但凡聖誕到農歷年間，市場都擁現大大小小o既盒裝金沙，
通常係比D人買黎送禮，不過由於48粒盒裝幾抵食，
而且獨立式3粒1條x16包，唔怕漏風唔怕惹蟻come擺D，
所以每年我地屋企都買兩三箱唔係送禮而係自己嘆，
48粒盒裝都轉過幾次款，以前係透明方型膠兜裝住，
外面整多個單色印刷o既紙皮，感覺似批發貨，
記得最平試過89蚊盒，近年都轉左金色盒包裝華麗左，
目前見7-11賣緊120蚊盒，計下條數除番開，
平均7個半一條3粒裝，呢個價同就咁散買唔大分別，
本來諗住買番箱擺公司有時口痕都有野咬下，
不過48粒又好似大箱左D，見有個細盒裝79蚊一箱，
咁就買細箱D啦，點知裡面得18粒，6粒一patch，
將佢轉3粒裝咁計，即係79蚊6條，平均13蚊一條！
哇頂佢！足足貴左差唔多一個double，真係奶野！
包裝係就係幾精美，但我自己拎黎食要咁精美托咩？
頂仲要咁o岩埋手電叢無時間食飯一野食左12粒頂肚，
諗住慢慢搣架，但肚餓公司又無其他野食被迫食金沙...
所以響度奉勸各位，買黎自用千其唔好買果隻！
買黎送禮就無乜所謂。
 

已經由「一週熱事回顧」升華(?)至「本月熱事回顧」，
要持續營運呢個topic原來有D難道，廢話小講去片！(?)

TVB台慶全民響應熄機
因為電視牌照風波，TVB以東張西望踩一腳惹來公憤，
抽咩水姐？其實佢乜都唔做咪乜事都無囉。
網民發起熄機大行動，成功令台慶收視唔夠30點，
之後TVB將矛頭直指壹傳媒，將其列入黑名單，
咁做只會令人覺得熄機行動係成功、有效果囉！
如果佢無任何動作，D人就覺得熄機威脅唔到佢，
就唔會再搞咩野熄機活動啦，都係果句，
其實佢乜都唔做咪乜事都無囉。

拐B案變殺B案
轟動一時o既拐B案，一名母親報稱BB被搶走，
大量網民傳發訊息聲援望盡快尋回失B，
事後翻看閉露電視及警方查證發現有可疑，
真相竟然係該名母親親手殺B然後虛報，
網民都大跌眼鏡，轟動更升級！

路姆西公仔一丟成名
特首及高官出席公開場合被人用公仔丟，
呢個公仔唔簡單，係宜家家私出o既路姆西，
丟出去即有「丟佢路姆西」o既意義 XDD
紅爆公仔旋即搶購一空，話唔定丟公仔果個，
就係宜家家私老闆，極之高明o既生意手法！ XD

連同事行過我個位都問有無聽東頭灣99號，
我話「聽緊啦」，果然係一個好節目，
一路工作一路聽，聽到熱血沸騰 XD
一集講溶屍案，哥士的接觸到人體脂肪，
係會發出惡臭，講到探員上門發現果一幕，
極度噁心，而被告仲要係個溝女王，
坐緊監都有社工同佢結婚，令人驚奇。
仲話有女人幫佢頂左罪已釋放左出黎？！
一集講個女人因男人有外遇毒殺佢一家人，
仲要切埋男人o既生殖器官，極度變態，
個女人想割脈自盡不果要受法律制裁，
聽到最O咀果幕係，個外遇知道後，
竟然自殺埋陪男人，仲要求要葬埋一齊！
外遇居然唔係貪圖富貴，呢d咪真愛囉。
一集講碎屍案，事原只係個吸毒肥宅叫雞，
性愛激烈得滯疑似宅到個女人斷左氣，
然後碎屍，吸左毒神智不清先做d咁o既行為。
一集講一代賊王傳奇事績，講佢犯案手法，
綁架小超人，賺左十億，本來可以unun腳，
居然賭錢輸晒，然後又再從操故業，
真係聽到火滾，幾多人為左幾千蚊人工，
日以繼夜工作，佢袋住十億送晒比賭場？！

繼上次用膳連續行衰運後，今次用膳遇怪人，
話說響美心食緊個鐵版什扒餐有人答檯，
係個瘦削青年，佢買左個咖喱豬扒飯，
睇佢一直只係食白飯，無食到咖喱豬，
心諗佢都係食左D飯先姐，之後先食塊肉，
跟住見佢又拎左第二碗白飯食，
唔通美心有得散叫白飯？唔夠飯食？
主飯碟食淨半碟飯，另一個碗仔D飯食晒，
條友走左，最奇怪o既係咖喱豬旭都無旭過！
佢食飯過程亦無點過半滴咖喱汁，痴線，
叫咖喱豬扒飯只係食白飯唔食咖喱豬！
唔係親眼見到都唔信有人會咁做！
仲奇過魚柳包走魚柳，個世界真係乜人都有。

夢到個女仔幫我寫稿(感覺我好似主編果D可以比稿人寫)
而佢D思想應該幾獨特，寫出黎o既野幾異於常人，
後來唔知係咪個女仔太出位而比另一傳媒揭佢瘡疤，
又話佢以前係好肥衣家變瘦，仲唔知點解suki都接受訪問，
對呢個女仔o既睇法，suki笑話「我一向唔講大話架啦，
呃你我都無著數啦~」應該爆左呢個女仔唔少衰野。
而我同呢個女仔無乜關係，醒左，醒果刻仲好似識得佢咁，
隔左陣我先自問，係喎佢係乜水？我從來無識過咁o既人，
形容一下個女仔算係菇髮型不過頭髮長到去肩，中等身型，
唔瘦亦唔肥，衣著無品味o既T裇牛仔褲波鞋果D，
好似有孭背囊(咁咪即係鐵果種打扮？)
個樣睇落無乜精神內向無乜自信，類似網友錢錢果種款，
點解夢中會出現一個唔識得但又唔少戲份o既謎之少女呢？