上一輩o既人經歷過香港制水時期，好多時因為D水唔夠用，
要大聲叫上去：「樓上山水喉呀！」但黎到2013年o既今日，
我居然都要經歷呢種情況，話說樓上租比人，租客嫌水力不足，
安裝左個水pump，估唔到佢呢個pump一開完全扯走我地單位D水，
扯左一半水都情有可原丫，佢係完全扯走晒，一滴都無呀！
試過我地開緊水，佢一開水我地即刻無水，又或者佢地開緊水，
我地再開水都係完全無水，衣家用水優先權完全響佢地手上，
點解知佢地開水？因為佢地開水果陣個pump d抽水聲好大聲，
真係妹仔大個主人，平心而論，我唔係要做到我地開水佢無水，
係要大家都一樣有水用，衣家咁唔係辦法喎，試諗下，
如果沖沖下涼突然停水，真係成身濕晒赤裸裸咁棟左響度，
佢地開水唔係開幾秒，有時開幾分鐘，就要棟響度幾分鐘，
呢D咁o既天氣，唔感冒都幾難，呢個問題真係好嚴重喎！
 

第二次咁o既topic都係講番macbook，
雖然部份問題都解決左，例如搵到MHeiHK字體，
解決M正線體出唔到出唔到「果、全、殺」字等，
網絡方面亦明顯感受到比2012rmbp紥實，
衾蓋唔會斷線，用公司內聯網亦快左穩定左，
唔會抄抄下file無左下文等，不過依然仲有問題，
例如響indesign置入圖片有時會搵唔到內聯網，
用photoshop save圖上內聯網仲試過hang機，
奇怪，公司部imac 7年前貨色但網絡都穩定咁多，
無理由今時今日整o既網絡卡咁弱雞假？
仲諗住直接響公司用自己部機做野都係唔得。
不過話時話我差唔多日日都帶mba番工，
所以話輕真係好重要！
 

3月先寫過一個朋友十年感情分手個案，衣家又黎多單，
黎耀祥話齋「人生有幾多個十年」可以拍拖十年o既，
都好難再搵另一個十年拖友，十年都未能結婚，
另一段要要幾多年先肯結？3月單case就女方勢利拜金，
(仲要係肥女黎)呢D女真係要唔要都擺啦！
而今次單case就係男方飛條女，原因不明。
我曾經覺得呢條仔係世界上最最最幸福o既人，
佢個款算係乸乸地無乜才華唔醒目唔識講野悶蛋果D，
應該亦唔係有米，但佢居然得到世界上最完美o既女神！！
就算被飛，點睇都係條女飛條仔多過條仔飛條女啦！！
女神身型窈窕樣靚識搞氣氛有才藝，睇落係come擺果D，
即係就算去到4~50歲仲可以好順眼(米雪、鄭裕0果種)
值得長線投資，有D女個款睇得出只係後生果陣OK，
一老左就走樣發福崩壞(李斯奇、舌家燕果種)
講番條仔，佢咁做真係超低能！勁白痴！更克人憎！
佢以為自己咩料呀？佢得到女神只係際遇好炸！
唔係十年前死好運佢點睇都仲係毒L溝唔到女果D！
呢D素質o既單身漢，響MK一部冷氣機跌落黎都責死唔少！
佢選擇由天堂最高享受跌番落去凡間做個凡夫俗子，
亦要多得佢咁「偉大」其他人先有D機會得到呢份幸福，
不過，幾敢肯定寫包單呢條仔好快會食番回頭草，
而好多呢D十年八年感情分手個案都係過一排又一齊番，
3月單case衣家咪又係復合番，仲有林某欣都係咁啦，
總之佢地要試下出面闖蕩下，先知原本果個先係最好，
唔係佢地會覺得人一世物一世無機會試下其他野就做人世。

上年都有送聖誕卡，一不做二不休，今年都照送，
對上送聖誕卡都係小學o既事，估唔到呢兩年又玩番 XD
17號就買會唔會早左D？查實答應左同朋友亙寄聖誕卡，
等郵差寄信時間要早D寄啦，唔係佢收到可能過左聖誕。
上年響誠品買D貴卡，好似差唔多八十幾蚊，唔係唔靚，
不過發現商務果D仲靚，仲要平D，咁買誠品果D做乜？
今次見商務有架摺起黎係流動賣餅咖啡車o既聖誕卡勁靚，
都係28蚊炸，買左兩張，其他仲有D透明同埋立體卡，
total買左7張只係145蚊，$28x3、$21x2、$18x2再9折。

落開銅鑼灣，點都要食D平時觀塘無得食o既野，
行經燉奶佬比佢食物海報吸引到，好！就呢間！
試下佢o既印尼炒飯，其實係星米o既炒飯版，
叫星洲炒飯比較貼切，不過飯面加多兩隻炸雞翼，
同埋一塊流心煎蛋，食落D飯粒幾軟熟好好味，
咖喱均衡入味，可見廚師功力非一般茶記級數，
連杯熱華田49蚊，銅鑼灣黎講呢個價錢相當合理，
不過食完行出舖望格離間翠華，人氣似乎多好多，
但我絕對覺得呢間燉奶佬都係「依枝班」！
下次一定要再試埋佢其他野食。