果然空穴來風，尋日都仲無胃口，
今日就肚瀉，仲想嘔添(無嘔到)
每次響屋企肚瀉都要靜雞雞瀉，
因為一比阿媽發現又會煩煩煩~ u_u
唔知食錯野定點，又無發燒或頭痛症狀，
只係無精神，慶幸瀉左一日之後都不藥而癒，
慢慢恢復番食慾~

肚入面好似充斥住一股悶氣，
美食當前都提唔起勁，不過對減肥o既人黎講，
相信呢種現象佢地恨左好耐，
減肥最大o既敵人就係食慾，經常忍唔到口，
3點要咬下D零食，夜晚總要食個杯麵先訓得著，
而近日真係無視任何零食，
可以keep到呢份精神都唔係壞事o既...

響觀塘番左兩年幾工，apm二樓半個場都封印左兩年，
D木版印有美食相片寫住cooming soon...
(你個soon都真係幾soon喎)上星期居然開番！
心諗多個大型食場可以舒緩觀塘大量食客o既人流，
唔好經常都無位坐，搵位等位仲耐過食o既時間。
丫點知1樓個美食廣場又摺左(定係根本就搬左上去？
有無搞錯呀？咁咪即係食飯時段一樣咁飽和？
7點鐘KFC排隊半粒鐘，食元氣壽司等籌九個字，
講緊唔係星期五六喎，係平時星期二三都咁，
你唔係驚開多個食場會蝕錢無生意呀fa?!
講番個新食場，下午茶時間去試下(唔係邊有位呀？)
搵左個咖喱屋食個咖喱炸蝦飯，比左錢後佢唔止出飛，
仲比埋個好似手機(厚過部iphone)咁o既機器比你，
部機上面有顯示屏show你個number，
拎得果陣部機會著燈同震，心諗洗唔洗咁懶高科技呀？
比張飛人謊死人地會影印張飛呃多幾碗飯咩？
如果有D白木買完飯唔要個飯拎走部機咁佢地咪蝕錢？
就算唔貴有震有接收感應都要百零蚊部掛？
拎野食果陣好似統一晒櫃位，唔理你買西餐定印度野，
即係衣家一個廚房煮晒咁多種野食？

無線道地綠茶星期日影院，連續兩星期播兩集暗戰，
講述劉青雲釋演o既差人誓要擒獲聰明o既罪犯，
D賊好得閒鐘意搞花臣去玩弄警察，其實係睇D賊點肅灑，
仲期待會有夜神月同L咁上下o既智慧角力睇，
開頭都以為劉青雲算精明識見招拆招，但最尾都係輸，
叫做估到個賊扮飛虎隊，吹奶粉落數字鍵快速搵到密碼，
第一集劉德華都末期病患就算捉到佢都病死，放生都無礙，
第二集劉青雲只有比鄭伊健耍到氹氹轉o既份，
第一集D基本判斷能力去晒邊？次次都比人升東擊西，
最起碼要估到個賊安置晒炸藥響差館丫只係無辦法阻止，
無錯，唔比賊走甩就無戲做，但連小小套路都捉唔到，
一尾只係靠許紹雄o既愚笨癡呆顯得劉青雲比較正常，
睇一個正常差人去捉聰明賊有乜意思？情況只係一面倒，
最尾伊健都係逍遙法外，就算劫富濟貧就可以無後果犯案？
比個犯走甩都算，青雲空有成築準備一億贖金呢個獲點孭？
咁失敗o既警官炒得啦，唔會出第3集，要比個賊肅灑到底，
一係捉到個賊但D錢照捐出，一係捉唔到個賊但D錢保得住，
呢兩種結局都叫做有交帶，警察同賊雙方都有落台階，
總括而言第二集係浪費觀眾時間！
 

睇左咁多年電視，好少有廣告係一聽到要轉台！
係有D比較煩膠o既例如胃仙U多勞多得，
仲有屈臣氏精漏水唱律司歌等等，
屋企大廈有衛視天線，老媽又鐘意睇大陸電視台，
大陸D廣告一向低能！老土！娘！old school！
而當中最克人憎o既就係腦白金廣告！
把聲超級猥瑣唱「送禮要送腦白金(普通話)」
畫面係一個好肉酸o既老人家公仔fing fing下，
真係好有衝動想一拳打爆個電視！
咁都未算，大陸電視台可以連續重覆幾次同一個廣告，
簡直如同落井下石、火上加油！
你無廣告就米鬼播啦！D人係唔買你件野，
你播多兩三次唔通就會買你件野咩？
呢個廣告出街之後更加唔會有人買果件產品！
渣住果件產品行街比人睇到都要恥笑三年！