好多人話邊個陪你由2013跨年到2014，
就喻意渡過一生一世(1314)，不過計我話，
如果真係最愛o既人，只係一生一世點夠？
當然要永生永世啦~咳咳~呢篇唔係談情誌，
回正題講番我點跨年，無拖拍咪又係搵朋友，
呢D咁o既大時大節又唔想番屋企住，
諗住呂少會唔會搞D咩BBQ或者食飯活動，
點知係無，不過都照搵佢落銅鑼灣，
睇下有乜搞作，當然係周圍封路水洩不通，
行到落灣仔巴士總站，仲有幾分鐘踏入2014，
又比我地響天橋果度攝到個好位影煙花，
睇得又清楚前面無人檔住唔會影到人頭，
可惜當日我無帶單反，只係用iphone影，
諗番起2009年煙花匯演響尖咀得個罅比我影，
所以響facebook相簿都寫明「小罅影」 XD
(當年仲要係特殊途徑先入到個位影都咁)
不過番去睇番D相唔怪得之點解攝到位影相，
因為煙花前面仲有一大個巴士總站煞風景。

呢幾個月響自動櫃員機o禁完錢，
都會出現3個月後失效o既警告，
本來諗住用到佢話「1個月後失效」先換，
點知月月都話「3個月」由邊個月計起先？
米啦，驚佢無端端食左我張舊卡，
為保留番張舊卡，今日開始就轉用新卡，
陪伴左十數載o既舊ETC從此榮休。
做乜要迫人轉新卡姐？最憎呢D強制換新行為！
講番張卡歷史，當年中學時期就申請，
果陣中學有得碌卡感覺好大人同埋好潮，
係同學面前響惠康買包個幾o既香口膠都碌卡，
(其實衣家排隊買野好憎前面果個碌卡阻住晒)
中途ETC都有轉過款色，白色卡世界地圖款，
不過我渣住呢張係似信用卡，所以堅持唔換，
就算我轉名都無換新卡，所以舊卡仲係我舊名，
用左咁多年依然無穿無爛運作正常，
都算係我目前用得最耐o既隨身物，
八達通、匙扣、銀包、手機都唔知換左幾多次，
就算回鄉證、鎖匙、身份證都換過兩三次啦，
所以係有D唔捨得換。

一班舊同事隔左幾年仲約出黎食飯，真係好難得，
對上一次一大班出黎食飯好似係2012年頭...
今次響旺角兆萬7/F金井食放題，每位都係155蚊，
可惜係總唔能夠約齊人，易拎身在澳洲無得講，
但身在香港o既強哥同royce都無出席，
強哥一向推三推四，royce就響旺角都唔過黎，
話好忙，一兩年先見一次唔食飯都浦下頭得掛？
唔理佢地啦，今晚o既焦點似乎都係強哥，
雖然主角唔響度，但大家都好好奇佢發生咩事，
我就只能夠拎部份強哥o既故事出黎同大家分享，
本來諗住等royce黎到先一齊講，錯晒flow，
準備左D small talk同埋影片都無用到，
Kenny同Kaka都帶左佢地o既另一半出黎放閃光，
食到11點幾就各散東西~

咩數碼廣播數碼收音機，同普通FM有乜分別？
相信呢樣野其實對一般市民黎講都係好陌生模糊，
dbc電台就好用力咁宣傳數碼收音機，
(話說普通收音機應該收唔到佢地個台)
我都買一部數碼收音機黎親身體驗一下，
第一樣感到驚訝o既，係包裝上面寫住4粒2A電，
只係用到9個鐘，唔係呀fa？係咪打少左個0？
4粒2A喎，普通收音機1粒3A電用半年都未洗換，
呢個耗電量以收音機黎講真係接受唔到囉，扣分。
(所以該產品隨盒附送埋火牛同埋USB電線)
話時話要買呢部野都唔易，話就話OK有得賣，
搵左幾間OK都話無，距離普及仲有好遠。
用過後唯一覺得可取之處，係唔洗較台，
佢會自動搜索1秒左右就追到台，經常轉台都方便，
但收音機收得差或收唔到o既地方數碼都係收唔到，
同埋可以聽到普通收音機聽唔到o既dbc 7個台，
至於係咪高清左？唔多覺囉，咪又係差唔多。

自從樓上租戶奪取左用水優先權，
沖涼都要就樓上時間，揀佢地唔開水o既鐘數沖，
所以最近都等到零晨兩三點先敢沖涼...