點解肯比幾千蚊去放廣告落一本無人睇o既雜誌。
而自己跟開本日韓明星雜誌，屬於好難落廣告o既類別，
你諗下有乜廣告會落？演唱會？出碟？仲有乜野？
演唱會o既話，你本野實有幾版介紹，洗乜落廣告？
出碟？人地日本韓國D唱片公司點會落廣告響香港雜誌？
除左D日韓文學校或留學果D比較相關之外，真係諗唔到。
眼見跟呢本雜誌o既sales不斷換人，做一兩禮拜就走人，
好似知道走左入一個死胡同即刻離職，認真唔樂觀。
話晒呢個題材o既雜誌都算獨市(明白點解會獨市啦)
衣家只係諗有無可能靠銷量為生，仲睇老細有無心撐落去，
所以本來都對跟開本野前境唔係太睇好，
不過最近書展業績公佈左，本野銷量居然冠軍，
咁睇有得做喎，仲可以玩落去，飲得杯落。
係o既，我讀中學時期亦識得唔少沉迷偶像o既人，
盲目地買自己偶像做封面o既雜誌(平時唔買開果本雜誌架)
我唔係呢D追星群(亦未曾做過)係難以理解呢種心態，
不過只要一日仲有呢D粉絲，本野就有生存空間。
正所謂一雞死一雞鳴，上面o既唔走下面o既上唔到，
有人被炒有人升職，跟開呢本雜誌o既記者已經榮升編輯，
睇住佢遲過我入黎做，已經升左職，自己仲係原封不變，
呢D野好睇際遇，幾努力幾有實力無機會上唔到就係上唔到。

尋晚零晨一點掛八號，居然到掛到今日兩點，
好多打工仔賺左半日有薪假期，
番學o既小朋友直情多一日假，
不過對我黎講同平時無乜大分別~
(平時唔打風都係兩三點出門架啦...)
不過打風仲唔趁機hea多個鐘先出？ XD
番到公司雖然有同事但感覺都係冷清清，
今日係holiday mood就梗架啦！

唔知點解喎，叮熱o既飯(尤其是叮1分鐘唔係好熱果D)
大啖D咁食落去係好易窒息，有種呼吸困難o既感覺，
肉眼睇落甚至咬落去都同響電飯煲煮熟o既飯無乜分別，
但電飯煲煮熟o既飯就算幾狼吞虎嚥都唔會有事，
如果無估錯應該係叮熱o既飯質地比較黏同埋難分解，
就好似你塞舊黏土入口咁，痴住響個喉龍又唔易散，
再質多幾舊自然頂住晒要等佢慢慢sir落去啦。
唔知大家有無試過比叮熱o既飯族親o既感覺？
 

上個禮拜都仲估估下女編輯究竟仲有無得留低，
點知佢今日突然宣佈last day，請大家食西餅，
佢之前入宮面聖幾個鐘頭都係無辦法挽救到。
呢間公司真係要收縮業務啦，咁落去唔健康架，
都係以前老細雄心壯志想擴展業務果陣比較樂觀，
起碼做落都覺得充滿升職加薪o既機會。